គ្រូបង្វឹកក្រុមព្រះខ័នរាជស្វាយរៀង លោក Conor Nestor បានសរសើរពីកូនក្រុមក្រោយដឹកនាំក្រុមបានឡើងទៅជុំបន្ទាប់ គឺវគ្គ៨ក្រុមចុងក្រោយ ប្រចាំពានរង្វាន់សម្តេចតេជោ ហ៊ុន សែន លើកទី១២ ឆ្នាំ២០១៨ (Hun Sen Cup 2018) ក្រោយយកឈ្នះលើក្រុមចំណូលថ្មីដែលកំពុងតែឡើងជើងវិសាខា ដោយលទ្ធផល ២ទល់១ កាលពីពេលថ្មីៗ។
បុរសជនជាតិស្កុតឡែន រូបនេះបានគិតថា នេះជាការប្រកួតដែលមានការតាំងចិត្តខ្ពស់ និងប្រកួតប្រជែងខ្ពស់ ដោយអាចជាការបង្ហាញយ៉ាងល្អដល់វិស័យបាល់ទាត់កម្ពុជា។ លោកបន្តថា «ខ្ញុំគិតថា២ជើងមកនេះ យើងអាចទាត់បញ្ចូលទីបាន៣លើក ប៉ុន្តែខ្ញុំគិតថាកន្លងមកមិនមានក្រុមច្រើនទេអាចបំប៉ោងសំណាញ់ទីក្រុមវិសាខា បានច្រើនគ្រាប់។ ខ្ញុំយល់ស្របចំពោះការលើកឡើងដែលថា យើងបានបាត់បង់ឱកាសល្អ ខណៈវាគឺជាការប្រកួតក្នុងពានរង្វាន់សម្តេចតេជោ ហ៊ុន សែន ដោយយើងគ្រាន់តែលេងរហូតដល់ចប់រង់ចាំកញ្ចែអាជ្ញាកណ្តាលបន្លឺឡើង។ យ៉ាងណាខ្ញុំពិតជាមានមោទនភាពនូវការខិតខំប្រឹងប្រែងរបស់កីឡាករយើង»។
ប្រធានក្រុម ជា សំណាង បានរងរបួសម្រាមដៃក្នុងប្រកួតតានតឹងនេះ ដោយត្រូវការពេលសម្រាកព្យាបាលមួយរយៈទើបអាចចូលប្រកួតវិញបាន។ លោកគ្រូបង្វឹករូបនេះបន្តថា របួសរបស់ ជា សំណាង ពិតជាមានផលប៉ះពាល់ដល់ក្រុម ដោយរូបគេគឺជាកីឡាករម្នាក់យល់ថា លោកចង់ឲ្យលេងប្រព័ន្ធរបៀបម៉េច អំឡុងពេលប្រកួតម្តងៗ។
កាលពីជើងទី១ ក្នុងវគ្គ១៦ក្រុមចុងក្រោយប្រចាំពានរង្វាន់សម្តេចតេជោ ហ៊ុន សែន ដែលធ្វើឡើងនៅខេត្តស្វាយរៀង ក្រុមព្រះខ័នរាជស្វាយរៀង បានប្រកួតឈ្នះក្រុមវិសាខា ១ទល់០ ហើយត្រឡប់មកជើងទី២ដែលធ្វើឡើងនៅស្តាតចាស់ក្នុងរាជធានីភ្នំពេញ វិញម្តងក្រុមទាំង២បានប្រកួតស្មើគ្នា១ទល់១។ ដូច្នេះក្រុមព្រះខ័នរាជស្វាយរៀង បានកក់កៅអីឡើងទៅវគ្គ៨ក្រុមចុងក្រោយជាមួយក្រុម៧ផ្សេងទៀតដែលគណៈកម្មការប្រកួតបាល់ទាត់ជាតិកម្ពុជា (CNCC) នឹងចាប់ឆ្នោតជ្រើសរើសគូប្រកួតនៅសប្ដាហ៍ក្រោយ។
ក្រុមព្រះខ័នរាជស្វាយរៀង ទើបតែផ្លាស់ប្តូរគ្រូបង្វឹកកាលពីដើមរដូវកាល ដោយចុះកិច្ចសន្យា១រដូវកាលជាមួយលោក Conor Nestor កាន់អាជ្ញាប័ណ្ណគ្រូបង្វឹកកម្រិត UEFA A License ជំនួសលោក សំ វ៉ាន់ដេត ដែលជាគ្រូចាស់គ្រោងនឹងបន្តរៀនវគ្គគ្រូបង្វឹក AFC “A” License។ ក្រុមនេះបានបញ្ចប់រដូវកាលឆ្នាំ២០១៧ របស់ខ្លួនកន្លងទៅ ដោយឈរចំណាត់ថ្នាក់លេខ៣ ប្រចាំពានរង្វាន់លីគកំពូលកម្ពុជា Metfone Cambodian League 2017 ដែលមានសមាជិក១២ក្រុម ហើយនៅក្នុងពានរង្វាន់សម្តេចតេជោ ហ៊ុន សែន វិញបានបញ្ចប់រដូវកាលរបស់ខ្លួនដោយគ្រងតំណែងជើងឯកតែម្តង៕
Source: Kampuchea Thmey Daily
0 Comments