បុរស​អាមេរិក​ទទួល​បាន​រង្វាន់​ធំ​ បន្ទាប់ពី​ដើរ​ចម្ងាយ​៣២​គីឡូម៉ែត្រ​ទៅធ្វើ​ការ​ថ្ងៃ​ដំបូង​

លោក Walter Carr មិន​ចង់​ខកខាន​ថ្ងៃ​ធ្វើការ​ដំបូង​របស់គាត់​ជា​បុគ្គលិក​រើ​ផ្ទះ​ទេ​។ ដូច្នេះ​នៅពេលដែល​ឡាន​របស់គាត់​ខូច គាត់​មិនអាច​រក​អ្វី​ជិះ​បាន​នោះទេ​។ គាត់​ក៏ត្រូវ​ដើរ​ក្នុង​ចម្ងាយ​៣២​គីឡូម៉ែត្រ​។​
​
ដោយ​ត្រូវ​ចំណាយពេល​ពេញ​មួយ​យប់​ដើរ​យ៉ាងយូរ​, រឿងរ៉ាវ​បានប្រែក្លាយ​ទៅ​ភាព​អស្ចារ្យ​ស​សម្រាប់​លោក Carr ដែលមាន​អាយុ​២០​ឆ្នាំ​។ ចៅហ្វាយ​ថ្មី​របស់គាត់​បានដឹង​ពីអ្វី​ដែល​លោក Carr បានធ្វើ​ហើយក៏​ឲ្យ​សោ​ឡាន​ផ្ទាល់ខ្លួន​របស់គាត់​ទៅ​ឲ្យ​លោក Carr ។ នោះ​គឺ​ឡាន​ម៉ាក Ford Escape​។​
​រឿងរ៉ាវ​នេះ​បាន​បង្ក​ភាពល្បីល្បាញ​ក្នុង​បណ្តាញ​ផ្សព្វផ្សាយ​សង្គម​ បន្ទាប់ពី​ស្ត្រី​រដ្ឋ Alabama ម្នាក់​ឈ្មោះ Jenny Lamey ដែល​ទូរស័ព្ទ​ទៅ​ក្រុមហ៊ុន​រើ​ផ្ទះ​របស់លោក Luke Marklin បាន​បង្ហោះ​អំពី​រឿងនេះ​លើ Facebook កាលពី​ចុង​សប្តាហ៍​។​
​
នាង​បាន​និយាយថា “​គាត់​មាន​ចិ​ត្ដ​រាបទាប​ហើយ​សប្បុរស​និង​រីករាយ​”​។ ការ​បង្ហោះ​របស់​នាង​គិត​ត្រឹម​ថ្ងៃ​ពុធ​គឺ​បាន​ទាក់ទាញ​ឲ្យ​មានប្រតិកម្ម​ពី​មនុស្ស​ជាង​៦,០០០​នាក់​។​
​នាង Lamey បានដឹង​ពី​លោក Carr ថា គ្រួសារ​របស់គាត់​ដែលមាន​ដើមកំណើត​មកពី​ទីក្រុង New Orleans បាន​បាត់បង់​ផ្ទះសម្បែង​របស់ខ្លួន​ដោយសារ​ព្យុះ Katrina ហើយ​បន្ទាប់មក​បាន​រើ​ទៅ​នៅ Alabama​។​
​
គាត់​បាន​ចាក​ចេញពី​កន្លែង​របស់គាត់​នៅ Homewood នៃ​រដ្ឋ Alabama មិនយូរប៉ុន្មាន​មុនពេល​ពាក់កណ្តាល​អា​ធ្រា​ត​នៅ​ថ្ងៃ​សុក្រ​។ ក្នុងនាម​ជា​អតីត​អ្នករត់​ប្រណាំង​ឆ្លង​ប្រទេស​កាល​រៀន​វិទ្យាល័យ គាត់​អាច​គ្រប់គ្រង​ក្នុង​ចម្ងាយ​៣២​គីឡូម៉ែត្រ​ដោយ​ថ្នើ​រ​ជើងបាន​។​
​បួន​ម៉ោង​ក្រោយមក នៅពេលដែល​គាត់​ឈប់​ដើម្បី​សម្រួល​ដង្ហើម មន្ត្រីប៉ូលិស​បាន​បញ្ឈប់​ដើម្បី​ពិនិត្យមើល​គាត់​។ មន្ត្រី​បាន​ទិញ​អាហារ​ពេលព្រឹក​ឲ្យ​គាត់​ហើយ​បន្ទាប់មក​បាន​បើកឡាន​ជូន​គាត់​បន្តដំណើរ​ទៅមុខ​ចម្ងាយ​ពីរ​បី​ម៉ា​យ​។​
​ក្រោយពី Carr បាន​ដើរ​ទៅដល់​ក្រុង Pelham ប៉ូលិស​ម្នាក់ទៀត​បាន​ជូន​គាត់​ទៅដល់​កន្លែង​។​
​នាង Jenny Lamey ស្ថិតក្នុង​ផ្ទះ​នៅ​ម៉ោង​៦​និង​៣០​នាទី​ព្រឹក​ថ្ងៃ​សៅរ៍​នៅពេល​នាង​ឮស្នូរ​កណ្តឹង​។​
​នាង​និយាយថា “​វា​គឺជា​មន្ត្រីប៉ូលិស​ម្នាក់​។ គាត់​បាន​ប្រាប់​យើង​ថា គាត់​បាន​យក​ក្មេង​ដ៏​ល្អ​ម្នាក់នេះ​នៅ Pelham កាលពី​ព្រឹក​នេះ​”​។​
​នាង​និង​ស្វាមី​របស់​នាង​បាន​ប្រាប់ Carr ថា គាត់​អាច​សម្រាក​រហូតដល់​ក្រុមមនុស្ស​ដែល​នៅ​សេសសល់​ធ្វើដំណើរ​មកដល់​ប៉ុន្តែ​គាត់​បាន​ទទូច​ចង់​ធ្វើ​ការងារ​របស់គាត់​។​
​ក្រោយមក​នៅពេលដែល Marklin បានឮ​រឿងនេះ គាត់​ក៏បាន​សម្រេចចិត្ត​ឲ្យ​ឡាន​របស់គាត់​ទៅ​បុរស​វ័យក្មេង​រូបនេះ​តែម្តង​៕ AFP

​

Source: Kampuchea Thmey Daily