ភ្នំពេញ ៖ ប្រធានគណបក្សសម្ព័ន្ធដើម្បីប្រជាធិបតេយ្យ (LDP) លោក ខឹម វាសនា បានអះអាងថា ស្ថានភាពបច្ចុប្បន្នមិនមានគណបក្សណាអាចយកឈ្នះគណបក្សប្រជាជនកម្ពុជាបានទេ ហើយក៏មិនអាចទៅពឹងបរទេស ឲ្យមកគាបសង្កត់រាជរដ្ឋាភិបាល ហើយមិនអាចប្រើបាតុកម្មដើម្បីទម្លាក់រាជរដ្ឋាភិបាលបានដែរ ដូច្នេះនៅកម្ពុជា ការបោះឆ្នោត គឺជាជម្រើសតែមួយគត់។
លោក ខឹម វាសនា នៅក្នុងសន្និសីទសារព័ត៌មានមួយ កាលពីព្រឹកថ្ងៃទី១៩ ខែកក្កដា ឆ្នាំ២០១៨ ស្តីពីជំហររបស់គណបក្ស ចំពោះការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ ជាពិសេសទាក់ទងការគូសសញ្ញាគាំទ្រគណបក្សនៅពេលបោះឆ្នោត។ លោកថ្លែងថា ស្ថានភាពបច្ចុប្បន្នមិនមានគណបក្សណាអាចយកឈ្នះគណបក្សប្រជាជនកម្ពុជាបានទេ ហើយក៏មិនអាចទៅពឹងបរទេស ឲ្យមកគាបសង្កត់រាជរដ្ឋាភិបាលបានដែរ។
លោក ខឹម វាសនា បញ្ជាក់យ៉ាងនេះថា “មិនអាចអ្នកណាយកឈ្នះ គណបក្សប្រជាជនកម្ពុជាបានទេ ចឹងលទ្ធផលខ្ញុំគិតថា គណបក្សប្រជាជនកម្ពុជានឹងឈ្នះ ប៉ុន្តែយើងមិនអាចទៅពឹងបរទេសមកគាបសង្កត់រាជរដ្ឋាភិបាលបានទេ យើងមិនអាចប្រើបាតុកម្មដើម្បីទម្លាក់រាជរដ្ឋាភិបាលកម្ពុជា អត់អាច ដូច្នេះការបោះឆ្នោតទៅយុត្តិធម៌ ឬមិនយុត្តិធម៌ គឺវាជាផ្លូវតែមួយគត់...បាតុកម្ម ឬពឹងពាក់បរទេសមិនមែនជាផ្លូវទេ”។
លោក ខឹម វាសនា លើកឡើងដែរថា កាលលោកនៅជាមួយលោក សម រង្ស៊ី លោកបានមើលឃើញថា នៅក្នុងគណបក្សនោះ បរិបូណ៌ទៅដោយមនុស្សចាក់រុក ឆ្កឹះឆ្កៀល បំប៉ោងសភាពការណ៍ វាមិនមែនជាគណបក្សមួយស្រឡាញ់ប្រទេសជាតិ ឬជាគណបក្ស ដែលអាចដឹកនាំប្រទេសបាននោះទេ ហេតុនេះហើយបានជាលោកចាកចេញមកបង្កើតគណបក្សមួយ ហើយ “ខ្ញុំយល់ថា គណបក្សហ្នឹងថ្ងៃណាមួយគង់នឹងរលាយទេ ពីព្រោះបើទោះបីជារដ្ឋាភិបាលហ្នឹង ជាគណបក្សថ្មី ក៏មិនអាចទទួលយកបានដែរ អ្នកណាទុកបាន ចង្រៃខ្លាំងណាស់ ខ្ញុំថាមិនត្រូវមានវត្តមានគណបក្សបែបហ្នឹងនៅស្រុកខ្មែរទេ។ ចឹងហើយបានជាសកម្មជនថាតាមមេវា ថាខ្ញុំជាក្មួយ ជាម យៀប ថាជាអាយ៉ងស្អីៗហ្នឹង ខ្ញុំថាហ្អែងចាំមើល ពាក្យសម្តីហ្នឹងខ្ញុំបានសរសេរទុកក្នុងហ្វេសប៊ុកយូរហើយ តាំងពីគណបក្សសង្គ្រោះជាតិមិនទាន់រលាយមកម្ល៉េះ ខ្ញុំថាហ្អែងចាំមើលអ្នកណារលាយមុន ហើយរលាយហ្នឹងហ្អែងកុំថា មកពីគណបក្សប្រជាជន គឺមកពីអត្តចរិតគណបក្សហ្អែងវាចឹង គេអត់អោនឲ្យមិនបាន កុំថាតែគណបក្សប្រជាជន រដ្ឋាភិបាលគណបក្សណាក៏គេមិនអាចអត់អោនឲ្យបានដែរ។ ចឹងសរុបមកគណបក្សហ្នឹងមិនគួរមានវត្តមាននៅលើទឹកដីកម្ពុជាទេ។ ពីព្រោះបើយើងចង់ផ្លាស់ប្តូររដ្ឋាភិបាល ដើម្បីឲ្យល្អ ចុះបើយកគណបក្សបែបនេះហ្នឹង ទៅម៉េចរួច។ វាអត់មានការលះបង់ វាមានតែការប្រមូលផ្តុំ ដើម្បីផលប្រយោជន៏ផ្ទាល់ខ្លួន រួចហើយធ្វើនយោបាយ បង្កើតគោលនយោបាយ ដើម្បីទាក់យកសន្លឹកឆ្នោត”។
ដោយឡែកបញ្ហាដែលមានអ្នកនយោបាយមួយចំនួនលើកឡើងថា រដ្ឋាភិបាលគួរដោះលែងអ្នកទោសនយោបាយនោះ លោក ខឹម វាសនា អះអាងថា អ្នកជាប់ទោសនេះ មិនមែនអ្នកទោសនយោបាយទេ ។ លោកបញ្ជាក់យ៉ាងនេះថា “ដឹងអ្នកទោសនយោបាយអីទេ ពីព្រោះអ្នកទោសនយោបាយ ជាអ្នកទោសដែលមានការយល់ផ្សេងពីអ្នកដឹកនាំប្រទេស ហើយគាត់បញ្ចេញមតិតាមការយល់របស់គាត់ អាហ្នឹងបានចាត់ទុកអ្នកទោសនយោបាយ តែនេះវាអត់ផងហ្នឹង ឆ្កឹះឆ្កៀល ចាក់រុក បំប៉ោង បំភ្លើស ធ្វើមិចបង្កើតព្រឹត្តិការណ៍ដើម្បីប្រយោជន៍ផ្ទាល់ខ្លួន ដល់គេចាប់ដាក់គុក ហៅអ្នកទោសនយោបាយ វាអត់ត្រូវបងប្អូន វាអត់ត្រូវ គ្មានអ្នកទោសនយោបាយអីទេ”៕
Source: Kampuchea Thmey Daily
0 Comments