ភ្នំពេញ ៖ ក្រសួងសុខាភិបាលគ្រោងនឹងចុះបញ្ជីកាឱសថតាមប្រព័ន្ធអេឡេចត្រូនិចនាពេលខាងមុខនេះ ដើម្បីជួយសម្រួលដល់ដំណើរការចុះបញ្ជីឱសថឲ្យបានលឿនជាងមុនឈានទៅដល់ការគ្រប់គ្រងឱសថក៏ដូចជាទប់ស្កាត់ឱសថក្លែងក្លាយផងដែរ។
លោកបណ្ឌិត យ៉ង់ ដារាវុធ អនុប្រធាននាយកដ្ឋានឱសថនិងចំណីអាហារមានប្រសាសន៍ថាការចុះបញ្ជីកាឱសថតាមប្រព័ន្ធអនឡាញនេះនឹងជួយឲ្យម្ចាស់ក្រុមហ៊ុនឱសថចំណេញពេលវេលាក៏ដូចជាថវិកាដោយមិនចាំបាច់ធ្វើដំណើរមកកាន់ក្រសួងសុខាភិបាលឡើយ ដោយគ្រាន់តែចូលទៅក្នុងគេហទំព័ររបស់ក្រសួងរួចហើយ បំពេញទៅតាមបែបបទដែលក្រសួងបានកំណត់។
ថ្លែងនៅក្នុងសន្និសីទសារព័ត៌មានមុនឈានទៅរៀបចំពិព័រណ៍ឱសថកម្ពុជាឆ្នាំ ២០១៨និងសន្និសីទអន្តរជាតិលើកទី៤ ស្តីពីឧស្សាហកម្មឱសថវេជ្ជសាស្ត្រមន្ទីរពិសោធន៍ និង សុខភាពធ្មេញនៅកម្ពុជាដែលធ្វើនៅដើមខែកញ្ញាខាងមុខនេះ នៅមជ្ឈមណ្ឌលសន្និបាតនិងតាំងពិព័រណ៍កោះពេជ្ររាជធានីភ្នំពេញ លោកបណ្ឌិត យ៉ង់ ដារាវុធបានបន្តថា ការចុះបញ្ជិកាតាមអនឡាញនេះមិនត្រឹមតែជួយឲ្យដំណើរការចុះបញ្ជិកាបានលឿនប៉ុណ្ណោះទេគឺថែមទាំងអាចកាត់បន្ថយអំពើពុករលួយបានផងដែរ។
លោកបណ្ឌិត យ៉ង់ ដារាវុធបានបន្ថែមឲ្យដឹងទៀតថា គម្រោងចុះបញ្ជិកាឱសថតាមប្រព័ន្ធអេឡេចត្រូនិចនេះក្រសួងសុខាភិបាលកំពុងសហការជាមួយអង្គការសុខភាពពិភពលោកហើយសង្ឃឹមថានឹងអាចដាក់ឲ្យប្រើប្រាស់នាពេលឆាប់ៗខាងមុខនេះដើម្បីជួយសម្រួលដល់ការចុះបញ្ជិកាឱសថឲ្យបានឆាប់រហ័សជាងមុនខណៈបច្ចុប្បន្ននេះការចុះបញ្ជីកាឱសថត្រូវការពេលវេលាប្រមាណ៦ខែតាមរយៈច្រកចេញចូលតែមួយ។
លោក មាស សុជា នាយកគ្រប់គ្រងក្រុមហ៊ុនខ្មែរ ហ៊ែលឃែរខូអិលធីឌីបានគាំទ្រចំពោះក្រសួងសុខាភិបាលក្នុងការបង្កើតឲ្យមានការចុះបញ្ជិកាតាមប្រព័ន្ធអេឡេចត្រូនិចនេះព្រោះបានជួយឲ្យក្រុមហ៊ុនលោកចំណេញពេលវេលាច្រើន ក្នុងការធ្វើអាជីវកម្មប្រចាំថ្ងៃដោយមិនចំណាយពេលយូររាប់ខែដូចមុន។
លោកបណ្ឌិត យ៉ង់ ដារាវុធ បានបញ្ជាក់ថា កាលពីឆ្នាំ២០១៧កន្លងទៅមានឱសថសម័យដែលចុះបញ្ជិកានៅក្រសួងសុខាភិបាលចំនួន១៥៣០៤មុខ និងឱសថបុរាណមានចំនួន៤៧៤មុខ៕
Source: Kampuchea Thmey Daily
0 Comments