បាត់ដំបង ៖ មុខសញ្ញាសង្ស័យចំនួន២នាក់ ដែលជាមុខសញ្ញាចែកចាយគ្រឿងញៀនដ៏សកម្ម ត្រូវបានកម្លាំងសមត្ថកិច្ចមូលដ្ឋាន តាមប្រមាញ់និងឈានដល់ការចាប់ខ្លួនព្រមទាំងថ្នាំញៀនមួយចំនួនថែមទៀតផង បន្ទាប់ពីកម្លាំងបានធ្វើការតាមដាន និងស្រាវជ្រាវអស់មួយរយៈរួចមក។
យោងតាមរបាយការណ៍របស់សមត្ថកិច្ចបានឲ្យដឹងថា កិច្ចប្រតិបត្តិការនេះបានធ្វើឡើងកាលពីថ្ងៃទី១៦ ខែកក្កដា ឆ្នាំ២០១៨ វេលាម៉ោង ៥ និង ៤៥ នាទីល្ងាច ត្រង់ចំណុចភូមិកូនភ្នំខាងជើង ឃុំតាស្តារ ស្រុកសំពៅលូក ខេត្តបាត់ដំបង ដោយបានឃាត់ខ្លួនជនសង្ស័យបានចំនួន២នាក់។
នៅក្នុងកិច្ចប្រតិបត្តិការនេះដែរ កម្លាំងបានដកហូតនូវវត្ថុតាងមួយចំនួនដូចជា ថ្នាំញៀនប្រភេទម៉ាទឹកកក ចំនួន១កូនថង់ មានទម្ងន់ ១,៨២ ក្រាម ទូរស័ព្ទដៃ១គ្រឿង កាំបិតចំនួន ៣ ដើម និងសម្ភារៈសម្រាប់វេចខ្ចប់ និង ប្រើប្រាស់មួយចំនួនថែមទៀត ដោយជនសង្ស័យមានឈ្មោះ កង ស៊ីណាន ហៅទូច ភេទប្រុស អាយុ២៦ឆ្នាំ រស់នៅត្រង់ចំណុចខាងលើ និងឈ្មោះ ងឿន សុភាព ហៅអៀប ភេទប្រុស អាយុ២១ឆ្នាំ រស់នៅភូមិកោះតូច ឃុំសំពៅលូន ស្រុកសំពៅលូន។
លោក វរសេនីយ៍ទោ សុខ និមល នាយរងការិយាល័យ ប្រឆាំងគ្រឿងញៀន នៃស្នងការដ្ឋាន នគរបាលខេត្ត បានបញ្ជាក់ថា បច្ចុប្បន្នជនសង្ស័យទាំងពីរនាក់ខាងលើ រួមជាមួយនិងវត្ថុតាង ត្រូវបានកម្លាំងការិយាល័យជំនាញ កំពុងរៀបចំសំណុំរឿងបញ្ជូនខ្លួនទៅកាន់សាលាដំបូងខេត្តហើយ ដើម្បីចាត់វិធានការតាមផ្លូវច្បាប់៕
Source: Kampuchea Thmey Daily
0 Comments