នៅក្នុងបរិបទដ៏តានតឹងនៃនយោបាយរបស់កម្ពុជានាដំណាក់កាលចុងក្រោយនេះ ប្រទេសលោកខាងលិចមួយចំនួនថោ្កលទោសរាជរដ្ឋាភិបាលកម្ពុជា ជាមួយនឹងការព្រមានផ្តាច់ជំនួយ បន្ទាប់ពីគណបក្សសង្គ្រោះជាតិត្រូវបានរំលាយដោយសាលក្រមតុលាការកំពូល ដែលគណបក្សនេះបានឃុបឃិតជាមួយបរទេសប្រព្រឹត្តអំពើក្បត់ជាតិ។
ទោះបីយ៉ាងណា គេសង្កេតឃើញជំហររបស់ប្រទេសមហាអំណាច ចិន សហព័ន្ធរុស្ស៊ី និង ជប៉ុន នៅតែបន្តគាំទ្រនយោបាយដឹកនាំរបស់រាជរដ្ឋាភិបាលកម្ពុជា។ ការគាំទ្ររបស់មហាអំណាច ចិន និងរស្ស៊ី មិនមានអ្វីគួរឲ្យចាប់អារម្មណ៍នោះទេ។ ក៏ប៉ុន្តែមានសំណួរលើកឡើងថា ចុះហេតុអ្វីមហាអំណាចសេដ្ឋកិច្ចជប៉ុនក៏មិនបានរិះគន់រាជរដ្ឋាភិបាលកម្ពុជា? ហើយផ្ទុយទៅវិញ ជប៉ុននៅតែបន្តគាំទ្ររាជរដ្ឋាភិបាលកម្ពុជា និងបន្តផ្តល់ជំនួយដល់រាជរដ្ឋាភិបាលកម្ពុជា។
ជប៉ុន និងកម្ពុជា បានចាប់ផ្តើមទំនាក់ទំនងការទូតជាផ្លូវការនៅឆ្នាំ១៩៥៣ ពោលគឺ ៦៥ ឆ្នាំគត់ បើគេគិតត្រឹមឆ្នាំ ២០១៨ នេះ។ ចាប់តាំងពីឆ្នាំ១៩៩២ រហូតដល់ឆ្នាំ ២០១៨ នេះប្រទេសជប៉ុនបានផ្តល់ជំនួយអភិវឌ្ឍប្រមាណជាងពីរពាន់លានដុល្លារដល់ព្រះរាជាណាចក្រកម្ពុជា។ ប្រសិនបើគេគិតត្រឹម២៥ឆ្នាំចុងក្រោយនេះ ជប៉ុនបានបោះទុនវិនិយោគនៅក្នុងប្រទេសកម្ពុជាប្រមាណជា ១.៥០០លានដុល្លារ។ ដោយបាននឹងកំពុងបន្តបោះទុនវិនិយោគក្នុងវិស័យធនាគារ សណ្ឋាគារ ផ្សារទំនើប អចលនទ្រព្យ។ល។
នៅគ្រាចុងក្រោយនេះ ស្របពេលដែលប្រទេសអឺរ៉ុប និងសហរដ្ឋអាមេរិក បានដកជំនួយរបស់ខ្លួនចេញគណៈកម្មាធិការជាតិរៀបចំការបោះឆ្នោត ប្រទេសជប៉ុនដែលជាសម្ព័ន្ធមិត្តរបស់សហរដ្ឋអាមេរិកដែរនោះ បែរជាបង្ហាញជំហរអព្យាក្រឹតហើយបន្តកិច្ចការងារជាមួយរាជរដ្ឋាភិបាលកម្ពុជា។ ប្រទេសជប៉ុនបានប្រគល់ជូនសម្ភារៈដូចបានសន្យាដល់ គ.ជ.ប ដើម្បីគាំទ្រដល់ដំណើរការរៀបចំការបោះឆ្នោតជ្រើសតាំងតំណាងរាស្ត្រនីតិកាលទី ៦ ដែលនឹងប្រព្រឹត្តទៅនៅថ្ងៃទី ២៩ ខែកក្កដា ខាងមុខនេះ ។ សម្ភារៈដែលជប៉ុនប្រគល់ជូន គ.ជ.ប ជារួមមាន៖ ហឹបឆ្នោតចំនួន ១១០០០ ហឹប និងរថយន្តប្រភេទ Pickup សម្រាប់បម្រើការងារឲ្យការបោះឆ្នោតចំនួន ៤០ គ្រឿង។ ជំនួយទាំងនេះមានតម្លៃជាទឹកប្រាក់៨០០ លានយ៉េន ស្មើនឹងជាង ៧ លានដុល្លារ កាលពីថ្ងៃទី១៤ ខែកក្កដា។
តើហេតុអ្វីមហាអំណាចសេដ្ឋកិច្ចជប៉ុន មិនបានរិះគន់រាជរដ្ឋាភិបាលកម្ពុជា ? ហើយផ្ទុយទៅវិញជប៉ុននៅតែបន្តគាំទ្ររាជរដ្ឋាភិបាលកម្ពុជា និង បន្តផ្តល់ជំនួយដល់រាជរដ្ឋាភិបាលកម្ពុជាបែបនេះ?
ហេតុផលសាមញ្ញមួយដែលត្រូវបានគេលើកយកមកសំអាងនោះ គឺដោយសារជប៉ុនជឿជាក់លើរាជរដ្ឋាភិបាលកម្ពុជា ដែលដឹកនាំដោយគណបក្សប្រជាជនកម្ពុជា។ ម្យ៉ាងទៀតប្រសិនបើគេនិយាយពីទ្រឹស្តីការទូតនៅក្នុងទំនាក់ទំនងការទូត ថ្នាក់ដឹកនាំប្រទេសនីមួយៗ ធ្វើការតែជាមួយថ្នាក់ដឹកនាំដែលគ្រប់គ្រងប្រទេសស្របច្បាប់ប៉ុណ្ណោះ។ សម្រាប់បរិបទកម្ពុជាជប៉ុនប្រកាន់ជំហរខុសពីប្រទេសលោកខាងលិចឬខុស ពីអាមេរិកដែលជាសម្ព័ន្ធមិត្តរបស់ខ្លួនផងនោះ ក៏ព្រោះតែជប៉ុនយល់ឃើញថា គណបក្សស្របច្បាប់ដែលកំពុងតែដឹកនាំព្រះរាជាណាចក្រកម្ពុជានៅពេលនេះគឺគណបក្សប្រជាជនកម្ពុជា។ នេះគឺជាចំណុចដែលជប៉ុនត្រូវតែបន្តធ្វើកិច្ចសហប្រតិបត្តិការលើគ្រប់វិស័យដោយមិនងាករេ រាប់ចាប់តាំងពីកិច្ចការមនុស្សធម៌ សិក្សាធិការជំនួញ កម្ចីអភិវឌ្ឍ និងកិច្ចការទំនាក់ទំនងការទូត។ ជំហររបស់ជប៉ុនគាំទ្ររាជរដ្ឋាភិបាលកម្ពុជាជាទង្វើដ៏ត្រឹមត្រូវមួយដែលសូម្បីពួកលោកខាងលិចណាមួយហ៊ានធ្វើការរិះគន់ជប៉ុននោះទេ។
ការផ្តល់ជំនួយរបស់ជប៉ុនដល់ គ.ជ.ប ពេលនេះ បានបង្ហាញពីសុភៈវិនិច្ឆ័យ ដ៏ត្រឹមត្រូវបំផុតក្នុងការគោរពចំពោះអធិបតេយ្យភាពជាតិរបស់កម្ពុជា ហើយក៏បានបង្ហាញផងដែរថា ដំណើរការបោះឆ្នោតនៅកម្ពុជា គឺជាដំណើរការដ៏ត្រឹមត្រូវនៅក្នុងប្រទេសដែលប្រកាន់លទ្ធិប្រជាធិបតេយ្យ សេរី ពហុបក្ស ។ រាជរដ្ឋាភិបាលកម្ពុជា ប្រជាជនកម្ពុជា ពិតជាអរគុណប្រទេសជប៉ុនដែលបានផ្តល់ការគាំទ្រនិងជំនួយសម្ភារៈលើដំណើរការបោះឆ្នោតថ្ងៃទី២៩ ខែកក្កដាដ៏មានសារៈសំខាន់នេះ៕
Source: Kampuchea Thmey Daily
0 Comments