ព្រះសីហនុ ៖ រហូតមកដល់ម៉ោង២រសៀលថ្ងៃទី១៧ ខែកក្កដានេះ ជំនន់ទឹកភ្លៀងនៅតែហូរជន់លិចលើកំណាត់ផ្លូវជាតិលេខ៤ដដែល ដែលការជន់លិចនេះ ស្ថិតនៅចន្លោះគីឡូម៉ែត្រលេខ១១៥/១១៦ ដោយទឹកបានហូរពីលើស្ពានស្ទឹងសំរោងមានកម្ពស់១ម៉ែត្រកន្លះ លិចបង្កាន់ដៃស្ពាននិងមានបណ្តោយប្រវែងជិត១០០០ម៉ែត្រ។
ការជន់លិចនេះ មានរយៈពេលជាង៦ម៉ោងទៅហើយៗពីដំបូងបានចាប់ផ្តើមឡើងនៅម៉ោង៥ជិតភ្លឺ ដោយជំនន់ទឹកភ្លៀងបានជន់លិចពីលើស្ពានអូរគគីរ ទឹកមានកម្ពស់ជាង១ម៉ែត្រ និងបណ្តោយជិត៣០០ម៉ែត្រនៅក្បែរព្រំប្រទល់ខេត្តកំពង់ស្ពី និងខេត្តព្រះសីហនុ ចន្លោះគីឡូម៉ែត្រលេខ១០៦/១០៧ លើផ្លូវជាតិលេខ៤ស្ថិតនៅភូមិស្ទឹងច្រាល ឃុំអូរបាក់រទេះ ស្រុកកំពង់សិលា។
ការជន់លិចពីលើស្ពានអូរគគីរនេះ មានរយៈពេលប្រមាណ៤ម៉ោង ទើបទឹកបានហូរស្រកអស់ទៅវិញ ប៉ុន្តែនៅពេលដែលទឹកលើស្ពានអូរគគីរ ហូរស្រកអស់ ទឹកនៅស្ពានស្ទឹងសំរោង បានចាប់ផ្តើមជន់លិចយ៉ាងឆាប់រហ័ស។ ពេលនេះ ការធ្វើចរាចរ ត្រូវបានកាត់ផ្តាច់ទាំងស្រុងដោយក្រុមសមត្ថកិច្ចបានដាក់បារ៉ាស់បិទផ្លូវនៅដើមទី និងចុងទី ហើយបង្វែរចរាចរឲ្យរថយន្តផ្លាស់ប្តូរទិសធ្វើដំណើរកាត់តាមផ្លូវជាតិលេខ៣ជំនួសវិញ។
សមត្ថកិច្ចកងរាជអាវុធហត្ថស្រុកកំពង់សិលា បានឲ្យដឹងថា ពេលនេះក្រុមសមត្ថកិច្ចជាច្រើននាក់មកពីអង្គភាពពាក់ព័ន្ធក្នុងខេត្ត បានបញ្ជូនទៅកាន់តំបន់រងគ្រោះដើម្បីត្រៀមធ្វើការសង្គ្រោះប្រជាពលរដ្ឋ និងទ្រព្យសម្បត្តិ និងសត្វពាហណៈ ដែលប្រឈមងាយនិងរងគ្រោះ។
សមត្ថកិច្ចបានព្រមានថា បើសិនជាស្ថានភាពអាកាសធាតុនៅតែបន្តអាប់អួរ ហើយមេឃនៅតែបន្តធ្លាក់ភ្លៀងឥតឈប់ឈរនោះ ទឹកភ្លៀងនឹងហូរធ្លាក់ពីលើភ្នំកំចាយចូលតាមស្ទឹងសំរោង មកជន់លិចផ្លូវជាតិលេខ៤ អាចមានសភាពធ្ងន់ធ្ងរជាងនេះទៀត។
សមត្ថកិច្ចបានឲ្យដឹងទៀតថា រហូតមកដល់ពេលនេះមិនទាន់ទទួលបានព័ត៌មានថា មានប្រជាពលរដ្ឋណាម្នាក់រងគ្រោះថ្នាក់ដល់អាយុជីវិតនោះទេ។ សមត្ថកិច្ចបានបន្តទៀតថា តាមលោកដឹងក្រុមប្រជាពលរដ្ឋដែលរស់នៅតំបន់រងគ្រោះនេះ ពួកគាត់មានការយល់ដឹងខ្ពស់ពីការរក្សានិងការពារសុវត្ថិភាពខ្លួនគាត់ និងទ្រព្យសម្បត្តិ ព្រោះថាតំបន់ដែលពួកគាត់បានរស់នៅនេះ តែងតែកើតមានគ្រោះទឹកជំនន់ទឹកភ្លៀងជារៀងរាល់ឆ្នាំផងដែរ។
សមត្ថកិច្ចបានឲ្យដឹងទៀតថា បើទោះបីជាយ៉ាងនេះក៏ដោយចុះ ពេលនេះកម្លាំងសមត្ថកិច្ចចម្រុះក្នុងខេត្តជាច្រើននាក់បានត្រៀមលក្ខណៈរួចរាល់អស់ហើយ ក្នុងការជួយសង្គ្រោះប្រជាពលរដ្ឋគ្រប់ប្រភេទរួមទាំងសត្វពាហណៈបានទៅដល់តំបន់កើតហេតុផងដែរ៕
Source: Kampuchea Thmey Daily
0 Comments