កោះកុង ៖ ដោយសារតែបរិមាណទឹកដ៏សន្ធឹកសន្ធាប់ ដែលហូរធ្លាក់ពីតំបន់ខាងលើ (តំបន់ទំនប់វារីអគ្គិសនីតាតៃ) គួបផ្សំនឹងទឹកភ្លៀងដែលបាន និងកំពុងធ្លាក់ជាប់ជាបន្តបន្ទាប់ បានធ្វើឲ្យទឹកព្រែកតាតៃ នាព្រឹកថ្ងៃទី ១៧ ខែកក្កដា ឆ្នាំ ២០១៨ ជន់ឡើងលិចចូលភូមិឋានប្រជាពលរដ្ឋដែលនៅតាមមាត់ព្រែក។
យោងតាមប្រកាសរបស់ក្រសួងធនធានទឹក និងឧតុនិយម បានឲ្យដឹងថា បច្ចុប្បន្ន ខ្យល់មូសុងនិរតី បាននិងកំពុងបន្តបង្កើនឥទ្ធិពលមកលើតំបន់ឆ្នេរសមុទ្រក្នុងព្រះរាជាណាចក្រកម្ពុជា, ជាមួយគ្នានេះ ប្រព័ន្ធសម្ពាធទាប ក៏បាននិងកំពុងអូសបន្លាយកាត់លើអាងទន្លេមេគង្គក្នុងប្រទេសឡាវផងដែរ។ លក្ខណៈបែបនេះ នឹងធ្វើឲ្យបណ្ដាខេត្តជាប់ឆ្នេរសមុទ្ររបស់កម្ពុជា នឹងមានភ្លៀងធ្លាក់ច្រើនជាបន្តបន្ទាប់ ដោយធ្វើឲ្យផ្ទៃសមុទ្រមានខ្យល់បក់បោកខ្លាំង និងមានរលកខ្ពស់ៗ។
ដោយឡែកបណ្តារាជធានីខេត្តមួយចំនួន ដូចជា រាជធានីភ្នំពេញ ខេត្តកណ្តាល កំពង់ស្ពឺ និងតាកែវ ការធ្លាក់ភ្លៀង នឹងថយមកក្នុងបរិមាណតិច។ រីឯខេត្តដទៃទៀត នឹងមានភ្លៀងធ្លាក់រាយប៉ាយជាបន្តបន្ទាប់ក្នុងបរិមាណពីមធ្យមទៅច្រើន៕
Source: Kampuchea Thmey Daily
0 Comments