កំពត ៖ ផ្សារសាមគ្គីទីរួមខេត្តកំពត កន្លងមកឲ្យតែមានភ្លៀងធ្លាក់មិនបាច់យូរថ្ងៃទេ ភ្លៀងធ្លាក់តែមួយមេរាងធំបន្តិចក៏មានទឹកជំនន់ នៅលើផ្លូវជុំវិញផ្សារក៏ដូចជាក្នុងផ្សារផងដែរ គឺទឹកលិចដូចក្នុងស្រែបឹង តែមកដល់ពេលនេះ ផ្សារសាមគ្គីទីរួមខេត្តកំពត ទោះបីភ្លៀងធ្លាក់ជាប់ៗគ្នាជាច្រើនថ្ងៃដូចប៉ុន្មានថ្ងៃនេះក៏ដោយ ក៏ឃើញថា ផ្សារដែលធ្លាប់តែរងការលិចលង់នៅតាមបរិវេណនានា គឺពុំមានទឹកដក់ឬជន់លិចទៀតឡើយគឺដោយសារតែលោក អភិបាលខេត្តដែលទើបនឹងមកទទួលតំណែងគ្រប់គ្រងលើខេត្តកំពត ទើបតែបាន ៧ខែជាងប៉ុណ្ណោះ លោកបានធ្វើការកែសម្រួលប្រព័ន្ធលូនៅជុំវិញបរិវេណផ្សារ និងសាងសង់ជាថ្មីនូវហេដ្ឋារចនាសម្ព័ន្ធជាច្រើន ពិសេសការស្ថាបនាផ្លូវចាក់បេតុងស្ថិតជុំវិញផ្សារទីរួមខេត្ត ធ្វើឲ្យផ្សារដែលធ្លាប់តែរងការលិចលង់នាពេលកន្លងមកបានចៀសផុតពីការលិចលង់ដោយជំនន់ទឹកភ្លៀងទៀតផង។ ប៉ុន្តែទោះបីជាការស្តារឡើងវិញនៅគ្រប់ហេដ្ឋារចនាសម្ព័ន្ធនៅក្នុងក្រុងបានល្អគួរជាឲ្យចាប់អារម្មណ៍ពីសំណាក់ប្រជាពលរដ្ឋនិងមហាជននៅទូទាំងក្រុងយ៉ាងនេះក្តី ក៏នៅតែមានប្រព័ន្ធលូមួយចំនួនតូចទៀតដែលរដ្ឋបាលខេត្តមិនទាន់បានអនុវត្តរួចរាល់ ដូចជានៅចំណុចផ្លូវសួនច្បារដើមពោធិ៍ក្បែរបេនរថយន្តថ្មី ស្ថានីយប្រេងតូតាល់ និងក្នុងបរិវេណចំណតរថយន្តតែម្តង នៅពេលមានភ្លៀងធ្លាក់ខ្លាំងឬ ជាមធ្យមម្តងៗគឺនៅចំណុចខាងលើនេះនៅមានការលិចលង់គួរឲ្យចាប់អារម្មណ៍បំផុត គឺលិចដូចផ្ទៃបឹងទៅហើយ។
ប៉ុន្តែបើតាមប្រភពព័ត៌មានពីលោក លាង រឿនសុធី អភិបាលក្រុងកំពតបានប្រាប់កម្ពុជាថ្មី ឲ្យដឹងនៅរសៀលថ្ងៃទី១៧ ខែកក្កដា ឆ្នាំ២០១៨នេះថា នៅចំណុចលិចលង់ខាងលើ (បរិវេណផ្លូវសួនច្បារដើមពោធិ៍ និងបេនរថយន្តថ្មី) ខេត្តកំពុងមានគម្រោងកាយដាក់ប្រព័ន្ធលូទំហំ២ម៉ែត្របួនជ្រុង ដើម្បីធានាការបង្ហូរទឹកតាមប្រព័ន្ធ លូកុំឲ្យមានការកកស្ទះបន្តទៅទៀត។ ជាមួយគ្នានេះដែរលោក អភិបាលក្រុង និងក្រុមការងារសាលាក្រុងកំពុងចុះស្តារប្រព័ន្ធលូនៅផ្លូវលំមួយខ្សែនៅក្នុងសង្កាត់ក្រាំងអំពិលដើម្បីបញ្ចៀសទឹកជំនន់ ដោយគ្រោះជំនន់ទឹកភ្លៀង ដែលកំពុងតែធ្លាក់ជាប់ជាបន្តបន្ទាប់ក្នុងរយៈពេលប៉ុន្មានថ្ងៃនេះ៕
Source: Kampuchea Thmey Daily
0 Comments