លោកប្រធានាធិបតី Vladimir Putin បានចោទប្រកាន់ចក្រភពអង់គ្លេសកាលពីថ្ងៃចន្ទថា បានធ្វើការចោទប្រកាន់ដោយគ្មានមូលដ្ឋានប្រឆាំងនឹងប្រទេសរុស្ស៊ី បន្ទាប់ពីអតីតចារកម្មរបស់សូវៀតម្នាក់ស្ថិតក្នុងចំណោមមនុស្សបួននាក់ ដែលត្រូវបានគេរកឃើញថា ត្រូវបានបំពុលដោយភ្នាក់ងារបំផ្លាញសរសៃប្រសាទនៅភាគខាងត្បូងប្រទេសអង់គ្លេស។
នៅពេលសាកសួរក្នុងកិច្ចសម្ភាសន៍របស់ Fox News អំពីការអះអាងរបស់រដ្ឋាភិបាលអង់គ្លេសថាក្រុងមូស្គូនៅពីក្រោយការវាយប្រហារដោយសារធាតុ Novichok ទៅលើអតីតចារកម្មលោក Sergei Skripal នោះ, លោក Putin បាននិយាយថា ក្រុងឡុងដ៍មិនបានផ្តល់ភស្តុតាងណាមួយដើម្បីគាំទ្រដល់ការអះអាងរបស់ពួកគេទេ។
លោក Putin បាននិយាយតាមរយៈអ្នកបកប្រែម្នាក់បន្ទាប់ពីជំនួបកំពូលជាមួយលោកប្រធានាធិបតី Donald Trump នៅប្រទេស ហ្វាំងឡង់ ថា “យើងចង់បានភ័ស្តុតាងជាឯកសារប៉ុន្តែគ្មាននរណាម្នាក់ផ្តល់ឲ្យយើងទេ”។
លោកបន្ថែមថា “វាគឺជារឿងដូចគ្នាទៅនឹងការចោទប្រកាន់អំពីការជ្រៀតជ្រែកក្នុងដំណើរការបោះឆ្នោតរបស់សហរដ្ឋអាមេរិក”។ លោក Putin បានលើកឡើងថា ករណីនេះអាចត្រូវបានជំរុញដោយបញ្ហាក្នុងស្រុកនៅប្រទេសអង់គ្លេស។
លោកនិយាយថា “យើងគ្រាន់តែមើលទៅការចោទប្រកាន់គ្មានមូលដ្ឋាននេះទៅ។ ហេតុអ្វីបានជាវាត្រូវធ្វើដូច្នេះហើយហេតុអ្វីក៏ទំនាក់ទំនងរបស់យើងកាន់តែអាក្រក់ទៅដោយសារបញ្ហានេះ?”។
គួររម្លឹកឡើងវិញថា អតីតភ្នាក់ងារចារកម្មរបស់ប្រទេសរុស្ស៊ីលោក Skripal និងកូនស្រីរបស់គាត់ឈ្មោះ Yulia បានដួលនៅទីក្រុង Salisbury កាលពីថ្ងៃទី៤ខែមីនាបន្ទាប់ពីបានប៉ះទៅនឹងសារធាតុ Novichok ។ ចាប់តាំងពីពេលនោះមក ពួកគេទាំងពីរបានជាសះស្បើយឡើងវិញ។
បន្ទាប់មកនៅថ្ងៃទី៣០ខែមិថុនា លោក Charlie Rowley និងដៃគូរបស់គាត់ឈ្មោះ Dawn Sturgess បានធ្លាក់ខ្លួនឈឺនៅមិនឆ្ងាយប៉ុន្មានពីកន្លែងវាយប្រហារលើលោក Skripal បន្ទាប់ពីបានប៉ះពាល់ទៅនឹងសារធាតុបំផ្លាញសរសៃប្រសាទដូចគ្នានេះ។ លោក Sturgess បានស្លាប់នៅថ្ងៃទី៨ខែកក្កដា៕ AFP
Source: Kampuchea Thmey Daily
0 Comments