ភ្នំពេញ ៖ រាជរដ្ឋាភិបាលកម្ពុជា បានសម្រេចបង្កើតក្រុមប្រឹក្សាភិបាលពិគ្រោះយោបល់គម្រោងលើកកម្ពស់ស្តង់ដារសុខភាព និងសុវត្ថិភាពនៅក្នុងវិស័យសំណង់នៅកម្ពុជា ដោយមានសមាសភាពមកពីក្រសួងស្ថាប័នពាក់ព័ន្ធជាច្រើន។
យោងតាមសេចក្តីសម្រេចរបស់គណៈកម្មាធិការជាតិសុខភាព និងសុវត្ថិភាពការងារដែលចុះហត្ថលេខាដោយលោកបណ្ឌិតអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈនិងជាប្រធានគណៈកម្មាធិការជាតិសុខភាពនិងសុវត្ថិភាពការងារបានឲ្យដឹងថា ក្រុមប្រឹក្សាភិបាលពិគ្រោះយោបល់គម្រោងលើកកម្ពស់ស្តង់ដារសុខភាព និងសុវត្ថិភាពនៅក្នុងវិស័យសំណង់នៅកម្ពុជានេះ មានលោកហ៊ុយហានសុង រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈធ្វើជាប្រធាន ដោយមានសមាជិកមកពីតាមស្ថាប័នពាក់ព័ន្ធជាច្រើនរួមមានក្រសួងរៀបចំដែនដីនគរូបនីយកម្ម និងសំណង់ ក្រសួងបរិស្ថាន ក្រុមប្រឹក្សាអភិវឌ្ឍកម្ពុជាក្រសួងឧស្សាហកម្ម និងសិប្បកម្ម ក្រសួងសុខាភិបាល ក្រសួងសាធារណការនិងដឹកជញ្ជូន តំណាងភាគីនិយោជក តំណាងសហជីពនិងអង្គការដៃគូផងដែរ។
យោងតាមសេចក្តីសម្រេចដដែលបានឲ្យដឹងទៀតថា ក្រុមប្រឹក្សាភិបាលនេះ មានតួនាទីត្រួតពិនិត្យកម្មវិធី និងពិភាក្សាលទ្ធផលព្រមទាំងមានតួនាទីជាអ្នកគិតគូរដើម្បីគាំទ្រអនុវត្តគម្រោង។ ពិនិត្យឡើងវិញការអនុវត្តគម្រោងអនុម័តលើផែនការការងារ និងធនធានប្រចាំឆ្នាំ និងផ្លាស់ប្ដូរ ឬកែសម្រួលណាមួយបើចាំបាច់។ ប្រមូលផ្តុំការងារស្នួល ឬបុគ្គលដើម្បីសម្របសម្រួលឬធ្វើការយ៉ាងជិតស្និទ្ធជាមួយអង្គការអន្តរជាតិខាងការងារអំពីសកម្មភាពគម្រោង ដែលបានជ្រើសរើស។ ផ្តល់ជាអនុសាសន៍ជាយុទ្ធសាស្ត្រ និងការកែតម្រូវទៅលើបញ្ហាប្រឈម និងបញ្ហាផ្សេងៗដែលកំពុងកើតឡើង។
ជូនដំណឹងទៅអង្គការអន្តរជាតិខាងការងារពីការអភិវឌ្ឍន៍គោលនយោបាយនិងសេចក្តីណែនាំថ្មីៗទាក់ទិននឹងគម្រោង។ លើកកម្ពស់នៃតម្លៃគម្រោងនៅក្នុងបណ្តាញរបស់ខ្លួនដើម្បីស្វែងរកនិងបង្កើតការរួមបញ្ចូលគ្នាជាមួយនឹងគំនិតផ្តួចផ្តើម និងគម្រោងស្រដៀងគ្នាដោយម្ចាស់ជំនួយដទៃទៀត។ភ្ជាប់លទ្ធផលគម្រោងជាមួយនឹងការអភិវឌ្ឍគោលនយោបាយនានាដូចជាការផ្តួចផ្តើមឲ្យមានការសម្របសម្រួលជំហានបន្ទាប់។បង្កើតការគាំទ្រស្ថាប័នសម្របសម្រួល ការទទួលយក ការចំលង និរន្តរភាពនិងយន្តការនានានៃកិច្ចដំណើរការនិងលទ្ធផលទាក់ទងនឹងសកម្មភាពគម្រោង និងធ្វើសកម្មភាពលើបញ្ហាពាក់ព័ន្ធផ្សេងទៀត ដែលកើតឡើងពីការអនុវត្តគម្រោងដែលបានព្រមព្រៀងគ្នាជាស្នួលក្នុងចំណោមសមាជិកស្នូលទាំងអស់។
គួរបញ្ជាក់ថា ក្រុមប្រឹក្សាភិបាលពិគ្រោះយោបល់គម្រោងលើកកម្ពស់ស្តង់ដារសុខភាព និងសុវត្ថិភាពនៅក្នុងវិស័យសំណង់នៅកម្ពុជាមានលេខាធិការដ្ឋានអចិន្ត្រៃយ៍ដែលមានទីតាំងស្ថិតនៅទីស្តីការក្រសួងការងារនិងបណ្តុះបណ្តាលវិជ្ជាជីវៈ៕
Source: Kampuchea Thmey Daily
0 Comments