ភ្នំពេញ ៖ ក្រសួងអប់រំយុវជននិងកីឡាសហការជាមួយវិទ្យាស្ថានវិញ្ញាបនបត្រនៃប្រទេសជប៉ុន នឹងរៀបចំការប្រឡងវាស់ស្ទង់សមត្ថភាពសិស្ស និងគ្រូជំនាញមុខវិជ្ជាគណិតវិទ្យាកម្រិតអន្តរជាតិនាពេលខាងមុខនេះ ដើម្បីប្រៀបធៀបសមត្ថភាពទៅនឹងកម្មវិធីសិក្សានៅក្នុងតំបន់និងអន្តរជាតិ។
ក្រសួងអប់រំយុវជននិងកីឡាបានជំរុញឲ្យសិស្សចាប់ពីថ្នាក់ទី៤ដល់ថ្នាក់ទី១២ និស្សិតសាកលវិទ្យាល័យនិងគ្រូគណិតវិទ្យាចុះឈ្មោះចូលរួមប្រឡងវាស់ស្ទង់សមត្ថភាពគណិតវិទ្យាអន្តរជាតិដែលហៅថា(suken test)នៅចុងខែកញ្ញាខាងមុខដើម្បី វាយតម្លៃចំណេះដឹងភាពស្ទាត់ជំនាញភាពឈ្លាសវៃក្នុងការគណនាលេខនិងការដោះស្រាយចំណោទ។
លោកបណ្ឌិត ច័ន្ទ រ័ត្ន ប្រធានសហគមន៍អ្នកគណិតវិទ្យាកម្ពុជាមានប្រសាសន៍កាលពីថ្ងៃទី១៧ខែកក្កដា ឆ្នាំ២០១៨ថា គឺជាលើកទី១០ហើយ ដែលសហគមន៍អ្នកគណិតវិទ្យាកម្ពុជាបានសហការជាមួយវិទ្យាស្ថានវិញ្ញាបនបត្រនៃប្រទេសជប៉ុនរៀបចំការប្រឡងវាស់ស្ទង់សមត្ថភាពគណិតវិទ្យាអន្តរជាតិដើម្បីវាយតម្លៃកម្មវិធីសិក្សារបស់ក្រសួងអប់រំយុវជននិងកីឡា តើវាសមស្របទៅនឹងកម្មវិធីសិក្សានៅក្នុងតំបន់និងអន្តរជាតិដែរឬយ៉ាងណា។
លោកបណ្ឌិតបានបន្តថា ការប្រឡងវាស់ស្ទង់សមត្ថភាពគណិតវិទ្យាអន្តរជាតិឆ្នាំនេះនឹងប្រព្រឹត្តទៅនៅថ្ងៃទី៣០ ខែកញ្ញា ឆ្នាំ២០១៨ខាងមុខ ដោយចាប់ទទួលពាក្យប្រឡងពីថ្ងៃនេះ រហូតដល់ថ្ងៃទី២០ខែកញ្ញា ដោយបេក្ខជនអាចទៅដាក់ពាក្យប្រឡងបាននៅសាលារៀនជំនាន់ថ្មីនៅក្នុងវិទ្យាល័យព្រះស៊ីសុវត្ថិ ឬអាចចុះឈ្មោះតាមអនឡាញក៏បានដែរ តែបេក្ខជនត្រូវដាក់បង់លុយតាមវីងឬទ្រូម៉ានី។
លោកបណ្ឌិតបានបន្ថែមថាការប្រឡងនេះបេក្ខជនត្រូវបង់ថវិកាមួយចំនួនសម្រាប់ប្រើប្រាស់ទៅលើការរៀបចំការប្រឡង បោះពុម្ពឯកសារ ផ្សព្វផ្សាយព័ត៌មាននិងសម្រាប់មេប្រយោគ។
លោកបណ្ឌិតច័ន្ទ រ័ត្នបានបញ្ជាក់ថា ការប្រឡងវាស់ស្ទង់សមត្ថភាពគណិតវិទ្យាអន្តរជាតិនេះចែកជាពីរផ្នែកគឺផ្នែកវិញ្ញាសាគណនាមានចំនួន៣០លំហាត់និងផ្នែកដោះស្រាយចំណោទចំនួន៧លំហាត់ដែលការប្រឡងមានរយៈពេល៥០នាទីសម្រាប់បេក្ខជនថ្នាក់ទី៤ដល់ទី៦និង៣ម៉ោងសម្រាប់សិស្សថ្នាក់ទី១២និងនិស្សិតសាកលវិទ្យាល័យ ។
លោកបណ្ឌិតបានបន្តទៀតថា បេក្ខជនដែលអាចចូលរួមប្រឡងនេះបានលុះត្រាតែមានចំណេះដឹងស្ទាត់ជំនាញលើភាសាអង់គ្លេសព្រោះថាវិញ្ញាសាប្រឡង ត្រួតពិនិត្យការប្រឡង ការកែវិញ្ញាសានិងចេញវិញ្ញាបនបត្រគឺចេញដោយវិទ្យាស្ថានវិញ្ញាបនបត្រនៃប្រទេសជប៉ុន។ចំណែកខាងក្រសួងជាអ្នករៀបចំការប្រឡងដូចជាចុះឈ្មោះបេ ក្ខជ នរៀបចំឯកសារប្រឡងនិងជ្រើសរើសមេប្រយោគជាដើម។
លោកបណ្ឌិតបានរំលឹកថាការប្រឡងវាស់ស្ទង់សមត្ថភាពគណិតវិទ្យាអន្តរជាតិកន្លងមកបេក្ខជនមានសមត្ថភាពធ្វើបានពី៦០ទៅ៧០ភាគរយទៅលើផ្នែកគណនាខណៈផ្នែកដោះស្រាយចំណោទវិញធ្វើបានត្រឹមតែ២០ទៅ២៥ភាគរយប៉ុណ្ណោះ។
លោកបណ្ឌិតបានឲ្យដឹងថានេះបង្ហាញថាសិស្សនិស្សិតកម្ពុជានៅមានសមត្ថភាពខ្សោយផ្នែកដំណោះស្រាយចំ ណោទដែលទាមទារឲ្យមានការកែសម្រួលកម្មវិធីសិក្សាក៏ដូចជាបង្កើនការបំប៉នដល់គ្រូលើផ្នែកនេះបន្ថែមទៀ តដើម្បីពង្រឹងសមត្ថភាពសិស្សនិស្សិតឲ្យកាន់តែមានសមត្ថភាពខ្ពស់ថែមទៀត។
លោកបណ្ឌិតបានឲ្យដឹងទៀតថា សហគមន៍អ្នគកណិតវិទ្យាកម្ពុជាបានចូលរួមជាមួយក្រសួងអប់រំយុវជននិងកីឡាក្នុងការកែលំអកម្មវិធីសិក្សាផ្នែកគណិតវិទ្យាសំដៅធ្វើយ៉ាងណាឲ្យមានលក្ខណៈទំនើបស្របតាមស្តង់ដារនៅក្នុងតំបន់និងអន្តរជាតិ។
ក្រៅពីនេះលោកបណ្ឌិតបានបន្តឲ្យដឹងទៀតថាសហគមន៍អ្នកគណិតវិទ្យាកម្ពុជាបានចូលរួមបំប៉នដល់គ្រូផ្នែកគណិតវិទ្យាស្តីពីដំណោះស្រាយចំណោទដើម្បីបង្កើនសមត្ថភាពឲ្យបានកាន់តែប្រសើរឡើងដើម្បីឲ្យគាត់ជួយបង្ហាត់បង្រៀនបន្តដល់សិស្ស។
លោកបណ្ឌិត ច័ន្ទ រ័ត្ន បានបញ្ជាក់ទៀតថា សម្រាប់ការប្រឡងវាស់ស្ទង់សមត្ថភាពគណិតវិទ្យាអន្តរជាតិនៅឆ្នាំនេះសហគមន៍អ្នកគណិតវិទ្យាកម្ពុជា នឹងមានរៀបចំជាមេដាយនិងប្រាក់លើកទឹកចិត្តដល់បេក្ខជនដែលទទួលបានពិន្ទុខ្ពស់ជាងគេផងដែរដើម្បីជំរុញឲ្យសិស្សនិស្សិតនិងគ្រូគណិតវិទ្យាកាន់តែខិតខំបង្រៀននិងរៀនសូត្រថែមទៀត៕
Source: Kampuchea Thmey Daily
0 Comments