ភ្នំពេញ ៖ តារាស្រីពហុជំនាញអ្នកនាង ខាត់ សុឃីម ថ្មីៗនេះ មានសារព័ត៌មានក្នុងស្រុកមួយចំនួនបានចាប់អារម្មណ៍ងាកមកសរសេរចុះផ្សាយពីរឿងរ៉ាវជីវិតឯកជនក្រៅរង្វង់សិល្បៈរបស់នាងទាក់ទងទៅនឹងភាពហ៊ឺហាជាមួយការទម្លាយអំពីការមានបានរបស់តារាស្រីរូបនេះបង្កការចាប់អារម្មណ៍ខ្លាំងសម្រាប់មហាជន។
សំណេរ ដែលបានត្រូវបានសារព័ត៌មានចុះផ្សាយអំពីជីវិតឯកជនរបស់តារាស្រីអ្នក នាង ខាត់ សុឃីម គឺភាគច្រើនផ្តោតសំខាន់លើទីតាំងដី និងផ្ទះរបស់តារាស្រីរូបនេះ ដែលកំពុងតែកើតមាននៅពេលបច្ចុប្បន្ន។ ក្នុងនោះក៏មានការបង្ហើបត្រួសៗថា គិតមកទល់ពេលសព្វថ្ងៃអ្នកនាង ខាត់ សុឃីម មានលទ្ធភាពគ្រប់គ្រងធ្វើជាម្ចាស់កម្មសិទ្ធិដី និងផ្ទះមានរហូតដល់ទៅជាង១០កន្លែងឯណោះ។
ស្របពេលគ្នានៃការចេញផ្សាយនេះដែរសាមីខ្លួនអ្នកនាងខាត់ សុឃីមក៏បានចេញមុខហាក់មានចេតនាទទួលស្គាល់ការពិតថា អ្វីដែលនាងកំពុងមានបានឬរបស់ដែលជាកម្មសិទ្ធិចេញពីកម្លាំងញើសឈាមខ្លួនគឺនាងមិនខ្លាចក្នុងការបញ្ចេញនោះឡើយ ប៉ុន្តែវាក៏ពុំមែនជាការអួតអាងដើម្បីឲ្យទស្សនិកជនមើលមកខ្លួនថាអស្ចារ្យនោះដែរ។
អ្នកនាង ខាត់ សុឃីមបានបញ្ជាក់ថា ខ្ញុំមិនគិតថាអួតអីទេ ព្រោះមិនបានអ្វីមកវិញទេ ស្របពេលនេះ(តម្លៃសិល្បៈខ្មែរធ្លាក់ចុះដល់បាតដីទៅហើយ)។ សូមអរគុណដល់មហាមិត្ត បើចិត្តបានអាណិតខ្ញុំជួយជួលផ្ទះ និងជួយទិញដីខ្ញុំដែលប្រកាសដាក់លក់នឹងជួលផង។
សូមបញ្ជាក់ថាអ្នកនាង ខាត់ សុឃីម គឺជាតារាស្រីដែលត្រូវបានមហាជនផ្តល់ងារជាតារាពហុជំនាញដោយហេតុថា បច្ចុប្បន្ននាងមិនត្រឹមតែមានសមត្ថភាពលើវិស័យសិល្បៈបែបសម័យនោះទេគឺថែមទាំងមានជំនាញផ្នែកចម្រៀងបុរាណ និង អាចបញ្ចេញសមត្ថភាពលើគ្រប់ទម្រង់នៃសិល្បៈរបស់ខ្មែរទៀតផង៕
Source: Kampuchea Thmey Daily
0 Comments