ភ្នំពេញ ៖ លោក វ៉ាង យ៉ាង ប្រធានសភាប្រឹក្សានយោបាយប្រជាជនចិននៃសាធារណរដ្ឋប្រជាមានិតចិន បានផ្ញើលិខិតមួយច្បាប់ ចុះថ្ងៃទី១៩ ខែកក្កដា ឆ្នាំ២០១៨ អបអរសាទរចំពោះសម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា ក្នុងឱកាសខួបអនុស្សាវរីយ៍លើកទី៦០ នៃការបង្កើតទំនាក់ទំនងការទូត រវាងព្រះរាជាណាចក្រកម្ពុជា។
លិខិតលោក វ៉ាង យ៉ាង បានលើកឡើងថា “តាងនាមឲ្យគណៈកម្មាធិការជាតិនៃសភាប្រឹក្សានយោបាយប្រជាជនចិន និងក្នុងនាមខ្ញុំផ្ទាល់ ខ្ញុំសូមសម្តែងការអបអរសាទរយ៉ាងកក់ក្តៅ និងប្រសិទ្ធពរបវរមហាប្រសើរជូនចំពោះ សម្តេច និងតាមរយៈសម្តេច ជូនចំពោះព្រឹទ្ធសភានៃព្រះរាជាណាចក្រកម្ពុជា និងប្រជាជនកម្ពុជា ក្នុងឱកាសខួបអនុស្សាវរីយ៍លើកទី៦០ នៃការបង្កើតទំនាក់ទំនងការទូតរវាងសាធារណរដ្ឋប្រជាមានិតចិន និងព្រះរាជាណាចក្រកម្ពុជា។
តាមលោក វ៉ាង យ៉ាង ក្នុងរយៈពេល៦០ឆ្នាំ កន្លងមក ចាប់តាំងពីការបង្កើតទំនាក់ទំនងការទូតរបស់យើង ទំនាក់ទំនងចិន និងកម្ពុជា មានការរីកចម្រើនយ៉ាងឆាប់រហ័ស។ គណៈកម្មាធិការជាតិនៃសភាប្រឹក្សានយោបាយប្រជាជនចិន បានធ្វើការផ្លាស់ប្តូរយ៉ាងជិតស្និទ្ធជាមួយនឹងព្រឹទ្ធសភា នៃព្រះរាជាណាចក្រកម្ពុជា ដែលកំពុងដើរតួនាទីដ៏សំខាន់ក្នុងការពង្រឹង និងជំរុញមិត្តភាព ចិន និងកម្ពុជា។ គណៈកម្មាធិការជាតិនៃសភាប្រឹក្សានយោបាយប្រជាជនចិន ចង់ធ្វើការរួមគ្នាជាមួយកម្ពុជា ដើម្បីរួមចំណែកជាវិជ្ជមានដល់ការពង្រឹងសាមគ្គីភាពក្នុងគ្រប់មជ្ឈដ្ឋាន និងលើកកម្ពស់ ការអភិវឌ្ឍនៃកិច្ចសហប្រតិបត្តិការក្នុងភាពជាដៃគូយុទ្ធសាស្ត្រគ្រប់ជ្រុងជ្រោយចិន-កម្ពុជា។
ជាមួយគ្នានោះ លោក វ៉ាង យ៉ាង ប្រធានសភាប្រឹក្សានយោបាយប្រជាជនចិននៃសាធារណរដ្ឋប្រជាមានិតចិន បានសូមឲ្យទំនាក់ទំនងចិន និងកម្ពុជា នៅឋិតថេរគង់វង្សជាដរាប និងបានជូនពរឲ្យប្រជាជាតិ និងប្រជាជនកម្ពុជា បានប្រកបដោយសន្តិភាព ការអភិវឌ្ឍ និងវិបុលភាព៕
Source: Kampuchea Thmey Daily
0 Comments