ស្ទឹងត្រែង ៖ ក្នុងពិធីចែកទោចក្រយានយន្តជូនដល់មន្ត្រីនគរបាលប៉ុស្តិ៍រដ្ឋបាលនៅស្នងការដ្ឋាននគរបាលខេត្តស្ទឹងត្រែង នាថ្ងៃទី២០ ខែកក្កដា ឆ្នាំ២០១៨នេះ អាជ្ញាធរស្ទឹងត្រែង បានក្រើនរំលឹកឱ្យកម្លាំងនគរបាល ប៉ុស្តិ៍រដ្ឋបាលប្រឹងប្រែងបន្ថែមទៀតក្នុងការ បំពេញភារកិច្ចឲ្យបានខ្ជាប់ខ្ជួន បម្រើប្រជាពលរដ្ឋនៅតាមមូលដ្ឋាន ហើយនៅតាមប៉ុស្តិ៍រដ្ឋបាលនីមួយៗ ត្រូវបង្កើនស្នាដៃ ធ្វើជាគំរូល្អ ក្នុងចលនាប្រឡងប្រណាំងភូមិឃុំមានសុវត្ថិភាព។
លោកម៉ុមសារឿន អភិបាលខេត្តស្ទឹងត្រែង មានប្រសាសន៍ថា ៖ កម្លាំង នគរបាលប៉ុស្តិ៍រដ្ឋបាលទទួលបានទោចក្រយានយន្ត ត្រូវពង្រឹងសមត្ថភាពជំនាញអនុវត្តការងារទប់ស្កាត់-បង្ការ-និងបង្ក្រាបបទល្មើសឲ្យមានប្រសិទ្ធភាពដើម្បីរក្សាសន្តិសុខសុវត្ថិភាពស្ថិរភាពជូន ប្រជាពលរដ្ឋ នៅតាមមូលដ្ឋានរបស់ខ្លួន។
លោកអភិបាលខេត្តបន្ថែមថា ៖ ទន្ទឹមនឹងការខិតខំបំពេញការងារជំនាញក៏ត្រូវបង្កើនកិច្ចសហការគ្នាឱ្យបានល្អប្រសើរជាមួយអាជ្ញាធរមូលដ្ឋានបំពេញកាតព្វកិច្ចរបស់ខ្លួនប្រកបដោយតម្លាភាព និងប្រសិទ្ធភាពដើម្បីបង្កើតឲ្យមានវប្បធម៌គុណភាពធានាដល់កិច្ចការងារការពារសន្តិសុខនៅក្នុងសង្គមជូនប្រជាពលរដ្ឋ។
លោកឧត្តមសេនីយ៍ទោម៉ៅតារាស្នងការនគរបាលខេត្ត មានប្រសាសន៍ថា ៖ ដើម្បីឲ្យឆ្លើយតបទៅនិងតម្រូវការចាំបាច់ក្នុងការបម្រើប្រជាពលរដ្ឋយើងនេះ កម្លាំងនគរបាលប៉ុស្តិ៍រដ្ឋបាលនៅតាមឃុំសង្កាត់ទាំង៣៤ថ្ងៃនេះ ទទួលបានម៉ូតូមួយគ្រឿងបន្ថែមទៀត បន្ទាប់ពីកន្លងមកយើងមានចំនួន៣គ្រឿងរួចមកហើយនៅតាមប៉ុស្តិ៍នីមួយៗ។
លោកស្នងការបញ្ជាក់ថា ៖ ចាប់ពីឆ្នាំ២០១៨នេះទៅ នៅតាមប៉ុស្តិ៍រដ្ឋបាលនីមួយៗ នឹងទទួលបានប្រេងសម្រាប់ប្រើប្រាស់ចំនួន១២០លីត្រ និងថវិកា១២សែនរៀលផងដែរ ក្នុងមួយត្រីមាស សម្រាប់ចំណាយបំពេញការងារប្រចាំខែ។
លោកអនុសេនីយ៍ឯកនូ សុខុម នាយនគរបាលប៉ុស្តិ៍រដ្ឋបាលឃុំថាឡា ស្រុកថាឡាបរិវ៉ាត់ បានទទួលស្គាល់ថា ៖ មធ្យោបាយនេះ ពិតជាបានជួយសម្រួលដល់មន្ត្រីនគរបាល យើងទាំងអស់បំពេញកិច្ចការងារបានលឿន ឆាប់រហ័ស និងមានសមត្ថភាពរឹងមាំ ស្របតាមគោលការណ៍របស់រាជរដ្ឋាភិបាលក្នុងការកំណែទម្រង់កងកម្លាំងនគរបាលជាតិតាមការអភិវឌ្ឍរីកចម្រើនរបស់ប្រទេសជាតិពេលបច្ចុប្បន្ននេះ។
លោកមន្ថែមថាៈ ដើម្បីប្រសិទ្ធភាពលើការងារនេះ តំណាងឲ្យនគរបាលប៉ុស្តិ៍រដ្ឋបាលទាំងអស់ និងខិតខំព្យាយាមបំពេញតួនាទីរបស់ខ្លួន-ការគោរពវិន័យ-មានអត្តចរិតសីលធម៌ល្អ-មានជំនាញ-និងចេះផ្តល់ការអប់រំដល់ប្រជាពលរដ្ឋ និងបម្រើប្រជាពលរដ្ឋឲ្យមានប្រសិទ្ធភាព និងប្រសិទ្ធផល។
សូមបញ្ជាក់ថា ៖ នេះជាទិសដៅរបស់ក្រសួងមហាផ្ទៃក្នុងការពង្រឹងកងកម្លាំងប្រដាប់អាវុធរបស់រាជរដ្ឋាភិបាល ដែលបានដាក់ចេញនៅផែនការយុទ្ធសាស្ត្ររយៈពេល៥ឆ្នាំ២០១៥-២០១៩ ធ្វើឲ្យសង្គមមានសន្តិសុខល្អជាពិសេសបំពេញបន្ថែមនូវគ្រប់មធ្យោបាយដើម្បីបម្រើប្រជាពលរដ្ឋ និងធ្វើឱ្យភូមិឃុំកាន់តែមានសុវត្ថិភាព៕
Source: Kampuchea Thmey Daily
0 Comments