បាត់ដំបង ៖ ជនរងគ្រោះម្នាក់ ត្រូវបានប្រជាពលរដ្ឋ រួមនឹងសមត្ថកិច្ច ដឹកបញ្ជូនទៅកាន់មន្ទីរពេទ្យបង្អែកស្រុកសំពៅលូន ដើម្បីសង្គ្រោះ បន្ទាប់ពីជនរងគ្រោះរូបនេះត្រូវបានឪពុកចុង វាយនឹងខ្នងពូថៅ ជាច្រើនដងទៅលើក្បាល និងផ្ទៃមុខ ក្នុងបំណងប៉ុនប៉ងមនុស្សឃាតដោយចេតនា ដោយសារទំនាស់ពាក្យសម្តី។
យោងតាមរបាយការណ៍របស់សមត្ថកិច្ចមូលដ្ឋានបានអោយដឹងថា ហេតុការណ៍នេះបានកើតឡើងកាលពីវេលាម៉ោង ១០ និង ៣០ នាទី យប់ ថ្ងៃទី ១៩ ខែ កក្កដា ឆ្នាំ២០១៨ ត្រង់ចំណុចភូមិអូរគ្រួស ឃុំសិរីមានជ័យ ស្រុកសំពៅលូន ខេត្តបាត់ដំបងរវាងកូនប្រុស និង ឪពុកចុង។
បើតាមការរៀបរាប់ពីជនរងគ្រោះឈ្មោះ វឹង វល់ ហៅ បារាំង ភេទប្រុស អាយុ២៧ឆ្នាំ រស់នៅត្រង់ចំណុចកើតហេតុខាងលើ បាននិយាយថា ការទាស់ពាក្យសម្តីរវាងខ្លួន ជាមួយនឹងឪពុកចុង ឬក៏ត្រូវជាពូ ដែលមានឈ្មោះ នួន សឿន ភេទប្រុស អាយុ៤៨ឆ្នាំ មុខរបរធ្វើចំការ គឺបានកើតឡើងជាច្រើនលើក ច្រើនសារួចមកហើយ ដោយសារតែពេលដែលគាត់ស្រវឹង គឺគាត់តែងតែចោទប្រកាន់មកលើខ្លួនថា បានទៅលួចដោះយកសត្វពស់ ដែលគាត់ដាក់មងបាន។
ជនរងគ្រោះបានបន្តថា ធាតុពិតគឺខ្លួនមិនដែលទៅលួចពស់របស់គាត់ឡើយ ប៉ុន្តែគាត់នៅតែចោទដដែលៗ។ លុះនៅមុនពេលកើតហេតុ គឺគាត់មកពីផឹកវិញ ក៏បានចាប់ផ្តើមរករឿងទៀត ឯខ្លួនក៏បានប្រកែកទៅវិញទៅមក ស្រាប់តែគាត់បានលបទាញពូថៅមកវ៉ៃមកលើក្បាល និងផ្ទៃមុខរបស់ខ្លួន ជាច្រើនកន្លែងរហូតដល់សន្លប់ លែងដឹងខ្លួន។
ដោយឡែកសម្រាប់សាក្សីមួយចំនួន ដែលរស់នៅក្នុងភូមិ ឃុំកើតហេតុខាងលើ ក៏បាននិយាយថា ពេលដែលជនសង្ស័យបានយកពូថៅវ៉ៃទៅលើជនរងគ្រោះនោះ គឺបាន បាក់ដងអស់មួយ ប៉ុន្តែដោយសារមិនអស់ចិត្តទើបស្ទុះទៅទាញពូថៅមួយទៀត មកវ៉ៃបន្ថែមរួចក៏រត់គេចខ្លួនបាត់ស្រមោលទាំងយប់តែម្តង ដោយសារតែមានប្រជាពលរដ្ឋជាច្រើនបម្រុងចូលជួយ ព្រមទាំងមានការស្រែកអោយជួយពីសំណាក់ស្ត្រីជាភរិយា ដែលកំពុងពកូនមួយនៅនឹងដៃផង។
បច្ចុប្បន្ន ជនរងគ្រោះត្រូវបានក្រុមគ្រួសាបញ្ជូនទៅព្យាបាលនៅមន្ទីរពេទ្យបង្អែកស្រុកសំពៅលូន ដោយឡែកជនសង្ស័យក៏ត្រូវបានកម្លាំងសមត្ថកិច្ចទាំង២ស្ថាប័ន តាមប្រមាញ់ និងស្រាវជ្រាវដើម្បីចាប់ខ្លួនយកមកផ្តន្ទាទោសតាមផ្លូវច្បាប់ ពាក់ព័ន្ធនឹងករណីប៉ុនប៉ងមនុស្សឃាតដោយចេតនា៕
Source: Kampuchea Thmey Daily
0 Comments