ប្រធានាធិបតីអាមេរិកលោក Donald Trump ដែលកំពុងស្ថិតក្រោមការរិះគន់ ដោយសារជំនួបកំពូលនៅទីក្រុង ហេលស៊ីនគី ជាមួយលោក Vladimir Putin បាននិយាយថា គាត់កំពុងទន្ទឹងរង់ចាំដើម្បីជួបមេដឹកនាំរុស្ស៊ីរូបនេះជាថ្មីម្តងទៀត ខណៈដែលកិច្ចពិភាក្សាកំពុងដំណើរការរួចទៅហើយ សម្រាប់ដំណើរទស្សនកិច្ចមួយទៅកាន់ទីក្រុងវ៉ាស៊ីនតោន។
លោក Trump បានទទួលការរិះគន់ទាំងពីគណបក្សសាធារណរដ្ឋនិងប្រជាធិបតេយ្យចំពោះអ្វីដែលមនុស្សជាច្រើនមើលឃើញថាជាការឱបក្រសោបរបស់គាត់ចំពោះបុរសខ្លាំងរុស្ស៊ីនៅសប្តាហ៍នេះហើយហាក់ដូចជាមិនយល់ស្របចំពោះភ្នាក់ងារស៊ើបការណ៍ផ្ទាល់ខ្លួនរបស់គាត់និងការវាយតម្លៃរបស់ពួកគេដែលថា ក្រុងមូស្គូបានជ្រៀតជ្រែកក្នុងការបោះឆ្នោតឆ្នាំ២០១៦។
ប្រតិកម្មប្រឆាំងបានធ្វើឲ្យលោក Trump ចេញមុខមកការពារដោយមានសេចក្តីថ្លែងការប៉ុន្មានថ្ងៃទាំងពីលោកប្រធានាធិបតីនិងពីសេតវិមាន។
ប៉ុន្តែលោក Trump បានវាយបកទៅកាន់ការរិះគន់ទាំងនោះវិញនិងកំណត់គោលដៅទៅលើ “ប្រព័ន្ធផ្សព្វផ្សាយព័ត៌មានក្លែងក្លាយ” ដែលមិនបានទទួលស្គាល់សមិទ្ធផលរបស់គាត់។
លោក Trump បាននិយាយនៅលើ Twitter ថា “កិច្ចប្រជុំកំពូលជាមួយរុស្ស៊ីគឺជាជោគជ័យដ៏អស្ចារ្យមួយលើកលែងតែសត្រូវពិតប្រាកដរបស់ប្រជាជនគឺព័ត៌មានក្លែងក្លាយប៉ុណ្ណោះ។ ព័ត៌មានក្លែងក្លាយចង់ឃើញការប្រឈមមុខគ្នាដ៏ធំមួយជាមួយប្រទេសរុស្ស៊ីសូម្បីតែការប្រឈមមុខគ្នាមួយដែលអាចនាំទៅដល់សង្គ្រាមក៏ដោយ”។
ទន្ទឹមនឹងនេះដែរ រដ្ឋមន្ត្រីក្រសួងការបរទេសលោក Mike Pompeo បាននិយាយថា គោលដៅរបស់លោក Trump គឺ “បង្វែរទិសដៅនៃប្រទេសទាំងពីរវិញដែលកំពុងដើរលើផ្លូវអាក្រក់”។
នៅក្នុងបទសម្ភាសន៍ជាមួយស្ថានីយទូរទស្សន៍ CNBC លោក Trump បាននិយាយថា “ការរួមគ្នាជាមួយលោកប្រធានាធិបតី Putin, ការរួមគ្នាជាមួយរុស្ស៊ីគឺមានភាពវិជ្ជមានមិនមែនជាអវិជ្ជមានទេ”។ លោក Trump បានថ្លែងថា “ខ្ញុំទន្ទឹងរង់ចាំកិច្ចប្រជុំជាលើកទីពីររបស់យើងដូច្នេះយើងអាចចាប់ផ្តើមអនុវត្តនូវរឿងរ៉ាវជាច្រើនដែលបានពិភាក្សា”។
អ្នកនាំពាក្យសេតវិមានលោកស្រី Sarah Sanders បាននិយាយថា កិច្ចប្រជុំនេះអាចនឹងធ្វើឡើងនៅខែកញ្ញា។
មេដឹកនាំទាំងពីរបានធ្វើកិច្ចពិភាក្សាបិទទ្វាររយៈពេលពីរម៉ោងដោយគ្មានវត្តមាននរណាម្នាក់ផ្សេងទៀតទេប៉ុន្តែមានអ្នកបកប្រែរៀងៗខ្លួនកាលពីថ្ងៃចន្ទ៕ AFP
Source: Kampuchea Thmey Daily
0 Comments