ភ្នំពេញ ៖ តាមរយៈការបង្ហោះ និងស៊ែរចែករំលែកនូវវីដេអូមានរយៈពេលជិត២នាទី បង្ហាញឲ្យឃើញពីសកម្មភាពរបស់លោកតាវ័យចំណាក់ម្នាក់ ដែលពិការភ្នែកប្រកបរបរស៊ីឈ្នួលសកដូងឲ្យគេគួរអាណិតនោះ តារាស្រីអ្នកនាងទូច ស្រីល័ក្ខ បានបង្ហាញពីក្តីអាណិតអាសូរ និងថែមទាំងប្រកាសស្វែងរកអត្តសញ្ញាណ ឬទីលំនៅរបស់លោកតាម្នាក់នេះដើម្បីជួយជាថវិកាគាត់។
នៅក្នុងឃ្លីបវីដេអូនេះ បានបង្ហាញឲ្យឃើញពីលោកតាវ័យចំណាស់ម្នាក់ ដែលមានជីវភាពខ្វះខាត និងស្ថិតក្នុងសភាពពិការភ្នែកទាំងសងខាង ដោយប្រកបរបរស៊ីឈ្នួលសកដូង ខណៈមានមហាជនជាច្រើនកំពុងអាណិតអាសូរនិងថែមទាំងសួរនាំរកទីកន្លែងរស់នៅរបស់គាត់ផងនោះ។ ប៉ុន្តែគិតមកទល់ពេលនេះគេពុំទាន់ទទួលបានព័ត៌មានពិតពីលោកតារូបនោះនៅឡើយទេ។
ជាក់ស្តែងអ្នកនាង ទូច ស្រីល័ក្ខ បានសរសេរបង្ហោះភ្ជាប់នឹងរូបភាពរួមទាំងវីដេអូនោះថា បងប្អូនណាខ្លះដឹងថា លោកតាគាត់រស់នៅទីណាអត់ ខ្ញុំចង់យកថវិកាផ្ទាល់ខ្លួនរបស់ខ្ញុំយកទៅជូនលោកកក្ដា ទោះបីតិចក្តីតែជាអ្វីដែរចៅចង់ជូនលោកតាព្រមទាំងគ្រឿងបរិភោគនិងសម្ភារៈបន្តិចបន្តួច។
បន្ទាប់ពីឃើញនូវសកម្មភាពរបស់លោកតាកំសត់ខាងលើនេះមានទស្សនិកជនជាច្រើនកំពុងតែបន្តការចែករំលែកព័ត៌មានយ៉ាងព្រោងព្រាតនៅលើបណ្តាញសង្គម។ មិនតែប៉ុណ្ណោះក៏មានការបញ្ចេញមតិផ្ទុយគ្នាដោយមានខ្លះបាននិយាយថា លោកតាវ័យចំណាស់រូបនេះបច្ចុប្បន្នពុំមែនជនជាតិខ្មែរនិងរស់នៅស្រុកខ្មែរនោះឡើយពោលគឺគាត់រស់នៅឯបរទេស។
ថ្វីត្បិតតែយ៉ាងនេះក៏ពិតមែន គិតមកទល់ពេលនេះ គេពុំទាន់ដឹងច្បាស់ពីអត្តសញ្ញាណ ឬទីកន្លែងពិតប្រាកដរបស់លោកតាម្នាក់នេះនៅឡើយទេថា គាត់ជាជនជាតិខ្មែរ រស់នៅស្រុកខ្មែរ ឬមួយជាវីដេអូបញ្ចេញមកពីប្រទេសណាមួយនៅឡើយ។ ខណៈកំពុងមានការចែករំលែក និងប្រកាសស្វែងរកអំពីព័ត៌មានផ្លូវការរបស់លោកតាម្នាក់នោះផងដែរ៕
Source: Kampuchea Thmey Daily
0 Comments