បន្ទាយមានជ័យ ៖ លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានប្រាប់អ្នកយកព័ត៌មានឲ្យដឹងថា ក្រោយទទួលបានព័ត៌មានស្តីពីជនសង្ស័យ១ក្រុមកំពុងនាំគ្នាលួចជក់និងលក់គ្រឿងញៀនយ៉ាងសកម្មមានតាំងពីជនជាតិវៀតណាម ថៃ ទៀតលោកបានដឹកនាំកម្លាំងចុះប្រតិបត្តិការបង្ក្រាបភ្លាមៗនៅនឹងកន្លែងតែម្តងបាននៅវេលាម៉ោង ១រសៀល ថ្ងៃទី១៧ ខែកក្កដា ឆ្នាំ២០១៨ នៅចំណុចបន្ទប់ជួលលេខ ២២៩ ក្នុងកាស៊ីណូក្រោនរីសត ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កម្លាំងអាវុធហត្ថាដកហូតវត្ថុតាងរួមមានគ្រឿងញៀនមេតំហ្វេតាមីន ទឹកកក ចំនួន ២៣ថង់ ស្មើ ១១.៦៣ក្រាម គ្រឿងញៀនមេតំហ្វេតាមីនគ្រាប់ ចំនួន ៩គ្រាប់ គ្រឿងញៀនអ៊ិចស្តាស៊ី ចំនួន ២គ្រាប់ ទូរស័ព្ទដៃចំនួន ១៦គ្រឿង នាឡិកាដៃ ចំនួន ៥គ្រឿង អត្តសញ្ញាណប័ណ្ណសញ្ជាតិខ្មែរ ចំនួន ២សន្លឹក កាបូបលុយ ចំនួន ៣ខ្សែកលោហធាតុពណ៌លឿង ចំនួន ២ខ្សែ ចិញ្ចៀនលោហធាតុពណ៌លឿង ចំនួន ២វង់ ក្រវិល ពណ៌ប្រាក់ ចំនួន ១គូ ក្រវិលឆាណែលពណ៌លឿង ដាំត្បូង ចំនួន ១គូ បង្កាន់ដៃបញ្ចាំ ចំនួន ១សន្លឹក បង្កាន់ដៃបង់អាករជនអន្តោប្រវេសន៍ ចំនួន ៤សន្លឹក បង្កាន់ដៃទទួលពាក្យសុំចុះឈ្មោះជនអន្តោប្រវេសន៍ ចំនួន ២សន្លឹក បារីអេឡិចត្រូនិច ចំនួន ២គ្រឿង ប័ណ្ណផ្ញើឥវ៉ាន់ ចំនួន ១សន្លឹក។
ក្រោយពីឃាត់ខ្លួនហើយជនសង្ស័យទាំង៩នាក់ និង វត្ថុតាងបានបញ្ជូនមកទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្តតាមនីតិវិធី។
លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្ត ទទួលការងារប្រយុទ្ធប្រឆាំងគ្រឿងញៀនដោយបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យបានប្រាប់អ្នកយកព័ត៌មានឲ្យដឹងថា ជនសង្ស័យទាំង៩នាក់មាន១ឈ្មោះ ង្វៀង ឌិនញឹក ភេទប្រុស អាយុ៤៨ឆ្នាំ ជនជាតិវៀតណាម មុខរបរ រកស៊ីចងការប្រាក់ ស្នាក់នៅបន្ទប់ជួលលេខ ២២៩ ក្នុងកាស៊ីណូក្រោនរីសត ២ឈ្មោះ ផាន់ ស៊ីណា ភេទ ស្រី អាយុ ៣០ឆ្នាំ មុខរបរមិនពិតប្រាកដ ស្នាក់នៅបន្ទប់ជួល ៣ឈ្មោះ សយ សុខឃឿន ភេទស្រី អាយុ ៤២ឆ្នាំ មុខរបរ ស៊ីឈ្នួលបោកអ៊ុត ៤ឈ្មោះ អុល រ៉ូម៉ាកូឡាប ភេទ ស្រី អាយុ ៣០ឆ្នាំ ជនជាតិថៃ មុខរបរ មិនពិតប្រាកដ ទីលំនៅ ស្រុកអារញ្ញ ខេត្តស្រះកែវ ប្រទេសថៃ ៥ឈ្មោះ ស៊ឹម ពៅ ភេទ ប្រុស អាយុ ២៥ឆ្នាំ មុខរបរ កម្មករ ៦ឈ្មោះ ឈួន សុក្រជាតិ ភេទ ប្រុស អាយុ ៣៣ឆ្នាំ មុខរបរ លក់ទូរស័ព្ទ ៧ឈ្មោះ ជា សុខា ភេទ ប្រុស អាយុ ៣៤ឆ្នាំ មុខរបរ មិនពិតប្រាកដ ៨ឈ្មោះ ផូ សុភ័ក្រ ភេទ ប្រុស អាយុ ៣៣ឆ្នាំ មុខរបរ លក់កាបូប ៩ឈ្មោះ អាយ ចិន្ត្រា ភេទ ប្រុស អាយុ ៤១ឆ្នាំ មុខរបរ មិនពិតប្រាកដ ខ្មែរទាំង៧នាក់ស្នាក់នៅភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ឯក ស ប៊ុនសឿង បានបញ្ជាក់ឲ្យដឹងទៀតថា ផ្អែកលើចម្លើយសារភាពរបស់ជនសង្ស័យ យោងតាមរបាយការណ៍របស់មូលដ្ឋានកងរាជអាវុធហត្ថក្រុងប៉ោយប៉ែត យោងលើការធ្វើតេស្តលើសារធាតុញៀន និងទឹកនោម ជនសង្ស័យខាងលើ អាចត្រូវចោទពីបទរក្សាទុកញៀនដោយខុសច្បាប់ កម្លាំងជំនាញបានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ទៅតុលាការ ដើម្បីចាត់ការទៅតាមនីតិវិធីច្បាប់៕
Source: Kampuchea Thmey Daily
0 Comments