ភ្នំពេញ ៖ យោងតាមប្រភពព័ត៌មាន ពីមន្ត្រីនគរបាលខណ្ឌច្បារអំពៅបាននិយាយប្រាប់កម្ពុជាថ្មីនៅព្រឹកថ្ងៃទី១៩ ខែកក្កដានេះថា នគរបាលកំពុងវិលមុខនិយាយមិនចេញហើយក៏មិនដែលជួបប្រទះព្រោះតែនគរបាលអនុវត្តន៍តាមដីកាបង្គាប់ឲ្យចាប់ខ្លួនមុខសញ្ញាម្នាក់ ប៉ុន្តែពេលដែលសមត្ថកិច្ចចាប់បានរួចបញ្ជូនទៅតុលាការតែពេលទៅដល់តុលាការបែជាបាត់សំណុំរឿង។
មន្ត្រីនគរបាលបានរៀបរាប់ថា កាលពីថ្ងៃទី១៥ខែកក្កដានេះនគរបាលខណ្ឌច្បារអំពៅបានចាប់ខ្លួនបុរសម្នាក់ឈ្មោះ ម៉ាត់ ឡេះ អាយុ៣២ឆ្នាំ ជាខ្មែរឥស្លាមមានទីលំនៅភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ ដោយនគរបាលអនុវត្តិន៍តាមដីកាបង្គាប់ឲ្យចាប់ខ្លួនចេញដោយលោកចាន់ ម៉ាឌីណា ចៅក្រមស៊ើបសាលាដំបូងរាជធានីភ្នំពេញលេខ៦០ត ព្រ ចុះថ្ងៃទី២១ខែមករាឆ្នាំ២០១០ពាក់ព័ន្ធករណីបង្ករបួសស្នាមជាបទល្មើសព្រហ្មទណ្ឌ ដែលមានចែងឲ្យផ្តន្ទាទោសតាមមាត្រា៤១នៃច្បាប់ព្រហ្មទណ្ឌអន្តរកាល។
តាមប្រវត្តិរឿងគឺជនសង្ស័យបានប្រព្រឹត្តិធ្វើឡើងនៅថ្ងៃទី៩ ខែមេសា ឆ្នាំ២០០៩ នៅក្រោយវត្តព្រែកប្រាស្ថិតនៅភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ ហើយពេលបង្កហេតុរួចជនសង្ស័យខាងលើបានគេចខ្លួនរហូតដល់ថ្ងៃទី១៥ ខែកក្កដា ឆ្នាំ២០១៨ ទើបចាប់បានដែលគិតទៅអស់ពេល១០ឆ្នាំមកហើយ។
មន្ត្រីនគរបាលដែលបញ្ជូនជនសង្ស័យទៅតុលាការបាននិយាយទៀតថា ចាប់តាំងពីថ្ងៃទី១៥រហូតមកដល់ថ្ងៃទី១៩នេះ គឺនគរបាលបានត្រឹមដឹកជនសង្ស័យពីអធិការដ្ឋានខណ្ឌទៅតុលាការទៅមកដោយពុំទាន់ចាត់ការទៅតាមនីតិវិធីច្បាប់នៅឡើយទេ ព្រោះមន្ត្រីតុលាការរកសំណុំរឿងបទល្មើសមិនទាន់ឃើញហើយមិនដឹងថា សំណុំរឿងនឹងទៅដល់ណាទេ ព្រោះអស់ពេល១០ឆ្នាំមកហើយ៕
Source: Kampuchea Thmey Daily
0 Comments