បន្ទាយមានជ័យ ៖ លោក សែម សុខា តំណាង របស់លោកអូស្មាន ហាស្សាន់ បានបន្ដដឹកនាំ គណៈចលនាសាសនិកឥស្លាម ចុះយុទ្ធនាការ ឃោសនារកសំឡេងឆ្នោត ជូនគណបក្សប្រជាជនកម្ពុជា នៅមូលដ្ឋាន ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ បានប្រកាសថា ពួកគាត់នឹងមិនផ្លាស់ប្តូរយកសង្គ្រាម ជំនួសឲ្យសុខសន្តិភាពរបស់កម្ពុជា ដែលមានសព្វថ្ងៃនេះឡើយ។
ពួកគាត់ប្តេជ្ញាចិត្ដបន្តថា ការគាំទ្រគណបក្សប្រជាជនកម្ពុជា ដើម្បីរក្សាឲ្យបាននូវ សុខសន្តិភាព ស្ថិរភាព ដោយសុខដុមរមនា តាមរយៈការផ្ដល់សន្លឹកឆ្នោត ជូនគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធាន ដើម្បីបន្តការអភិវឌ្ឍ របស់ប្រទេសបន្តទៀត។
ការអះអាង និងប្រកាសជំហររបស់ ថ្នាក់ដឹកនាំ សកម្មជន និង ប្រជាពលរដ្ឋនៅឃុំឫស្សីក្រោក ស្រុកមង្គលបូរី ខេត្តបន្ទាយ មានជ័យ បានធ្វើឡើង ក្នុងឱកាសដែល លោក សែម សុខា សមាជិកអចិន្ត្រៃយ៍ គណៈចលនាសាសនិកឥស្លាម របស់គណ បក្សប្រជាជនកម្ពុជា តំណាងដ៏ខ្ពង់ខ្ពស់ លោក អូស្មាន ហាស្សាន់ ប្រធានគណៈចលនាសាសនិកឥស្លាម ដែលបានអញ្ជើញសំណេះសំណាល និង ឃោសនារកសំឡេងឆ្នោតជូនគណបក្សប្រជាជនកម្ពុជា នៅរសៀលថ្ងៃចន្ឌ័ ៤កើត ខែទុតិយាសាឍ ឆ្នាំចសំរឹទ្ធិស័កព.ស២៥៦២ ត្រូវនិងថ្ងៃទី១៦ កក្កដា ឆ្នាំ២០១៨។
លោក សែម សុខា បានបញ្ជាក់ថា ដើម្បីយើងបានបន្តរួមរស់ក្រោមម្លប់សន្តិភាព ការអភិវឌ្ឍ គ្រប់វិស័យ និងទទួលបាននូវការផ្តល់សិទ្ធិសេរីភាពក្នុងការប្រតិបត្តិតាមប្រពៃណីសាសនា សូមបង ប្អូនបន្តបោះឆ្នោតជូនគណបក្សប្រជាជនកម្ពុជា។
លោកបានបន្ដថា សេរីភាពដែល យើងទទួលបានជាង ៣០ឆ្នាំមកនេះ គឺមានតែគណបក្សប្រជាជនកម្ពុជា តែមួយគត់ ដែលបានអភិវឌ្ឍប្រទេសជាតិពីបាទដៃទទេ ដោយចាប់ផ្តើមកសាង ស្តារ និងជំរុញការអភិវឌ្ឍឲ្យមានការរីកចម្រើន មានអ្វីៗគ្រប់បែបយ៉ាងដូចសព្វថ្ងៃនេះ ដោយមិនសន្យាខ្យល់ ដូចអ្នកនយោបាយប្រថុយប្រឋានមួយចំនួននោះឡើយ។ គណបក្សប្រជាជនមាន គោលការណ៍ និងយុទ្ធសាស្ត្រដឹកនាំដ៏ត្រឹមត្រូវប្រកបដោយកិត្តិបណ្ឌិត របស់សម្តេចតេជោ នាយករដ្ឋមន្ត្រី ជាច្រើនអាណត្តិ ជាពិសេសក្នុងអាណត្តិទី៥នេះ បានជំរុញ ប្រទេសជាតិឲ្យមានការអភិវឌ្ឍគ្រប់ហេដ្ឋារចនាសម្ព័ន្ធ ផ្លូវ ស្ពាន,ថ្នល់, ផ្សារ ,សាលារៀន ,មន្ទីរពេទ្យ,វត្តអារាម គឺទទួលបានសមិទ្ធផលជាច្រើនកើត ឡើង ជាហូរហែជាក់ស្តែងផ្ដល់ការអភិវឌ្ឍ លើគ្រប់វិស័យមកដល់ពេលនេះ ។ នៅក្នុងឱកាសនោះដែរ លោកក៏បានធ្វើការផ្សព្វផ្សាយអំពីគោលនយោបាយអាទិភាព សម្រាប់រយៈពេល៥ឆ្នាំបន្ត ដែលបានថ្លែងការណ៍ដោយ សម្តេចតេជោ ហ៊ុន សែន ក្នុងថ្ងៃដំបូង នៃការបើកយុទ្ធនាការឃោសនាបោះឆ្នោតជាតិ ជ្រើសតាំងតំណាងរាស្ត្រ អាណត្តិទី០៦៕
Source: Kampuchea Thmey Daily
0 Comments