ពានរង្វាន់លីគកំពូលកម្ពុជា (Metfone Cambodian League 2018) ក្រោមការរៀបចំពីសំណាក់គណៈកម្មការប្រកួតបាល់ទាត់ជាតិ (CNCC) សេនាធិការរបស់សហព័ន្ធកីឡាបាល់ទាត់កម្ពុជា បានបញ្ចប់សកម្មភាពប្រកួតសប្ដាហ៍ទី១៤ របស់ខ្លួនកាលពីចុងសប្ដាហ៍កន្លងទៅនេះ ខណៈក្រុមបឹងកេត ដែលជាម្ចាស់ជើងឯកឆ្នាំចាស់បន្តកៅអីកំពូលតារាង។
សរុបលទ្ធផលនៅសប្ដាហ៍ទី១៤ នេះមាននៅថ្ងៃសៅរ៍ ទី១៤ ខែកក្កដា ឆ្នាំ២០១៨ ក្រុមក្រសួងការពារជាតិ ឈ្នះក្រុមអាស៊ីអឺរ៉ុប ៣ទល់១ លើទីលានកីឡដ្ឋានស្តាតចាស់ ហើយក្រុមអគ្គស្នងការដ្ឋាននគរបាលជាតិ ចាញ់ក្រុមបឹងកេត ១ទល់០ លើទីលានពហុកីឡដ្ឋានជាតិ និងក្រុមសូលទីឡូអង្គរ ឈ្នះក្រុមវេស្ទើនភ្នំពេញ ៣ទល់០ នៅលើទីលានកីឡដ្ឋានខេត្តសៀមរាប។ នៅថ្ងៃអាទិត្យ ទី១៥ ខែកក្កដា ឆ្នាំ២០១៨ ក្រុមអង្គរថាយហ្គឺរ បើកទ្វាកីឡដ្ឋានខេត្តសៀមរាប បានស្មើគ្នាជាមួយក្រុមណាហ្គាវើល ១ទល់០ ហើយក្រុមអគ្គីសនីកម្ពុជា ចាញ់ក្រុមព្រះខ័នរាជស្វាយរៀង ៤ទល់២ លើទីលានកីឡដ្ឋានអគ្គីសនីកម្ពុជា និងក្រុមភ្នំពេញក្រោន ចាញ់ក្រុមវិសាខា ៣ទល់១លើទីលានកីឡដ្ឋាន RSN Stadium។
ងាកមកមើលចំណាត់ថ្នាក់ត្រឹមសប្ដាហ៍ទី១៤ កន្លងទៅប្រចាំពានរង្វាន់លីគកំពូលកម្ពុជានេះវិញ ឃើញថាក្រុមបឹងកេតអែហ្វស៊ី បន្តឡើងឈរកំពូលតារាង មាន៣៦ពិន្ទុ តាមពីក្រោយដោយក្រុមលេខ២ ក្រុមវិសាខា មាន៣២ពិន្ទុ ក្រុមណាហ្គាវើល ធ្លាក់ទៅលេខ៣ មាន៣២ពិន្ទុ តែខុសត្រង់រូបមន្ត Head to Head។ ក្រុមលេខ៤ក្រសួងការពារជាតិ មាន៣០ពិន្ទុ ខណៈក្រុមលេខ៥ ភ្នំពេញក្រោន មាន២១ពិន្ទុ ក្រុមលេខ៦ អគ្គស្នងការដ្ឋាននគរបាលជាតិ មាន២០ពិន្ទុ លេខ៧ ព្រះខ័នរាជស្វាយរៀង មាន២០ពិន្ទុ ដែរ ក្រុមលេខ៨ អាស៊ីអឺរ៉ុប មាន១៨ពិន្ទុ។ ក្រុមលេខ៩សូលទីឡូអង្គរ មាន១៤ពិន្ទុ ហើយក្រុមលេខ១០ អង្គរថាយហ្គឺរ មាន១២ពិន្ទុ ស្របពេលក្រុមអគ្គីសនីកម្ពុជា ឈរលេខ១១ មាន៥ពិន្ទុ និងក្រុមវេស្ទើនភ្នំពេញ ឈរលេខ១២ មិនទាន់មានពិន្ទុ។
ពានរង្វាន់លីគកំពូលកម្ពុជា រដូវកាលនេះនឹងប្រើប្រាស់រូបមន្តប្រកួតសន្សំពិន្ទុវិលជុំចំនួន២ជើងមាន២២សប្ដាហ៍ ដើម្បីស្វែងរកក្រុមខ្លាំង ដែលមានពិន្ទុច្រើនជាងគេដណ្តើមជើងឯកប្រចាំឆ្នាំ។ ការប្រកួតចាប់ផ្តើមពីថ្ងៃទី៣ខែមីនា ដល់ថ្ងៃទី៣០ខែកញ្ញា ឆ្នាំ២០១៨ ដែលមានសមាជិកចំនួន១២ក្រុម។ ក្រុមជើងឯកនឹងទទួលបានកៅអីទៅចូលរួមប្រកួតក្នុងពានរង្វាន់ AFC Cup 2019, ពានរង្វាន់ Mekong Club Championship ជាដើម។
តាមគ្រោងប្រកួតសប្ដាហ៍ទី១៥ ដែលជាសប្ដាហ៍បន្ទាប់នៅថ្ងៃសៅរ៍ ទី២១ ខែកក្កដា ឆ្នាំ២០១៨ ក្រុមអាស៊ីអឺរ៉ុប ត្រូវបើកទ្វារកីឡដ្ឋាន AEU Sport Park របស់ខ្លួនទទួលក្រុមវិសាខា វេលាម៉ោង៣រសៀល ហើយក្រុមបឹងកេត ទទួលក្រុមសូលទីឡូអង្គរ នៅវេលាម៉ោង៦ល្ងាចលើទីលានពហុកីឡដ្ឋានជាតិ និងក្រុមអង្គរថាយហ្គឺរ ប៉ះក្រុមព្រះខ័នរាជស្វាយរៀង នៅវេលាម៉ោង៣និង៣០នាទីល្ងាច លើទីលានកីឡដ្ឋានខេត្តសៀមរាប។ ចំណែកនៅថ្ងៃអាទិត្យ ទី២២ ខែកក្កដា វិញក្រុមវេស្ទើនភ្នំពេញ ជួបក្រុមក្រសួងការពារជាតិ នៅម៉ោង៣រសៀលលើទីលានកីឡដ្ឋានវេស្ទើន ហើយក្រុមណាហ្គាវើល ប៉ះក្រុមភ្នំពេញក្រោន នៅវេលាម៉ោង៣រសៀលលើទីលានកីឡដ្ឋានស្តាតចាស់ និងក្រុមអគ្គស្នងការដ្ឋាននគរបាលជាតិ ប៉ះក្រុមអគ្គីសនីកម្ពុជា នៅម៉ោង៦ល្ងាចលើទីលានពហុកីឡដ្ឋានជាតិ៕
Source: Kampuchea Thmey Daily
0 Comments