ភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) កាលពីព្រឹកថ្ងៃអង្គារ បានរៀបចំបង្ហាញទឹកខ្មៅជ្រលក់ម្រាមដៃ នៅពេលបោះឆ្នោត ដែលកម្មវិធីនេះ បានធ្វើឡើងក្រោមអធិបតីភាពលោក ហ៊ែល សារ៉ាត់ សមាជិក គ.ជ.ប នៅសាលប្រជុំក្រសួងមហាផ្ទៃ ហើយជាលទ្ធផលបានបង្ហាញថា ទឹកខ្មៅលុបលាងមិនជ្រះ សំរាប់ជ្រលក់ម្រាមដៃ នៅពេលបោះឆ្នោតនោះ អាចទទួលយកបាន ពីព្រោះបើទោះបីជាលាងយ៉ាងណា ក៏មិនអាចលាងជ្រះដែរ គឺនៅមានស្នាមទឹកថ្នាំ ដែលអាចបញ្ជាក់ថា ពិតជាបានបោះឆ្នោតរួចហើយ មិនអាចបន្លំបានទេ។
លោក សំ គន្ធាមី នាយកប្រតិបត្តិអង្គការនិកហ្វឹក បានថ្លែងប្រាប់អ្នកសារព័ត៌មានក្រោយពីការសាកល្បងទឹកខ្មៅនោះថា ការបង្ហាញទឹកខ្មៅជាទូទៅ គ.ជ.ប អាណត្តិមុនក៏បានធ្វើបែបនេះដែរ ប៉ុន្តែអាណត្តិមុនការធ្វើតេស នៅសល់មួយថ្ងៃមុនថ្ងៃបោះឆ្នោត តែអាណត្តិនេះ ធ្វើតេសមានរយៈពេលវែងបែបនេះ នៅពេលមានបញ្ហាអី ខាងក្រុមហ៊ុនអាចយកទៅពិសោធថែមទៀត ដែលនេះជាចំណុចល្អ។
ទាក់ទងសំណួរអំពីទំនុកចិត្តលើទឹកថ្នាំនោះ លោក សំ គន្ធាមី អះអាងថា “បើសិនជាទឹកថ្នាំនេះ តម្រូវឲ្យត្រូវពន្លឺថ្ងៃបន្ថែមទៀត ដើម្បីឲ្យទឹកថ្នាំនេះ មានពណ៌ស្វាយរាងចាស់ យើងអាចទុកចិត្តបានហើយ ទោះបីជាឥឡូវនេះ ក៏អាចសម្គាល់ថា យើងបានបោះឆ្នោតហើយដែរ បើសិនជាយើងជ្រលក់ហើយ នៅថ្ងៃបោះឆ្នោតអាចសម្គាល់ថា គាត់បានបោះឆ្នោតរួចហើយ។ បើទោះបីលាងយ៉ាងណា តែវាមានស្នាមនៅ អាចសំគាល់ថា បានបោះឆ្នោតហើយ។ ដោយសារអាណត្តិមុនវាមានពណ៌ខ្មៅស្វាយរាងចាស់ តែនេះប្រហែលជាបច្ចេកទេសទាមទារមានពន្លឺ ហើយយើងធ្វើតេស្តនេះនៅក្នុងបន្ទប់ ដូច្នេះប្រហែលជាអាចមកពីបញ្ហាហ្នឹងដែរ។ សរុបមកវិញ យើងអាចប្រើការបាន អាចសម្គាល់ថា បានបោះឆ្នោតហើយ យើងអាចទុកចិត្តបានហើយ យើងអាចប្រើការបានហើយ លុបមិនជ្រះទេ ខ្ញុំលុបលាងរួចហើយ”។
តំណាងស្ថាប័ន គ.ជ.ប មួយរូបឈ្មោះ សុខ ធី មានតួនាទីជាអនុប្រធានការិយាល័យបច្ចេកទេសនៃនាយកដ្ឋានគ្រប់គ្រងទិន្នន័យអ្នកបោះឆ្នោត និងបញ្ជីបោះឆ្នោត ដែលបានចូលរួមជ្រលក់ម្រាមដៃផងដែរនោះ បានអះអាងថា ទឹកខ្មៅលុបលាងមិនជ្រះ សម្រាប់ជ្រលក់ម្រាមដៃ នៅពេលបោះឆ្នោតនេះ នៅពេលលាងជាមួយអូសាវែល វាហាក់ដូចជាស្លេកបន្តិច ប៉ុន្តែវាមិនបាត់ស្នាមទឹកខ្មៅទេ។
ចំណែកលោក ហ៊ាង ម៉ាស៊ី តំណាងគណបក្សពន្លឺថ្មី បានអះអាងថា “លាងមិញជាមួយមេសសាប៊ូ ខ្ញុំមិនច្បាស់រឿងផលិតផលទេ តែលាងបាន២ដង គិតថាអាចប្រព្រឹត្តទៅបានមិនអីទេ ខ្ញុំគិតថា លាងមិនជ្រះទេតាមមើលទៅ លាងមិនជ្រះទេ”។
ដោយឡែកលោក ចៅ ទឹង តំណាងគណបក្សប្រជាជនកម្ពុជាបានអះអាងថា ចំពោះថ្នាំជ្រលក់ម្រាមដៃនេះ ដូចយើងបានមើលឃើញហើយ នៅពេលជ្រលក់ វាមានពណ៌ដូចមានលក្ខណៈដិត ហើយធ្វើឲ្យយើងលុបលាងជាមួយទឹកលាងក្រចក ទឹកសំអាត ទឹកសាប៊ូផ្សេងៗទៀត គ្មានភាពលុបជ្រះទេ គឺនៅតែមានស្នាមដដែល។ ដោយឡែកទាក់ទងនិងសកម្មភាពនៃការបង្ហាញទឹកខ្មៅលុបលាងមិនជ្រះនេះ លោក ចៅ ទឹង អះអាងថា អាចបង្ហាញប្រជាពលរដ្ឋឲ្យពួកគាត់យល់ដឹងពីគុណភាពទឹកថ្នាំនេះ ថាវាមិនអាចលុបលាងជ្រះទេ ហើយក៏ធ្វើឲ្យមហាជនជឿជាក់លើស្ថាប័ន គ.ជ.ប ផងដែរ។
សូមបញ្ជាក់ថា កាលពីព្រឹកថ្ងៃទី១៧ ខែកក្កដា ឆ្នាំ២០១៨ គ.ជ.ប បានបើកកិច្ចប្រជុំជាមួយភាគីពាក់ព័ន្ធស្តីពីដំណើរការប្រព្រឹត្តទៅនៃការឃោសនាបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ និងការបង្ហាញទឹកខ្មៅជ្រលក់ម្រាមដៃ នៅពេលបោះឆ្នោត ដែលកម្មវិធីទាំងពីរនេះ រៀបចំឡើងក្រោមអធិបតីភាពលោក ហ៊ែល សារ៉ាត់ សមាជិក គ.ជ.ប នៅសាលប្រជុំក្រសួងមហាផ្ទៃ ដោយមានការចូលរួមពីតំណាងក្រុមប្រឹក្សាធម្មនុញ្ញ តំណាងក្រសួង ពាក់ព័ន្ធនានា តំណាងគណបក្សនយោបាយ តំណាងអង្គការមិនមែនរដ្ឋាភិបាលជាតិ និងអន្តរជាតិ តំណាងស្ថានទូតជប៉ុន ជំនាញ jica និងអ្នកជំនាញកូរ៉េ ប្រចាំនៅ គ.ជ.ប ព្រមទាំងអ្នកសារព័ត៌មានជាតិ និងអន្តរជាតិ យ៉ាងច្រើន។
លោក ទេព នីថា អគ្គលេខាធិការ គ.ជ.ប បានអះអាងក្រោយពិនិត្យ និងពិសោធន៍ទឹកខ្មៅជ្រលក់ដៃនោះថា ទឹកខ្មៅនេះត្រូវបានទិញមកពីប្រទេសឥណ្ឌា ហើយក្រោយពិសោធន៍ បានបញ្ជាក់ឲ្យឃើញថា ទឹកខ្មៅនេះ មានគុណភាពល្អ គឺដូចទឹកខ្មៅដែលបានប្រើសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅអាណត្តិទី៤ផងដែរ។
ទឹកខ្មៅជ្រលក់ម្រាមដៃលុបមិនជ្រះទាំងអស់នោះ មានចំនួន៥១,០០០ដប ក្នុង១ដបមានចំណុះ៧០មីលីលីត្រ ហើយដបនីមួយៗមានសារធាតុប្រាក់នីត្រាត២៥ភាគរយ។ គ.ជ.ប បានចំណាយប្រមាណ៨ម៉ឺនដុល្លារអាមេរិក ដើម្បីទិញទឹកថ្នាំទាំងនេះពីប្រទេសឥណ្ឌា។
ដំណើរការបោះឆ្នោតជ្រើសតាំងតំណាងរាស្ដ្រនីតិកាលទី៦ ឆ្នាំ២០១៨ នឹងប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខ ហើយការឃោសនារកសំឡេងឆ្នោត មានរយៈពេល២១ថ្ងៃ ដោយចាប់ពីថ្ងៃទី០៧ ខែកក្កដា ដល់ថ្ងៃទី២៧ ខែកក្កដា ឆ្នាំ២០១៨។ ជាមួយគ្នានេះ ការបោះពុម្ពសន្លឹកឆ្នោត ក៏ត្រូវបានបញ្ចប់ផងដែរ និងបានដឹកចេញពីរោងពុម្ព ទៅរក្សាទុកនៅក្នុងឃ្លាំងរបស់ គ.ជ.ប កាលពីថ្ងៃទី១៣ ខែកក្កដា ឆ្នាំ២០១៨ ហើយនឹងដឹកបន្តទៅកាន់ការិយាល័យបោះឆ្នោតទាំង២២៩៦៧ ការិយាល័យ ទូទាំងប្រទេស មិនឲ្យលើស៣៦ម៉ោងមុនថ្ងៃបោះឆ្នោត។
ការបោះឆ្នោតនេះ មានគណបក្សនយោបាយចំនួន២០ បានចូលរួម គឺគណបក្ស “គណបក្សខ្មែររួបរួមជាតិ” លេខរៀងទី១, គណបក្ស “គណបក្សមាតុភូមិយើង” លេខរៀងទី២, គណបក្ស “គណបក្សពន្លឺថ្មី” លេខរៀងទី៣, គណបក្ស “សញ្ជាតិកម្ពុជា” លេខរៀងទី៤, គណបក្ស “ខ្មែរក្រោក” លេខរៀងទី៥, គណបក្ស “សំបុកឃ្មុំសង្គមប្រជាធិបតេយ្យ” លេខរៀងទី៦, គណបក្ស “ប្រជាធិបតេយ្យមូលដ្ឋាន” លេខរៀងទី៧, គណបក្ស “ខ្មែរសាធារណរដ្ឋប្រជាធិបតេយ្យ” លេខរៀងទី៨, គណបក្ស “រស្មីខេមរា” លេខរៀងទី៩, គណបក្ស “សម្ព័ន្ធដើម្បីប្រជាធិបតេយ្យ” លេខរៀងទី១០, គណបក្ស “ខ្មែរសាធារណរដ្ឋ” លេខរៀងទី១១, គណបក្ស “ខ្មែរឈប់ក្រ” លេខរៀងទី១២, គណបក្ស “ហ្វ៊ុនស៊ិនប៉ិច” លេខរៀងទី១៣, គណបក្ស “ខ្មែរអភិវឌ្ឍន៍សេដ្ឋកិច្ច” លេខរៀងទី១៤, គណបក្ស “យុវជនកម្ពុជា” លេខរៀងទី១៥, គណបក្ស “ធម្មាធិបតេយ្យ” លេខរៀងទី១៦, គណបក្ស “ឆន្ទះខ្មែរ” លេខរៀងទី១៧, គណបក្ស “ជនជាតិដើមប្រជាធិបតេយ្យកម្ពុជា” លេខរៀងទី១៨, គណបក្ស “ខ្មែរតែមួយ” លេខរៀងទី១៩ និងគណបក្ស “ប្រជាជនកម្ពុជា” លេខរៀងទី២០៕
Source: Kampuchea Thmey Daily
0 Comments