កណ្តាល ៖ បុរស២នាក់ គេស្គាល់ជាតៃកុងរថយន្តបានរងរបួសតិចតួច ខណៈជួបឧប្បត្តិហេតុគ្រោះថ្នាក់ចរាចរណ៍រវាងរថយន្តដឹកឥដ្ឋបានបុកជាមួយរថយន្តដឹកប្រេងសាំងក្រឡាប់ផ្ងារកង់ធ្លាយសាំងពេញផ្លូវ។ ហេតុការណ៍នេះបានកើតឡើងនៅ ថ្ងៃទី១៦ខែកក្កដាឆ្នាំ២០១៨វេលាម៉ោង១៦និង១០នាទី លើផ្លូវជាតិ លេខ៦ចន្លោះគីឡូម៉ែត្រលេខ២៣-២៤ចំណុច ភូមិលើ ឃុំព្រែកអញ្ចាញ ស្រុកមុខកំពូលខេត្តកណ្តាល។
នគរបាលចរាចរស្រុកមុខកំពូលបានឲ្យដឹងថា ករណីគ្រោះថ្នាក់ចរាចរនេះ រវាងរថយន្តនិងរថយន្ត ដោយរថយន្តម៉ាកអ្វីស៊ុយស៊ុយ (ប្រភេទស៊ីទែនដឹកប្រេងសាំងនិងម៉ាស៊ុតចំនួន៥៥០០លីត្រ មួយគ្រឿងពណ៌ស ពាក់ស្លាកលេខភ្នំពេញ៣A៨៥២៣ បើកបរដោយ ឈ្មោះហែម បូរ៉ា ភេទប្រុស អាយុ៣៤ឆ្នាំ មានទីលំនៅភូមិកោះប្រាក់ឃុំភូមិធំ ស្រុកកៀន ស្វាយខេត្តកណ្ដាល។
ធ្វើដំណើរពីត្បូងទៅជើង លុះមកដល់ចំណុចកើតហេតុបានបត់ឆ្វេងទៅទិសខាងលិចស្របពេលនោះក៏មាន រថយន្តមួយគ្រឿងម៉ាក ហ៊ីយិនដាយ ពណ៌ខៀវ ពាក់ស្លាកលេខភ្នំពេញ3A-1610 ដែលបើកបរដោយឈ្មោះអូន ធឿន ភេទប្រុស អាយុ៥៩ឆ្នាំ មានទីលំនៅភូមិកោះតាចាន់ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។ ធ្វើដំណើរពីជើងទៅត្បូងហើយបានមកបុករថយន្តដែលបត់ឆ្វេង ខាងលើបណ្ដាលឲ្យក្រឡាប់បង្កឲ្យមានអ្នករបួសស្រាលអ្នកបើកបររថយន្តទាំងពីរ។
លោកព្រុំ សំណាង អធិការស្រុកមុខកំពូលបានឲ្យដឹងថា ដោយរថយន្តម៉ាកអ៊ីស៊ុយស៊ុយ ធ្វើដំណើរពីត្បូងទៅជើង ហើយបត់ឆ្វេងទៅទិសខាងលិចបណ្ដាលឲ្យរថយន្តម៉ាកហ៊ីយិនដាយមកពីទិសខាងជើង មកបុកតែម្តង។ ក្រោយពីទទួលព័ត៌មានកម្លាំង ជំនាញ បានចុះទៅដល់កន្លែងកើតហេតុហើយបានធ្វើការវាស់វែងនិងយកមធ្យោបាយទាំងពីរ មករក្សាទុកនៅអធិការដ្ឋាននគរបាលស្រុកមុខកំពូល។
សេចក្ដីសន្និដ្ឋាន ដោយអ្នកបើកបររថយន្តអ៊ីស៊ុយស៊ុយបត់ឆ្វេងខ្វះការប្រុងប្រយ័ត្នរីឯរថយន្តហ៊ីយិនដាយ បើកបរលឿនលើផ្លូវបំបែកជាបី ដែលមានផ្លូវឆ្លងកាត់៕
Source: Kampuchea Thmey Daily
0 Comments