រតនគិរី ៖ រថយន្តហ៊ីយ៉ាន់ដាយមួយគ្រឿង ខណៈកំពុងបើកបរលើផ្លូវជាតិសង្ស័យតៃកុងងងុយដេកបើករេចង្កូតធ្លាក់ផ្លូវបណ្តាលឲ្យផ្ងារកង់ម្ខាង ប៉ុន្តែមនុស្ស៣នាក់រងរបួសធ្ងន់ស្រាល មិនបណ្តាលឲ្យអ្នកដទៃរងគ្រោះថ្នាក់នោះឡើយ។
ហេតុការណ៍គ្រោះថ្នាក់ចរាចរណ៍បង្កឡើងដោយខ្លួនឯង បានកើតឡើងកាលពីវេលាម៉ោង១២និង១០នាទីថ្ងៃត្រង់ ថ្ងៃទី១៧ ខែកក្កដា ឆ្នាំ២០១៨ នៅតាមបណ្តោយផ្លូវជាតិលេខ៧៨ ត្រង់ចំណុចផ្លូវកោងស្ថិតនៅក្នុងភូមិ៤ សង្កាត់កាចាញ ក្រុងបានលុង។
លោក សួន សាវុធ មេប៉ុស្តិ៍កាចាញបានឲ្យដឹងថា រថយន្តមួយគ្រឿងម៉ាក ហ៊ីយ៉ាន់ដាយក្បាល ពណ៌ស ទ្រុងពណ៌ស ពាក់ស្កាកលេខ កំពង់ចាម 3A-6324 អ្នកបើកបរ ១-ឈ្មោះ សន ភេទប្រុស អាយុ២២ឆ្នាំ ជនជាតិខ្មែរ មុខរបរបើកបរ (រងរបួសធ្ងន់) ក្នុងទិសដៅពីលិចទៅកើត។
រីឯអ្នករួមដំណើរពីរនាក់ ២-ឈ្មោះ អ៊ុក វល្ល័ក្ខ ភេទប្រុស អាយុ២៥ឆ្នាំ ជនជាតិខ្មែរ (រងរបួសស្រាល)។ ៣-ឈ្មោះ ផល សឿន ភេទប្រុស អាយុ២៨ឆ្នាំ ជនជាតិខ្មែរ (រងរបួសស្រាល)។ អ្នកទាំង៣នាក់បច្ចុប្បន្នរស់នៅភូមិបាធាយ ឃុំបាធាយ ស្រុកបាធាយ ខេត្តកំពង់ចាម។
ក្រោយកើតហេតុនគរបាលប៉ុស្តិ៍កាចាញ ចុះមកអន្តរាគមន៍ទំនាក់ទំនងទៅរថយន្តសង្គ្រោះរបស់ស្នងការនគរបាលខេត្តដឹកបញ្ជូនជនរងគ្រោះទៅសង្គ្រោះនៅមន្ទីរពេទ្យបង្អែកខេត្ដភ្លាមៗផងដែរ។
ដោយឡែក រថយន្តត្រូវបានកម្លាំងការិយាល័យ នគរបាលចរាចរណ៍ខេត្តអូសយកទៅរក្សាទុក នៅស្នងការដ្ឋាននគរបាលខេត្តរង់ចាំឲ្យម្ចាស់មកទទួលយកទៅវិញ៕
Source: Kampuchea Thmey Daily
0 Comments