បាត់ដំបង ៖ ជនសង្ស័យម្នាក់ ដែលត្រូវជាឪពុកចុង ត្រូវបានកម្លាំងសមត្ថកិច្ច នៃអធិការដ្ឋាន នគរបាលស្រុក គាស់ក្រឡ ធ្វើការឃាត់ខ្លួនដោយយោងទៅលើពាក្យបណ្តឹងរបស់ភរិយាខ្លួន ដោយសារតែជាប់ពាក់ព័ន្ធទៅនឹងបទ ប្រទូស្តកេរ្តិ៍ខ្មាស ទៅលើកូនស្រីរបស់ខ្លួនឯង។
យោងតាមរបាយការណ៍របស់សមត្ថកិច្ចស្រុកគាស់ក្រឡ បានបញ្ជាក់ថា ករណីប្រទូស្ត កេរ្តិ៍ខ្មាសនេះ បានកើតឡើងកាលពីវេលាម៉ោង ៤ ល្ងាច ថ្ងៃទី១៦ ខែកក្កដា ឆ្នាំ២០១៨ នៅចំណុចភូមិឆាយបល្ល័ង្គ ឃុំធិបតី ស្រុកគាស់ក្រឡ ខេត្តបាត់ដំបង ដែលបានបង្កឡើងដោយជនសង្ស័យឈ្មោះ យឹង ស ភេទប្រុស អាយុ៤៧ឆ្នាំ ត្រូវជាឪពុកចុង របស់ក្មេងស្រីរងគ្រោះ។
លោកវរសេនីយ៍ឯក ឆាង វណ្ណឆៃ អធិការ នគរបាល ស្រុកគាស់ក្រឡ បានលើកឡើងថា ក្រុមគ្រួសារនេះគឺមានស្រុកកំណើតនៅភូមិ ឆាយរំពាត់ ឃុំកន្ទឺ២ ស្រុកបាណន់ ដោយបានទៅស្នាក់នៅបណ្តោះអាសន្ន នៅចំណុចកើតហេតុខាងលើ ដើម្បីស៊ីឈ្នួលចាំចំការឲ្យគេ។
លោកអធិការក៏បានបន្តថា លុះនៅមុនពេលកើតហេតុ គឺស្ត្រីជាភរិយាមិនបាននៅក្នុងផ្ទះនោះទេដោយមានធុរៈទៅខាងក្រៅ ដែលជាឱកាសសម្រាប់ឪពុកចុងដែលមានគំនិតខូចដោយគេបានចាប់ឲ្យកូនស្រីឈ្មោះ ជ ស ម អាយុ១៣ឆ្នាំ ដែលត្រូវជាកូនចុង ព្រមទាំងបានលូកស្ទាបអង្អែលទៅលើប្រដាប់ភេទកូនស្រីនោះថែមទៀត ប៉ុន្តែជាចៃដន្យក៏ត្រូវភរិយាមកទាន់ ក៏បានប្តឹងទៅកម្លាំងប៉ុស្តិ៍នគរបាលរដ្ឋបាល ធិបតី ដើម្បីធ្វើការឃាត់ខ្លួន និងបញ្ជូនទៅកាន់ ការិយាល័យជំនាញនៃ ស្នងការដ្ឋាន នគរបាលខេត្ត ក្នុងការចាត់វិធានការតាមផ្លូវច្បាប់៕
Source: Kampuchea Thmey Daily
0 Comments