ក្រុមបាល់ទាត់ម្ចាស់ជើងឯក៣សម័យកាលបឹងកេត បានបន្តឡើងឈរកំពូលតារាងបណ្តោះអាសន្នប្រចាំពានរង្វាន់លីគកំពូលកម្ពុជា (Metfone Cambodian League 2018) ត្រឹមសប្ដាហ៍ទី១៤ ដែលរៀបចំពីសំណាក់គណៈកម្មការប្រកួតបាល់ទាត់ជាតិ (CNCC) សេនាធិការរបស់សហព័ន្ធកីឡាបាល់ទាត់កម្ពុជា ខណៈលោក ហៅ សុជាតិ ដែលជាគ្រូបង្វឹករីករាយជាមួយលទ្ធផលដែលជាស្នាដៃរបស់កូនក្រុមនៅលើទីលាន តែមិនបោះបង់ការខំប្រឹងប្រែងបន្ថែមនោះទេ។
លោក ហៅ សុជាតិ បានលើកឡើងថា «ឈរកំពូលតារាងគឺជាចំណុចល្អរបស់យើងដែរ ប៉ុន្តែទន្ទឹមនឹងនេះ យើងត្រូវខិតខំប្រឹងប្រែងបន្ថែមទៀត ព្រោះថាជើងទី២នេះក្រុមដទៃទៀតគេបានរៀបចំក្រុមបានល្អច្រើនទាំងកីឡាករនិងទម្រង់លេង ម្យ៉ាងទៀតផ្លូវដើរគឺនៅសល់វែងឆ្ងាយទៀត។ ដូច្នេះហើយយើងត្រូវតែប្រឹងប្រែងបន្ថែម»។
ក្រុមបឹងកេត តាមរយៈ១៤ប្រកួតមកនេះនៅមិនទាន់ស្គាល់បរាជ័យនៅឡើយនោះទេ ពោលគឺធ្លាប់បានយកឈ្នះក្រុមអាស៊ីអឺរ៉ុប ៤ទល់៣ ហើយឈ្នះវេស្ទើនភ្នំពេញ ៣ទល់១ បន្តឈ្នះអគ្គស្នងការដ្ឋាននគរបាលជាតិ ៥ទល់១ តែស្មើសូលទីឡូអង្គរ ១ទល់១ ហើយយកឈ្នះក្រសួងការពារជាតិ ២ទល់០ ឈ្នះព្រះខ័នរាជស្វាយរៀង ៣ទល់១ ស្មើជាមួយអគ្គីសនីកម្ពុជា ១ទល់១ ឈ្នះអង្គរថាយហ្គឺរ ៤ទល់០ ឈ្នះភ្នំពេញក្រោន ៣ទល់២ ស្មើវិសាខា ១ទល់១ និងឈ្នះណាហ្គាវើល ៣ទល់២ នៅជើងទី១ ហើយឈ្នះអាស៊ីអឺរ៉ុប ៤ទល់០ ឈ្នះវេស្ទើនភ្នំពេញ ៥ទល់១ និងឈ្នះអគ្គស្នងការដ្ឋាននគរបាលជាតិ ១ទល់០ ក្នុងជើងទី២។
ចំពោះប្រកួតចុងក្រោយយកឈ្នះលើក្រុមអគ្គស្នងការនគរបាលជាតិ ទាំងពិបាកវិញលោក ហៅ សុជាតិ បានបញ្ជាក់ថា «ចំពោះលទ្ធផលឈ្នះ ១-០ នេះ ខ្ញុំគិតថាយើងធ្វើបានល្អ គ្រាន់តែយើងខ្វះឱកាសបន្តិច ដោយសារប៉ូលិសផ្ដោតអារម្មណ៍លើការការពារច្រើនជាងប្រយុទ្ធ ហើយពួកគេរៀបចំក្បួនការពារនិងវាយបក បានល្អមែនទែន។ លទ្ធផល១-០នេះគឺគ្រប់គ្រាន់ហើយសម្រាប់យើង ព្រោះថាក្រុមគេ ការពារបានល្អណាស់»។
ជារួមក្រុមបឹងកេត ប្រកួតឈ្នះ១១លើក ស្មើគ្នា៣លើក និងមិនធ្លាប់ចាញ់មាន៣៣ពិន្ទុក្នុងដៃ ទាត់ចូលទីគេចំនួន៣៦គ្រាប់ ហើយរបូត១៤គ្រាប់។ លោក ហៅ សុជាតិ ត្រូវក្លិបតែងតាំងឱ្យឈរឈ្មោះជាគ្រូបង្វឹកស្តីទីកាលពីរដូវកាលឆ្នាំ២០១៦ កន្លងទៅក្រោយការចាកចេញរបស់លោក ប្រាក់ សុវណ្ណារ៉ា ខណៈលោកបានចាប់ដៃជាមួយលោក កែវ កុសល ដឹកនាំក្រុមកាលពីដើមរដូវកាលក៏ដូចជាក្នុងយុទ្ធនាការប្រកួតវគ្គជម្រុះពានរង្វាន់ AFC Cup 2018។ កាលពីឆ្នាំចាស់លោកឈ្នះបានរង្វាន់គ្រូបង្វឹកឆ្នើមប្រចាំរដូវកាលពី CNCC ផងដែរ។
ក្លិបបឹងកេត ឡើងមកលេងពានរង្វាន់លីគកំពូលកម្ពុជា នៅឆ្នាំ២០១២ ហើយធ្លាប់ឈ្នះជើងឯកចំនួន៣លើកគឺនៅឆ្នាំ២០១២,២០១៦ និង២០១៧ ខណៈនៅឆ្នាំ២០១៣ និង២០១៤ ត្រឹមឈរជើងឯករង។ នៅឆ្នាំ២០១៧ ក្រុមនេះឈ្នះពានរង្វាន់ CNCC Cup 2017 ផងដែរ។ ចំណែកពានរង្វាន់នៅក្រៅស្រុកវិញក្រុមដែលមានប្រភពមកពីខេត្តកំពង់ចាម មួយនេះធ្លាប់ចេញទៅប្រកួតវគ្គជម្រុះតាមពូលពានរង្វាន់ AFC President's Cup នៅឆ្នាំ២០១៣ ធ្លាប់ឡើងដល់វគ្គផ្ដាច់ព្រ័ត្រពានរង្វាន់ Toyota Mekong Club Championship 2015 តែចាញ់ក្រុម Buriram United របស់ថៃ និងប្រកួតក្នុងពានរង្វាន់នៅឆ្នាំ២០១៦ និង២០១៧ ផងដែរ។ នៅឆ្នាំ២០១៨និង២០១៨ ក្រុមនេះមានឈ្មោះចេញទៅលេងពានរង្វាន់លំដាប់ទី២ប្រចាំទ្វីបអាស៊ី AF Cup ផងដែរតែធ្លាក់ត្រឹមវគ្គជម្រុះតាមពូលដូចគ្នា។
សម្រាប់ប្រកួតបន្ទាប់សប្ដាហ៍ទី១៥ នៃពានរង្វាន់លីគកំពូលកម្ពុជាឆ្នាំ២០១៨ នេះក្រុមបឹងកេត ត្រូវប៉ះក្រុមសូលទីឡូអង្គរ នៅវេលាម៉ោង៦ល្ងាចថ្ងៃសៅរ៍ ទី២១ ខែកក្កដា ឆ្នាំ២០១៨ ចុងសប្តាហ៍នេះលើទីលានពហុកីឡដ្ឋានជាតិក្នុងរាជធានីភ្នំពេញ៕
Source: Kampuchea Thmey Daily
0 Comments