ក្រុមស.ស.យ.ក កំចាយមារ ដែលជាម្ចាស់ជើងឯកពានរង្វាន់បាល់ទាត់ជម្រើសជើងឯកបាល់ទាត់ក្នុងសាលឆ្នាំ២០១៧ (ហ្វូតសាល) តំណាងឲ្យប្រទេសកម្ពុជា បានអស់សិទ្ធិឡើងទៅវគ្គបន្ត ក្រោយប្រកួតបរាជ័យទាំង៣ លើកក្នុងវគ្គជម្រុះតាមពូល ពានរង្វាន់ជើងឯកហ្វូតសាលតំបន់អាស៊ាន AFF Futsal Club Championship 2018 នៅប្រទេសឥណ្ឌូណេស៊ី។
សរុប៣ប្រកួតរបស់ក្រុមស.ស.យ.ក កំចាយមារ មាននៅថ្ងៃអាទិត្យ ទី១៥ ខែកក្កដា ឆ្នាំ២០១៨ បានប្រកួតចាញ់ក្រុម East Coast Heat FC របស់អូស្ត្រាលី ៨ទល់០ ហើយថ្ងៃច័ន្ទ ទី១៦ ខែកក្កដា ក្រុមកម្ពុជា មួយនេះបានប្រកួតចាញ់ក្រុម MIC Futsal Club ដោយលទ្ធផល៤ទល់២ និងចុងក្រោយនៅថ្ងៃអង្គារ ទី១៧ ខែកក្កដា ឆ្នាំ២០១៨ ក្រុមស.ស.យ.ក កំចាយមារ បានប្រកួតបិទពូលចាញ់ក្រុម ក្រុមArbisyam FC របស់ប្រ៊ុយណេ ៧ទល់៦។
សូមរំលឹកពានរង្វាន់AFF Futsal Club Championship 2018 មានក្រុមចំនួន៨ក្រុម ចូលរួមដែលបានបែងចែកជា២ពូល ក្នុងនោះក្រុមកំចាយមាររបស់កម្ពុជា ស្ថិតក្នុងពូល A ជាមួយក្រុមជាមួយក្រុម East Coast Heat FC (អូស្ត្រាលី) Arbisyam FC (ប្រ៊ុយណេ)និង MIC (មីយ៉ាន់ម៉ា)។ ចំណែកពូល B វិញមានក្រុមSKN FC Kebumen របស់ឥណ្ឌូណេស៊ី, Bangkok BTS (ថៃ), Melaka United (ម៉ាឡេស៊ី) និង Sanatech Khanh Hoa (វៀតណាម)។
លោក ផាន់ សុផាណារ៉ា គ្រូបង្វឹករបស់ក្រុមស.ស.យ.ក កំចាយមារ ទទួលស្គាល់ថានេះជាបទពិសោធន៍ថ្មីសម្រាប់ក្រុមលោក ជាហេតុពិបាកក្នុងការរកពិន្ទុ។ ពានរង្វាន់នេះចាប់ដំណើរការពីថ្ងៃទី១៥ រហូតដល់ថ្ងៃទី២១ ខែកក្កដា ឆ្នាំ២០១៨ ក្នុងទីក្រុងYogyakarta ប្រទេសឥណ្ឌូនេស៊ី ខណៈក្រុមសមាជិកទាំង៨ក្រុមនេះ បែងចែកចេញជា២ពូលធ្វើការប្រកួតវិលជុំសន្សំពិន្ទុ ហើយ២ក្រុមដែលមានពិន្ទុលើគេនឹងត្រូវប្រកួតក្នុងវគ្គពាក់កណ្ដាលផ្ដាច់ព្រ័ត្រ មុននឹងប្រជែងគ្នាដណ្ដើមជើងឯក។
គិតត្រឹមពេលនេះក្រុមEast Coast Heat និងក្រុម MIC នឹងតំណាងឲ្យពូល A ឡើងទៅវគ្គពាក់កណ្ដាលផ្តាច់ព្រ័ត្រ ខណៈពូល B មានក្រុមSKN FC Kebumen និងក្រុមBangkok BTS FC។ វគ្គនេះនឹងធ្វើឡើងនៅថ្ងៃព្រហស្បតិ៍ ទី១៩ ខែកក្កដា ខាងមុខ។
ចំពោះពានរង្វាន់ AFF Futsal Club Championship រៀបចំឡើងទើបតែបាន៣លើកប៉ុណ្ណោះ គិតពីឆ្នាំ២០១៥ មកហើយក្លិប Port FC របស់ថៃ ជាក្រុមជើងឯកទាំង៣លើកនេះ។ សម្រាប់កម្ពុជា វិញនេះជាឆ្នាំដំបូង ដែលមានបេក្ខភាពចេញទៅប្រកួតនៅក្រៅប្រទេសក្រោយមានចលនាប្រកួតនៅក្នុងស្រុកឡើងវិញគិតតាំងពីឆ្នាំ២០១៧មក៕
Source: Kampuchea Thmey Daily
0 Comments