ពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១២ (Hun Sen Cup) វគ្គ១៦ក្រុមចុងក្រោយជម្រុះថ្នាក់ជាតិ ឆ្នាំ២០១៨ ក្រោមការរៀបចំពីសំណាក់គណៈកម្មការប្រកួតបាល់ទាត់ជាតិកម្ពុជា (CNCC) សេនាធិការរបស់សហព័ន្ធកីឡាបាល់ទាត់កម្ពុជា នឹងធ្វើដំណើរប្រកួតជើងទី២របស់ខ្លួននៅល្ងាចថ្ងៃពុធ ទី១៨ ខែកក្កដា ឆ្នាំ២០១៨ សប្ដាហ៍នេះហើយ។
សម្រាប់កម្មវិធីប្រកួតជើងទី២នេះមានក្រុមអង្គរថាយហ្គឺរ ប៉ះក្រុមសូលទីឡូអង្គរ នៅវេលាម៉ោង៣:៣០នាទីរសៀល ហើយក្រុមខេត្តកំពត ជួបក្រុមណាហ្គាវើល នៅវេលាម៉ោង៣រសៀលនៅខេត្តកំពត ហើយក្រុមអាស៊ីអឺរ៉ុប ប៉ះក្រសួងការពារជាតិ លើទីលានកីឡដ្ឋាន AEU Sport Park នៅម៉ោង៣រសៀលដូចគ្នា ក្រុមគីរីវង់អែហ្វស៊ី ជួបក្រុមអគ្គស្នងការដ្ឋាននគរបាលជាតិ នៅម៉ោង៣រសៀលលើទីលានកីឡដ្ឋានខេត្តតាកែវ ខណៈភ្នមពេញក្រោន ប៉ះក្រុមអគ្គីសនីកម្ពុជា នៅម៉ោង៦ល្ងាចលើទីលានកីឡដ្ឋាន RSN Stadium ក្រុមវិសាខា ប៉ះក្រុមព្រះខ័នរាជស្វាយរៀង វេលាម៉ោង៣និង៣០នាទីរសៀល លើទីលានស្តាតចាស់និងក្រុមបឹងកេត ប៉ះក្រុមវេស្ទើនភ្នំពេញ វេលាម៉ោង៦និង៣០នាទីល្ងាចលើទីលានកីឡដ្ឋានស្តាតចាស់។
ចំណែកលទ្ធផលជើងទី១ កន្លងទៅដែលធ្វើឡើងនៅសប្ដាហ៍មុន ក្រុមព្រះខ័នរាជស្វាយរៀង ឈ្នះក្រុមក្រុមវិសាខា ១ទល់០ ហើយក្រុមសូលទីឡូអង្គរ ស្មើគ្នាជាមួយក្រុមអង្គរថាយហ្គឺរ ២ទល់២ ស្របពេលក្រុមអគ្គីសនីកម្ពុជា ចាញ់ក្រុមភ្នំពេញក្រោន ២ទល់១ ខណៈក្រុមក្រុមណាហ្គាវើល ឈ្នះក្រុមកំពត ៥ទល់១។ ក្រុមក្រសួងការពារជាតិ ឈ្នះក្រុមអាស៊ីអឺរ៉ុប ៣ទល់១ ក្រុមអគ្គស្នងការដ្ឋាននគរបាលជាតិ ស្មើគ្នាជាមួយក្រុមគីរីវង់អែហ្វស៊ី ២ទល់២ និងក្រុមវេស្ទើនភ្នំពេញ ចាញ់ក្រុមបឹងកេត ៥ទល់១។
ចំណែក១ប្រកួតទៀតគឺជំនួបរវាងក្រុមខេត្តកោះកុង ប៉ះក្រុមយុវជនសាលាបាល់ទាត់ជាតិបាទី ត្រូវបាន CNCC សម្រេចលើកពេលប្រកួតដោយហេតុផលសមាជិកភាគច្រើនរបស់ក្រុមយុវជនសាលាបាល់ទាត់ជាតិបាទី ជាប់ប្រឡង។ ដូច្នេះជំនួបរវាងក្រុមទាំង២ជើងទី១ ធ្វើនៅថ្ងៃទី២២ខែកក្កដា និងជើងទី២ ប្តូរទៅធ្វើនៅបាទី វិញនៅថ្ងៃទី ២៨ ខែ កក្កដា។ ចំណែក៧គូផ្សេងទៀត ក្រោយប្រកួតចប់ជើងទី១ នៅថ្ងៃពុធ ទី១១ កក្កដា នេះត្រូវបន្តប៉ះគ្នាជើងទី២ នៅថ្ងៃទី១៨ កក្កដា ខាងមុខ។
យោងតាមសេចក្តីជូនដំណឹងរបស់ CNCC ពានរង្វាន់សម្តេចតេជោ ឆ្នាំនេះនឹងរៀបចំចំនួន២វគ្គដោយវគ្គទី១ ហៅថាវគ្គជម្រុះថ្នាក់ខេត្ត និងវគ្គទី២ហៅថាវគ្គជម្រុះថ្នាក់ជាតិ ដែលការប្រកួតចាប់ពីថ្ងៃទី៧ ខែមីនា រហូតដល់ថ្ងៃទី៦ខែតុលា ឆ្នាំ២០១៨។ ចំពោះវគ្គជម្រុះតាមថ្នាក់ខេត្តបែងចែក ការប្រកួតជា២វគ្គខុសគ្នាទៀតគឺវគ្គជម្រុះតាមពូល (វគ្គជម្រុះបឋម) និងជម្រុះចុងក្រោយ។
វគ្គជម្រុះតាមពូលថ្នាក់ខេត្តមានទាំងអស់២៧ក្រុមបែងចែកជា៥ពូល ជាលទ្ធផលក្រុមល្អជាងគេ ពីលេខ១ដល់លេខ៣ បូកទាំងក្រុមលេខ៤ល្អបំផុតក្នុងចំណោមពូលទាំង៥មានឈ្មោះឡើងទៅវគ្គ១៦ក្រុមចុងក្រោយ។ ចំណែកវគ្គជម្រុះជុំចុងក្រោយ យកក្រុមទាំង១៦ចាប់គូគ្នាប្រកួតជាបន្តបន្ទាប់ រហូតដល់វគ្គផ្ដាច់ព្រ័ត្រ។ ក្រុមដែលឡើងដល់វគ្គពាក់កណ្ដាលផ្ដាច់ព្រ័ត្រ (៤ក្រុមខ្លាំងជាងគេ) មានឈ្មោះឡើងទៅប្រកួតដណ្តើមជើងឯកថ្នាក់ជាតិ (យុវជនសាលាបាល់ទាត់ជាតិឈ្នះជើងឯក)។ ចំណែកក្រុមខ្លាំងជាងគេទាំង៤មាន U18សាលាបាល់ទាត់ជាតិ គីរីវង់អែហ្វស៊ី កំពត និងកោះកុង។
ចំណែកការប្រកួតជើងឯកថ្នាក់ជាតិវិញមានក្រុមចំនួន១២ជាសមាជិកពានរង្វាន់លីគកំពូលកម្ពុជានៅរង់ចាំបូកជាមួយក្រុមចំនួន៤ខ្លាំងជាងគេមកពីការប្រកួតជម្រុះជើងឯកថ្នាក់ខេត្ត។ ដោយចាប់ឆ្នោតរើសគួប្រកួតប្តូរទឹកដីគ្នា (ចំនួន២លើក) ក្នុងវគ្គ៨ក្រុមចុងក្រោយរហូតដល់វគ្គផ្ដាច់ព្រ័ត្រតែម្តង។ យ៉ាងណាក្តីវគ្គពាក់កណ្ដាលផ្ដាច់ព្រ័ត្រនិងវគ្គផ្ដាច់ព្រ័ត្រធ្វើឡើងនៅពហុកីឡដ្ឋានជាតិក្នុងរាជធានីភ្នំពេញ ទាំងក្នុងវគ្គជម្រុះជើងឯកថ្នាក់ខេត្តនិងវគ្គជម្រុះជើងឯកថ្នាក់ជាតិក្នុងពានរង្វាន់នេះ៕
Source: Kampuchea Thmey Daily
0 Comments