ភ្នំពេញ ៖ បុរសជនជាតិចិន៥នាក់ ត្រូវបានសមត្ថកិច្ចអន្តោប្រវេសន៍ ធ្វើការបង្ហាញមុខជាសាធារណៈ កាលពីរសៀលថ្ងៃទី១៧ ខែកក្កដា ឆ្នាំ២០១៨ នៅក្នុងបរិវេណ អគ្គនាយកដ្ឋានអន្តោប្រវេសន៍ មុននឹងបណ្តេញពីព្រះរាជាណាចក្រកម្ពុជា ។
ការបង្ហាញមុខជនជាតិចិនទាំង ៥នាក់នេះ ប្រព្រឹត្តឡើង ក្រោមវត្តមានលោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋាន ស៊ើបអង្កេត និងអនុវត្តនីតិវិធី នៃ អគ្គនាយកដ្ឋានអន្តោប្រវេសន៍។
លោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋាន ស៊ើបអង្កេត និងអនុវត្តនីតិវិធី នៃ អគ្គនាយកដ្ឋានអន្តោប្រវេសន៍ បានមានប្រសាសន៍ថា ការបណ្តេញជនជាតិចិនទាំង ៥នាក់នេះ គឺដោយសារប្រព្រឹត្តអំពើហិង្សា ដោយចេតនា ដែលធ្វើឲ្យខូចខាតទ្រព្យសម្បត្តិអ្នកដទៃ និងបង្កអុកឡុក ចលាចល ដែលនាំឲ្យប៉ះពាល់សណ្តាប់ធ្នាប់សាធារណ និងសន្តិសុខជាតិ នៅខេត្តព្រះសីហនុ កាលពីថ្ងៃទី១៣ ខែកក្កដា ឆ្នាំ២០១៨។
លោកឧត្តមសេនីយ៍ឯក អ៊ុក ហៃសីឡា មានប្រសាសន៍បន្តថា បុរស ជនជាតិចិនទាំង ៥នាក់ ដែលបានបង្ហាញមុខជាសាធារណៈ មុននឹងធ្វើការបណ្តេញចេញពីព្រះរាជាណាចក្រកម្ពុជា នារសៀលថ្ងៃនេះ គឺពួកគេ មានលិខិតឆ្លងដែន ត្រឹមត្រូវ ប៉ុន្តែមិនមានសៀវភៅការងារ។
ជាមួយគ្នានេះលោកឧត្តមសេនីយ៍ឯក អ៊ុក ហៃសីឡា ក៏បានសំណូមពរ ទៅម្ចាស់ក្រុមហ៊ុន សហគ្រាស ទាំងអស់ នៅពេលទទួលពលករមកធ្វើការនៅព្រះរាជាណាចក្រម្ពុជា ត្រូវពិនិត្យអត្តចរិត លក្ខណះបុគ្គលិក និងមានឯកសារ ពាក់ព័ន្ធឲ្យបានត្រឹមត្រូវ ជៀសវាងមានការបណ្តេញចេញ ដូចករណីខាងលើនេះ៕
Source: Kampuchea Thmey Daily
0 Comments