ក្រុមបាល់ទាត់ជម្រើសជាតិយុវជនក្រោមអាយុ១៦ឆ្នាំ (U16) របស់កម្ពុជា បានចេញទៅហ្វឹកហាត់នៅប្រទេសម៉ាឡេស៊ី រយៈពេល១០ថ្ងៃមុនចេញដំណើរទៅប្រកួតក្នុងពានរង្វាន់ជើងឯកប្រចាំតំបន់អាស៊ាន 2018 AFF U16 Championship នៅចុងខែកក្កដា ឆ្នាំ២០១៨ ដែលគ្រោងធ្វើឡើងនៅទីក្រុង Solo ក្នុងប្រទេសឥណ្ឌូណេស៊ី។
ក្រុមU16កម្ពុជា ដឹកនាំដោយលោកLee Tae Hoon គ្រូបង្វឹករបស់ក្រុម យុវជនសាលាបាល់ទាត់ជាតិបាទី។ បុរសកូរ៉េខាងត្បូង រូបនេះបានប្រាប់មុនចេញដំណើរថា៖«យើងត្រូវចេញទៅហ្វឹកហាត់នៅប្រទេសម៉ាឡេស៊ី សិនគឺថ្ងៃទី១៧ ខែកក្កដា ហើយហ្វឹកហាត់នៅទីនោះរយៈពេល១០ថ្ងៃ។ តាមគម្រោងនៅថ្ងៃទី២០ ខែកក្កដា យើងត្រូវប្រកួតមិត្តភាពកម្តៅសាច់ដុំជាមួយម្ចាស់ផ្ទះម៉ាឡេស៊ី ហើយនៅថ្ងៃទី២៣ ខែកក្កដា យើងត្រៀមប្រកួត១លើកទៀតដោយប៉ះក្រុមក្នុងស្រុករបស់ម៉ាឡេស៊ី។ ចប់ការប្រកួតយើងបន្តដំណើរទៅប្រកួតនៅឥណ្ឌូណេស៊ី តែម្តង»។
ងាកទៅពានរង្វាន់ 2018 AFF U16 Championship វិញមានក្រុមត្រៀមចូលរួមចំនួន១១ ចាប់ដំណើរការប្រកួតពីថ្ងៃទី២៩ ខែកក្កដា ដល់ថ្ងៃទី១១ ខែសីហា ឆ្នាំ២០១៨ ដោយប្រើប្រាស់ទីលានចំនួន២គឺកីឡដ្ឋាន Gelora Joko Samudro Stadium និងកីឡដ្ឋានGelora Delta Stadium។ យោងតាមការចាប់ឆ្នោតបែងចែកពូលរបស់សហព័ន្ធកីឡាបាល់ទាត់អាស៊ាន (AFF) មានពូល A ក្រុមម្ចាស់ផ្ទះឥណ្ឌូណេស៊ី, វៀតណាម, មីយ៉ាន់ម៉ា, កម្ពុជា, ទីម័រខាងកើត និងហ្វីលីពីន ខណៈពូល B មានថៃ, ម៉ាឡេស៊ី, សិង្ហបុរី, ឡាវ និងប្រ៊ុយណេ។
សម្រាប់កាលវិភាគប្រកួតក្នុងពូលឃើញថាកម្ពុជា ត្រូវប៉ះក្រុមវៀតណាម ក្នុងជំនួបបើកពូលក្នុងថ្ងៃទី២៩ ខែកក្កដា ហើយនៅថ្ងៃទី៣១ កក្កដា បន្តប៉ះក្រុមហ្វីលីពីន ខណៈនៅថ្ងៃទី២ ខែសីហា កម្ពុជា ជួបក្រុមទីម័រខាងកើត នៅថ្ងៃទី៤ ខែសីហា កម្ពុជាត្រូវប៉ះក្រុមមីយ៉ាន់ម៉ា និងនៅថ្ងៃទី៦ ខែសីហា កម្ពុជា ប្រកួតបិទពូលជាមួយម្ចាស់ផ្ទះឥណ្ឌូណេស៊ី៕
Source: Kampuchea Thmey Daily
0 Comments