កូរ៉េ ៖ ប្រធានសមាគមអ្នកនាំចូលរបស់កូរ៉េ លោក Myoung-Jin Shin បានមានប្រសាសន៍បញ្ជាក់ថា លោកមានចំណាប់អារម្មណ៍ លើផលិតផលកៅស៊ូ របស់កម្ពុជា ហើយថា លោកនឹងដឹកនាំក្រុមការងាររបស់លោកទៅសិក្សាលម្អិតអំពីផលិតផលកៅស៊ូរបស់កម្ពុជា ដើម្បីពិនិត្យមើលលទ្ធភាពថាតើគួរត្រូវទៅបង្កើតរោងចក្រដើម្បីកែច្នៃកៅស៊ូនៅលើទឹកដីកម្ពុជា ឬក៏នាំជ័រកៅស៊ូមកធ្វើការកែច្នៃនៅប្រទេសកូរ៉េតែម្តង។
ការបង្ហាញពីចំណាប់អារម្មណ៍បែបនេះរបស់Myoung-Jin Shin បានធ្វើឡើងកាលពីព្រឹកថ្ងៃទី១៧ ខែកក្កដា ឆ្នាំ២០១៨ ខណៈលោកដឹកនាំប្រតិភូសមាគមអ្នកនាំចូលរបស់កូរ៉េ (Korea Importer Association)ជំនួបការសំដែងការគួរសម និងពិភាក្សាការងារ ជាមួយលោកឡុង ឌីម៉ង់ ឯកអគ្គរាជទូតកម្ពុជាប្រចាំនៅប្រទេសកូរ៉េខាងត្បូង។
ជាកិច្ចឆ្លើយតប លោកអគ្គរាជទូតបានសំដែងនូវការស្វាគមន៍ដល់ប្រតិភូដែលចាប់អារម្មណ៍លើផលិតផលកៅស៊ូរបស់កម្ពុជា។ លោកឡុង ឌីម៉ង់បានបន្ថែមថា កម្ពុជាមានផ្ទៃដីទូលាយសម្រាប់ដំណាំកៅស៊ូ ដែលអាចផ្គត់ផ្គង់កៅស៊ូតាមតម្រូវការ និងបានជំរុញឲ្យក្រុមហ៊ុនរបស់កូរ៉េ ទៅវិនិយោគលើការផលិត និងកែច្នៃដោយផ្ទាល់នៅប្រទេសកម្ពុជាតែ ម្តង ព្រោះថារាជរដ្ឋាភិបាលកម្ពុជាមានគោលនយោបាយលើកទឹកចិត្តយ៉ាងច្រើនដល់វិនិយោគិន និងបានសន្យាថានឹងជួយសម្របសម្រួលដល់ការសិក្សាស្វែងយល់របល់ប្រតិភូនៅប្រទេសកម្ពុជា ឲ្យបានរលូន និងជោគជ័យផងដែរ។
បន្ថែមពីនោះ លោកអគ្គរាជទូត បានស្នើសុំឲ្យសមាគមអ្នកនាំចូលកូរ៉េ ពិចារណាផងដែរលើការនាំចូលនូវផលិតផលកសិកម្មរបស់កម្ពុជាដទៃទៀតដែលប្រទេសកូរ៉េ មានតម្រូវការប្រើប្រាស់៕
Source: Kampuchea Thmey Daily
0 Comments