បាត់ដំបង ៖ ដាវសាំម៉ូរ៉ៃជាច្រើនដើម រួមជាមួយនឹងថ្នាំញៀនមួយចំនួន ត្រូវបានសមត្ថកិច្ចក្របួចបាន ព្រមទាំងមុខសញ្ញាសង្ស័យចំនួន២នាក់ ផងដែរ ដើម្បីបញ្ជូនខ្លួនទៅកាន់ស្នងការដ្ឋា នគរបាលខេត្តបាត់ដំបង ខណៈដែលជនសង្ស័យទាំងនេះកំពុងធ្វើសកម្មភាពជាក់ស្តែង។
កិច្ចប្រតិបត្តិការដែលធ្វើឡើងដោយកម្លាំងជំនាញនេះ បានប្រព្រឹត្តឡើងកាលពីថ្ងៃទី ១៤ ខែកក្កដា ឆ្នាំ២០១៨ វេលាម៉ោង ៥ ល្ងាច ត្រង់ចំណុចក្រុមទី២ ភូមិបឹងរាំង សង្កាត់អូរម៉ាល់ ក្រុងបាត់ដំបង ខេត្តបាត់ដំបង ដែលកិច្ចប្រតិបត្តិការនេះបានបង្ក្រាបករណី ជួញដូរដោយខុសច្បាប់នូវសារធាតុញៀន ក្នុងបទល្មើសជាក់ស្តែង ហើយក៏បានឃាត់ខ្លួនជនសង្ស័យបានចំនួន ២ នាក់។
នៅក្នុងកិច្ចប្រតិបត្តិការនេះ សមត្ថកិច្ចបានឃាត់ខ្លួនជនសង្ស័យបានចំនួន២នាក់ ដែលជនទាំងនោះមានឈ្មោះ ភឺន សំបូរ (ហៅ មាំ) ភេទប្រុស អាយុ ៣៣ឆ្នាំ មានទីលំនៅក្រុមទី២ ភូមិបឹងរាំង សង្កាត់អូរម៉ាល់ ក្រុងបាត់ដំបង (ជាមេក្លោងជួញដូរថ្នាំញៀន) និង ឈ្មោះ ភឺន សុបិន្ត (ហៅ ម៉ន) ភេទប្រុស អាយុ២៧ឆ្នាំ មានទីលំនៅក្រុមទី២ ភូមិបឹងរាំង សង្កាត់អូរម៉ាល់ ក្រុងបាត់ដំបង (អ្នកចែកចាយ និង ផ្តល់ទីកន្លែងប្រើប្រាស់ថ្នាំញៀន)។
វត្ថុតាងដែលដកហូតបានរួមមាន ថ្នាំញៀនប្រភេទម៉ាទឹកកក ចំនួន ២ ថង់ ទូរសព្ទ័ដៃ ចំនួន ២ គ្រឿង កាំបិត និង ដាវសាំម៉ូរ៉ៃ ចំនួន ១១ដេីម ដែកឆាប (ចំពុះទុង) ចំនួន ១ដើមរួមនឹងសំភារៈសំរាប់ចែកចាយ និង ប្រើ ប្រាស់ថ្នាំញៀនមួយចំនួនធំ ដោយ បច្ចុប្បន្នជនទាំង២នាក់នេះ ត្រូវបានកម្លាំងជំនាញកំពុងកសាងសុំរឿងបញ្ជូនតាមនីតិវិធីច្បាប់៕
Source: Kampuchea Thmey Daily
0 Comments