បាត់ដំបង ៖ ជនសង្ស័យចំនួន៣នាក់ ដែលជាមុខសញ្ញាចែកចាយថ្នាំញៀនយ៉ាងសកម្ម ត្រូវបានកម្លាំងសមត្ថកិច្ចធ្វើការបង្ក្រាប ព្រមទាំងបានដកហូតនូវប្រភេទថ្នាំញៀនគឺម៉ាទឹកកក មួយចំនួនផងដែរ ខណៈដែលមុខសញ្ញាទាំងនេះ បាននិង កំពុងធ្វើសកម្មភាពជាក់ស្តែងនៅក្នុងស្ថានីយរថភ្លើង។
តាមការអះអាងពីលោក វរសេនីយ៍ទោ ស៊ាន សុណាល់ នាយការិយាល័យ នគរបាល ប្រឆាំងគ្រឿងញៀន នៃស្នងការដ្ឋាន នគរបាល ខេត្តបាត់ដំបង បានឲ្យដឹងថា ការឃាត់ខ្លួនជនសង្ស័យទាំង៣នាក់នេះ បានប្រព្រឹត្តឡើងកាលពីថ្ងៃទី ១៣ ខែកក្កដា ឆ្នាំ២០១៨ វេលាម៉ោង ១១ និង ៤០ នាទី ថ្ងៃត្រង់ នៅក្នុងស្ថានីយ៍រថភ្លើង ស្ថិតក្នុងភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង។
លោកនាយការិយាល័យបានបន្តថា នៅក្នុងកិច្ចប្រតិបត្តិការនេះ កំលាំងបានឃាត់ខ្លួនជនសង្ស័យបានចំនួន ៣ នាក់ គឺ១.ដិប សុវណ្ណារ៉ា ហៅកីឡា ភេទប្រុស អាយុ៣៥ឆ្នាំ ២.ឈ្មោះ ជួន ប៊ុនធឿន ហៅតិប ភេទប្រុស អាយុ២៩ឆ្នាំ អ្នកទាំង២ រស់នៅភូមិទួលតាឯក សង្កាត់ទួលតាឯក និង៣.ឈ្មោះ ឡុង ភិរម្យ ភេទប្រុស អាយុ២៩ឆ្នាំ រស់នៅភូមិកំពង់ក្របី សង្កាត់ស្វាយប៉ោ ក្រុងបាត់ដំបង។
វត្ថុតាងដែលសមត្ថកិច្ចដកហូតរួមមាន ថ្នាំញៀនប្រភេទម៉ាទឹកកក ចំនួន ១៣ កូនថង់ស្មើនឹង ៨,៤៦ ក្រាម ទូរស័ព្ទដៃ ចំនួន៣គ្រឿង និងសម្ភារៈសម្រាប់វេចខ្ចប់ ប្រើប្រាស់មួយចំនួនថែមទៀត ដោយបច្ចុប្បន្នជនសង្ស័យទាំងអស់នេះ កំពុងចាត់វិធានការតាមផ្លូវច្បាប់៕
Source: Kampuchea Thmey Daily
0 Comments