ភ្នំពេញ ៖ ជនសង្ស័យម្នាក់ ក្នុងចំណោមបក្ខពួក៤នាក់ ត្រូវបានកម្លាំងនគរបាលប៉ុស្តិ៍ស្រះចកនៃអធិការខណ្ឌដូនពេញ ឃាត់ខ្លួន បន្ទាប់ពីរូបគេបានធ្វើសកម្មភាពឆក់កាបូបក្រវាត់ចង្កេះតែមិនបានសម្រេច បណ្តាលឲ្យស្ត្រីរងគ្រោះត្រូវដួលធ្លាក់ពីលើម៉ូតូរងរបួសធ្ងន់ធ្ងរ ហើយជនសង្ស័យព្យាយាមជិះរត់គេចខ្លួន ក៏ត្រូវសមត្ថកិច្ចកំពុងល្បាតនៅក្បែរនោះ ចាប់ក្របួចជាប់ម្នាក់ ចំណែក៣នាក់ទៀតគេចខ្លួនបាត់។
ករណីឃាត់ខ្លួនចោរឆក់កាបូបខាងលើនេះ បានកើតឡើងកាលពីវេលាម៉ោង៧យប់ថ្ងៃចន្ទ ៤កើត ខែទុតិមាសាឍ ឆ្នាំច សំរឹទ្ធស័ក ព.ស២៥៦២ ត្រូវនឹង ថ្ងៃទី១៦ ខែកក្កដា ឆ្នាំ២០១៨ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
យោងតាមប្រភពពីមន្ត្រីប៉ុស្តិ៍នគរបាលស្រះចក បានឲ្យដឹងថា ជនសង្ស័យម្នាក់ ដែលឃាត់ខ្លួននេះឈ្មោះ រ័ត្ន សុគន្ធណារាក់ ភេទប្រុស អាយុ១៧ឆ្នាំ មុខរបរមិនពិតប្រាកដ ស្នាក់នៅផ្ទះជួល ផ្លូវលំ ភូមិចុងខ្សាច់ សង្កាត់ទួលសង្កែ ខណ្ឌឫស្សីកែវ រាជធានី ភ្នំពេញ ពីបទលួចមានស្ថានទម្ងន់ទោស ប្រើអំពើហិង្សា(ឆក់កាបូបក្រវាត់ចង្កេះបណ្តាលឲ្យជនរងគ្រោះរងរបួស)។ វត្ថុតាងចាប់យកម៉ូតូ០១គ្រឿងម៉ាកBeat ពណ៌ខ្មៅ ពាក់ស្លាកលេខ ភ្នំពេញ1GT-3293 (ជារបស់ជនសង្ស័យជិះធ្វើសកម្មភាព) ។ ចំណែកជនរងគ្រោះឈ្មោះ សុខ ស្រីមុំ ភេទស្រី អាយុ៥២ឆ្នាំ ជនជាតិវៀតណាម មុខរបរលក់កាហ្វេ ស្នាក់នៅផ្ទះលេខ៣៤ផ្លូវជាតិលេខ៥ ភូមិ១៦សង្កាត់ស្រះចក ខណ្ឌដូនពេញ រាជធានីភ្នំពេញ (រងរបួសនៅក្រោមក្លៀកខាងឆ្វេង)។
សមត្ថកិច្ចបានឲ្យដឹងទៀតថា នៅមុនពេលកើតហេតុជនរងគ្រោះគាត់ចេញពីកន្លែងដូរលុយwingនៅម្តុំឫស្សីកែវក៏ជិះម៉ូតូតែម្នាក់ឯង ដាក់លុយក្នុងកាបូបក្រវាត់ចង្កេះពេលធ្វើដំណើរដល់ចំណុចខាងមុខមណ្ឌលសុខភាពដូនពេញក៏ជនសង្ស័យចំនួន៤នាក់ជិះម៉ូតូ២គ្រឿងមកអែបជនរងគ្រោះរួចក៏ជនសង្ស័យម្នាក់ក្នុងចំណោមបក្ខពួកបានធ្វើសកម្មភាពឆក់ផ្តាច់យកកាបូប ពេលនោះជនរងគ្រោះក៏ប្រទាញប្រទង់ទៅវិញទៅមក ធ្វើឲ្យជនរងគ្រោះ និង ជនសង្ស័យក៏ដួលម៉ូតូគាប់ជនជនរងគ្រោះគាត់ស្រែកឆោឡោថា ចោរៗផងនោះក៏ត្រូវបានកម្លាំងល្បាតរបស់ប៉ុស្តិ៍ស្រះចក ជួយអន្តរាគមន៍ចាប់បានជនសង្ស័យម្នាក់ ព្រមទាំងដកហូតបានម៉ូតូ១គ្រឿង និង កាបូបរបស់ជនរងគ្រោះមកវិញផងដែរ។ តែចំណែកជនសង្ស័យ៣នាក់ទៀតគេចខ្លួនបាត់។បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋានខណ្ឌដូនពេញដើម្បីកសាងសំណុំរឿងចាត់ការតាមនីតិវិធី៕
Source: Kampuchea Thmey Daily
0 Comments