សៀមរាប ៖ នៅពេលថ្មីៗនេះសកម្មភាពដឹកជញ្ជូនឈើនៅខេត្តសៀមរាបបានកើតឡើងគួរឲ្យព្រួយបារម្ភ ខណៈគេបានដាក់ការសង្ស័យថា សមត្ថកិច្ចជំនាញនៅតាមតំបន់នីមួយៗជាអ្នកបើកភ្លើងខៀវឲ្យមានបទល្មើសកើតឡើងជាថ្នូរនឹងលាភសក្ការៈយ៉ាងធំធេង ហើយការចុះចាប់រថយន្តម្តងៗគឺដោយសារមានការផ្តល់ដំណឹងពីអ្នកសារព័ត៌មាន ទើបមានកម្លាំងសមត្ថកិច្ចចុះមកចាប់។
ជាក់ស្តែងនៅវេលាម៉ោង២២និង៣០នាទីថ្ងៃទី១៨ ខែកក្កដាឆ្នាំ២០១៨ នៅចំណុចរង្វង់មូលតាកុះ ក្នុងឃុំព្រះដាក់ ស្រុកបន្ទាយស្រី ខេត្តសៀមរាប មានរថយន្តសាំយ៉ុងមួយគ្រឿងដឹកឈើលេខ១ពេញប្រៀប ហើយត្រូវបានអ្នកសារព័ត៌មានម្នាក់រាយការណ៍មកកម្លាំងនគរបាលសេដ្ឋកិច្ចខេត្តសៀមរាប ចុះមកចាប់រួចអូសយកមកឲ្យមេព្រៃក្នុងមូលដ្ឋានខាងលើនេះ។
លោកវរសេនីយ៍ឯក សឿន សេន នាយការិយាល័យនគរបាលប្រឆាំងបទល្មើសសេដ្ឋកិច្ចខេត្តសៀមរាប បានឲ្យដឹងនៅរសៀលថ្ងៃទី១៩ខែកក្កដាឆ្នាំ២០១៨នេះថា រថយន្តសាំយ៉ុងមួយគ្រឿងដឹកឈើប្រភេទសុក្រមនិងផ្ចឹកនោះ កម្លាំងរបស់លោកបានចាប់មែនហើយលោកបានប្រគល់ជូនរដ្ឋបាលព្រៃឈើរួចរាល់ហើយ។
លោកបន្តថា បើចង់ដឹងរឿងនោះសួរទៅមេព្រៃទៅព្រោះលោកកំពុងជាប់រវល់។ ទាក់ទិននឹងករណីនេះដែរ លោកម៉ុង ប៉ុនលីម នាយខណ្ឌរដ្ឋបាលព្រៃឈើខេត្តសៀមរាប បានឲ្យដឹងថា រឿងនេះកូនចៅលោកមិនទាន់រាយការណ៍មកទេ។ ចឹងហើយលោកឲ្យរង់ចាំដំណឹងពីកូនចៅលោកសិន។
ការទន្ទឹងរង់ចាំដំណឹងរបស់លោកនាយខណ្ឌតាំងពីព្រឹករហូតដល់យប់នៅតែមិនទាន់មានដំណឹង។ ប្រភពព័ត៌មានបានឲ្យដឹងថា រថយន្តសាំយ៉ុងនោះដឹកឈើប្រភេទសុក្រមនិងផ្ចឹកពេញប្រៀប ដែលមានឈើប្រមាណជា៣ម៉ែត្រគីប។
ប្រភពបន្តថា ម្ចាស់រថយន្តមានឈ្មោះឈីវ រស់នៅស្រុកត្រពាំងប្រាសាទខេត្តឧត្តរមានជ័យ។រថយន្តនោះពាក់ស្លាកលេខ2l1802 ពណ៌ទឹកប្រាក់។ ជុំវិញករណីចាប់ឈើខាងលើនេះមហាជនមានការងឿងឆ្ងល់ថា ហាក់មានអាថ៌កំបាំងនៅពីក្រោយ។ ប្រភពបន្តថា មន្ត្រីជំនាញខ្លះតែងតែចាប់ឈើហើយយកវត្ថុតាងលាក់ទុក ដើម្បីយកទៅលក់បន្ត។
បច្ចុប្បន្នរថយន្តដឹកឈើខាងលើត្រូវសមត្ថកិច្ចអូសយកមករក្សាទុកនៅផ្នែករដ្ឋបាលព្រៃឈើបន្ទាយស្រី ដែលមានទីតាំងក្នុងឃុំព្រះដាក់ ស្រុកបន្ទាយស្រី៕
Source: Kampuchea Thmey Daily
0 Comments