អ្នកប្រដាល់កម្ពុជាផល សោភ័ណ្ឌ ក្លិបតាឡីដំរីមានរិទ្ធ ត្រូវអ្នករៀបចំកម្មវិធីប្រដាល់ប្រចាំសង្វៀនបាយ័នផ្គូផ្គងអោយជួបប្រកួត ជាមួយ Fa Michai Thaharphran26 អ្នកប្រដាល់ជើងខ្លាំងថៃ នាយប់ថ្ងៃអាទិត្យទី២២កក្កដា២០១៨នេះក្នុងកម្មវិធីប្រដាល់ខារ៉ាបាវ។
Fa Michai ធ្លាប់មកប្រកួតនៅស្រុកខ្មែរប៉ុន្មានលើកហើយកន្លងមក តែមិនដែលជួបជាមួយផលសោភ័ណ្ឌទេ។ Fa Michai និងផលសោភ័ណ្ឌ នឹងប្រកួតគ្នាក្នុងប្រភេទទម្ងន់៦៣,៥០០គីឡូក្រាម ។
អ្នកប្រដាល់ថៃនេះ ធ្លាប់ប្រកួតបាន៦១លើក ដោយវាយឈ្នះ៥១លើក ចាញ់០៩លើក និងស្មើ០១លើក ។ បើតាមការស្រាវជ្រាចពីប្រវត្តិរបស់កីឡាករថៃរូបនេះ បានបញ្ជាក់ថា អ្នកប្រដាល់ថៃរូបនេះ គេមិនធម្មតាឡើយដោយគេជាម្ចាស់ខ្សែក្រវាត់ដល់ទៅពីរឯណោះ ។
ទោះជាយ៉ាងណា Fa Michai មិនដឹងថា អាចវាយឈ្នះអ្នកប្រដាល់កម្ពុជាផល សោភ័ណ្ឌ ឬអត់នោះទេ? ។ អ្នកប្រដាល់ថៃម្នាក់នេះ មានកាយសម្បទារឹងមាំ និងមានកម្ពស់ខ្ពស់ថែមទៀត គឺ១,៧១ម៉ែត្រ ។
ផល សោភ័ណ្ឌជាអ្នកប្រដាល់ជើងខ្លាំងរបស់កម្ពុជា ដែលធ្លាប់ប្រកួតជាមួយអ្នកប្រដាល់ថៃ មិនតិចជាង៦០នាក់ទេនាពេលកន្លងមក។ និយាយជារួម ក្នុងការប្រកួតចំនួន១២៩លើករបស់សោភ័ណ្ឌ គេវាយឈ្នះ១១៣លើក ចាញ់១៤លើក និងស្មើ០២លើក ។ ការប្រកួតចុងក្រោយជាមួយថៃ ផល សោភ័ណ្ឌ វាយឈ្នះអ្នកប្រដាល់ថៃ ហ្វានិមិត្ត ក្នុងទឹកទី៤ ។
យ៉ាងណា សំរាប់ការជួបអ្នកប្រដាល់ថៃFa Michaiលើកនេះ មិនដឹងថាផលសោភ័ណ្ឌអាចយកឈ្នះបានឬអត់នោះទេ ព្រោះថាអ្នកប្រដាល់ថៃរូបនេះ គឺជាជើងខ្លាំងប្រចាំនៅស្រុកថៃ ។ ចាំមើល តើផលសោភ័ណ្ឌយកឈ្នះFa Michai បានឬអត់ ? ។
ឡៅ ចិត្រា អ្នកប្រដាល់ក្លិបកងពលតូចទ័ពឆ័ត្រយោង៩១១នឹងត្រូវជួបជាមួយអ្នកប្រដាល់ឡាវឈ្មោះKhunpholnoy Surarith។ពួកគេទាំងពីរនេះ ជួបគ្នាក្នុងទម្ងន់៦០គីឡូក្រាម។
Khunpholnoy ជាអ្នកប្រដាល់ជើងខ្លាំងនៅស្រុកឡាវ ។ តាមប្រវត្តិ Khunpholnoy មិនធ្លាប់មកប្រកួតនៅស្រុកខ្មែរនោះទេកន្លងមក ។ ទោះជាយ៉ាងនេះក្តី អ្នកប្រដាល់ឡាវរូបនេះ ប្រហែលមិនមែនជាបន្លាក្នុងកែវភ្នែករបស់ឡៅ ចិត្រានោះទេ ព្រោះចិត្រាមានបច្ចេកទេសល្អជាង តាមរយះការប្រកួតរបស់គេកន្លងមកនោះ ។
ឡៅ ចិត្រា គេធ្លាប់ផ្តួលអ្នកប្រដាល់ថៃច្រើននាក់ហើយ ជាពិសេសក្នុងចំណោមការប្រកួតជាមួយថៃជិត៤០លើកកន្លងមកនេះ គឺចិត្រាចាញ់តែ២លើកប៉ុណ្ណោះ។ចិត្រា ទាំងបទពិសោធន៍ ទាំងស្នៀតប្រដាល់ ល្បិចកលនិងកាយសម្បទា សុទ្ធតែល្អនិងខ្លាំង ដែលអាចទុកចិត្តបានថា អាចយកឈ្នះលើអ្នកប្រដាល់ឡាវ Khunpholnoy បានមិនខាន ។
ទោះជាយ៉ាងណា សម្រាប់ការប្រកួតរបស់ឡៅ ចិត្រា លើកនេះ គេមិនហ៊ានអះអាងមុនថា ឡៅ ចិត្រានឹងឈ្នះ Khunpholnoy នោះទេ ព្រោះអ្នកប្រដាល់ឡាវរូបនេះ ក៏មិនជាអន់ប៉ុន្មានដែរ។ ឡៅ ចិត្រា ប្រកួតចុងក្រោយនេះ គេបានផ្តួលយកឈ្នះអ្នកប្រដាល់ថៃFarshoot shaiក្នុងទឹកទី២ កាលពីថ្ងៃទី០៦កក្កដា២០១៨កន្លងមកនេះ ។
ចំណែក ការប្រកួតរវាងអ្នកប្រដាល់រួមជាតិវិញ ចាន់ វ៉ារិទ្ធ អ្នកប្រដាល់ក្លិបនិរោធមានជ័យ នឹងជួបប្រកួតជាមួយអ្នកប្រដាល់ស៊ឹម សំ ក្លិបយុវវាលស្បូវខណ្ឌច្បារអំពៅ ។ ពីរនាក់នេះ ជួបគ្នាក្នុងប្រភេទទម្ងន់៦០គីឡូក្រាម ។ យ៉ាងណា រវាងពួកគេពីរនាក់នេះ ពុំមាននរណាហ៊ានទស្សន៍ទាយមុនថា អ្នកណាឈ្នះ អ្នកណាចាញ់នោះឡើយ ។ ចាំមើល តើ ចាន់ វា់រិទ្ធ អាចយកឈ្នះស៊ឹម សំ បានឬអត់ ?៕
Source: Kampuchea Thmey Daily
0 Comments