ផ្លូវជាតិលេខ៤ ត្រូវបានបិទចរាចរណ៍សាជាថ្មី បន្ទាប់ពីជំនន់ទឹកភ្លៀងលិចត្រង់ចំណុចបង្គោលគីឡូម៉ែត្រលេខ៩០ និង១១៥

កំពង់ស្ពឺ ៖ លោក វ៉ី សំណាង អភិបាលខេត្តកំពង់ស្ពឺ បានប្រកាសបិទផ្លូវជាតិលេខ៤ ជាបណ្តោះអាសន្ន នៅព្រឹកថ្ងៃទី២០ ខែកក្កដា ឆ្នាំ២០១៨នេះ ដោយសារជំនន់ទឹកភ្លៀងបានលិច និងហូរលើកំណាត់ផ្លូវជាតិលេខ៤ ត្រង់ចំណុចបង្គោលគីឡូម៉ែត្រលេខ៩០ មុខបន្ទាយយោធាថ្លុកតាសេក ក្នុងឃុំត្រែងត្រយឹង ស្រុកភ្នំស្រួច។

លោក វ៉ី សំណាង អភិបាលខេត្តកំពង់ស្ពឺ បានជូនដំណឹងដល់បងប្អូនប្រជាពលរដ្ឋសាធារណជនទាំងអស់មេត្តាជ្រាបថា “នៅថ្ងៃទី២០ ខែកក្កដា ឆ្នាំ២០១៨នេះ ក្នុងនាមអាជ្ញាធរខេត្តកំពង់ស្ពឺ និង ខេត្តព្រះសីហនុ សូមផ្អាកការធ្វើចរាចរណ៍មួយរយៈតាមផ្លូវផ្លូវជាតិលេខ៤ ដោយសារមូលហេតុ ជំនន់ទឹកភ្លៀងបានកាត់ផ្តាច់ផ្លូវជាតិលេខ៤ ត្រង់គីឡូម៉ែត្រលេខ៩០ (កំពង់ស្ពឺ) និងគីឡូម៉ែត្រលេខ១១៥ ចំណុចស្ពានស្ទឹងសំរោង ឃុំអូរបាក់រទេះ ស្រុកកំពង់សិលា ខេត្តព្រះសីហនុ"។

លោកអភិបាលបានខេត្តកំពង់ស្ពឺ បានបញ្ជាក់ថា បើបងប្អូនមានបំណងអញ្ជើញទៅខេត្តព្រះសីហនុ និងខេត្តកោះកុង សូមមេត្តាប្រើប្រាស់ផ្លូវជាតិលេខ៤១ និង ផ្លូវជាតិលេខ៣វិញ ព្រោះធ្វើដំណើរតាមផ្លូវជាតិលេខមិនអាចទៅមុខរួចនោះទេ។

សូមបញ្ជាក់ថា នៅថ្ងៃទី១៩ ខែកក្កដា ឆ្នាំ២០១៨នេះ ប្រមុខរាជរដ្ឋាភិបាល គឺសម្ដេចតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា បានចេញសេចក្តីណែនាំឲ្យមន្ត្រីពាក់ព័ន្ធទាំងអស់ រួមទាំងអាជ្ញាធរមូលដា្ឋនផងដែរ ត្រូវត្រៀមអន្តរាគមន៍ ដើម្បីកាត់បន្ថយហានិភ័យពីជំនន់ទឹកភ្លៀង ដែលបាននឹងកំពុងកើតឡើងនៅពេលនេះ។

យោងតាមសេចក្ដីណែនាំ ចុះថ្ងៃទី១៩ខែកក្កដា ឆ្នាំ២០១៨ សម្ដេចតេជោ ហ៊ុន សែន បានប្រាប់ឲ្យក្រសួង ស្ថាប័នពាក់ព័ន្ធ អាជ្ញាធរដែនដីរាជធានី-ខេត្ត ត្រូវបង្កើនការយកចិត្តទុកដាក់ ប្រុងប្រយ័ត្ន និងត្រៀមជម្លៀសប្រជាពលរដ្ឋទៅកាន់ទីទួលមានសុវត្ថិភាព ដើម្បីការជីវិត និងទ្រព្យសម្បត្តិរបស់ពួកគាត់។

សម្ដេចតេជោ ហ៊ុន សែន បានណែនាំនៅក្នុងលិខិតនេះថា “យោងតាមការអង្កេតតាមដាន នៅព្យាករណ៍អាកាសធាតុ ដែលបានបង្ហាញដោយក្រសួងធនធានទឹក និងឧតុនិយម ឥទ្ធិពលរបស់ប្រព័ន្ធសម្ពាធទាបមកលើព្រះរាជាណាចក្រកម្ពុជា មានភ្លៀងធ្លាក់ជាបន្ដបន្ទាប់ បានធ្វើឲ្យខេត្តមួយចំនួនកំពុងរងឥទ្ធិពលទឹកភ្លៀង ដូចជាខេត្តកំពត ខេត្តព្រះសីហនុ ខេត្តកោះកុង ខេត្តកំពង់ស្ពឺ ខេត្តបាត់ដំបង ខេត្តប៉ៃលិន ប្រឈមនឹងការជន់លិច។ ដោយឡែក តំបន់ផ្ទៃរងទឹកភ្លៀងរបស់ទន្លេមេគង្គ ក្នុងប្រទេសលាវ និងប្រទេសថៃ ក៏មានភ្លៀងធ្លាក់ច្រើនបង្កឲ្យទឹកទន្លេមេគង្គហក់ឡើងផងដែរ»។

ដោយឡែក សេចក្តីរាយការណ៍ពីអាជ្ញាធរស្រុកកំពង់សិលា បានឲ្យដឹងថា ផ្លូវជាតិលេខ៤ ត្រូវបានជំនន់ទឹកភ្លៀងជន់លិច នៅត្រង់ចំណុចខាងកើតស្ពានស្ទឹងសំរោង សាជាថ្មីម្តងទៀតហើយ នៅយប់រំលងអធ្រាត្រឈានចូលថ្ងៃទី២០ ខែកក្កដា ឆ្នាំ២០១៨នេះ។ ប្រភពព័ត៌មានបានឲ្យដឹងថា ជំនន់ទឹកភ្លៀង ចាប់ជន់លិចស្ពានតាំងសំរោង នៅម៉ោងជាង ២យប់រំលងអធ្រាត្រ ថ្ងៃទី២០ ខែកក្កដា រហូតដល់ព្រឹកនេះ ទឹកបានជន់លិចលើផ្លូវជាតិលេខ៤ កម្ពស់ប្រមាណ ២តឹក ប្រវែងជិត ៦០ម៉ែត្រ។

នៅព្រឹកថ្ងៃទី២០ ខែកក្កដា ឆ្នាំ២០១៨នេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នឹងដឹកនាំមន្ត្រីជំនាញអញ្ជើញចុះទៅមើលផ្លូវជាតិស្ថានភាពលេខ៤ ត្រង់ចំណុចទឹកលិចដោយសារជំនន់ទឹកភ្លៀងនេះផងដែរ។

សូមបញ្ជាក់ថា អាកាសធាតុក្នុងព្រះរាជាណាចក្រកម្ពុជា ក្នុងអំឡុងខេត្តកក្កដានេះ បានទទួលរងឥទ្ធិពលខ្យល់មូស្យុងបង្កឲ្យមានព្យុះភ្លៀងកើតមានតាមតំបន់មាត់សមុទ្រ ខ្ពស់រាប និងតាមតំបន់ជួរភ្នំនានាបានបណ្តាលឲ្យមានទឹកជំនន់ជន់លិចតាមបណ្តាខេត្តមួយចំនួនជាពិសេសខេត្តព្រះសីហនុ កោះកុង កំពង់ស្ពឺ និងតាមកែវតែម្តង៕