កណ្តាល ៖ ថ្នាំញៀនចំនួន៤៥កញ្ចប់ និង ជនសង្ស័យម្នាក់បានត្រូវនគរបាលស្រុកស្អាង បង្ក្រាប នៅថ្ងៃ ច័ន្ទ ០៤កើត ខែទុតិយាសាឍ ឆ្នាំច សំរិទ្ធស័ក ព.ស ២៥៦២ ត្រូវនឹងថ្ងៃទី ១៦ ខែកក្កដា ឆ្នាំ២០១៨ វេលាម៉ោង ១០និង៣០នាទី។
ចំណុច ភូមិ ទួលក្រសាំង ឃុំ រកាខ្ពស់ ស្រុកស្អាង ខេត្តកណ្តាល។ លោកវរសេនីយ៍ឯក សេង សុជាតិ អធិការនគរបាលស្រុកស្អាង បានឲ្យដឹងថា ជនសង្ស័យ ឃាត់ខ្លួនឈ្មោះ សោម វិនដា ភេទប្រុស អាយុ៣១ឆ្នាំ ជនជាតិ ខ្មែរ មុខរបរ រត់ម៉ូតូឌុប បច្ចុប្បន្នស្នាក់នៅភូមិ ថ្មី សង្កាត់តាខ្មៅ ក្រុងតាខ្មៅ ខេត្តកណ្តាល។ ពេលឃាត់ខ្លួនសមត្ថកិច្ចចាប់យកមាន១ / ម្សៅក្រាមពណ៌សថ្លាសង្ស័យថា ជាសារធាតុញៀន(ម៉ាទឹកកក) ចំនួន៤៥កញ្ចប់ ក្នុងនោះ ធំ ០១កញ្ចប់ និងតូច ៤៤កញ្ចប់។ ២ / ម៉ូតូ ចំនួន ០១គ្រឿង ម៉ាក ហុងដា សេ១២៥ សេរីឆ្នាំ ២០១៨ ពណ៌ ខ្មៅ ពាក់ស្លាកលេខ ភ្នំពេញ 1GZ -0564។ ៣ / សម្ភារៈសំរាប់វេចខ្ចប់គ្រឿងញៀនមួយចំនួន។
លោកអធិការបញ្ជាក់ថា នៅថ្ងៃទីខែឆ្នាំវេលាម៉ោងកើតហេតុ ក្រោយទទួលបានព័ត៌មានពីប្រជាពលរដ្ឋល្អថា មានករណីជួញដូរគ្រឿងញៀន នៅចំណុចកើតហេតុខាងលើ។ ភ្លាមនោះកម្លាំងប៉ុស្តិ៍នគរបាលរកាខ្ពស់ បានចុះដល់ចំណុចកើតហេតុ ធ្វើការត្រួតពិនិត្យ ជនសង្ស័យ ឈ្មោះ សោម វិនដា បានរកឃើញម្សៅក្រាមពណ៌សថ្លាសង្ស័យជាសារធាតុញៀន(ម៉ាទឹកកក)ចំនួន ៤៥កញ្ចប់ ក្នុងនោះ ធំ ០១កញ្ចប់ និងតូច ៤៤កញ្ចប់ នៅនឹងខ្លួន រួចឃាត់ខ្លួន រួមនឹងវត្ថុតាង បញ្ជូនមកប៉ុស្តិ៍នគរបាលរដ្ឋបាលរកាខ្ពស់ ដើម្បីសាកសួរ។
នៅចំពោះមុខសមត្ថកិច្ចនគរបាល ឈ្មោះ សោម វិនដា បានសារភាពថា ខ្លួនទិញគ្រឿងញៀន(ម៉ាទឹកកក)ចំនួន ០១កញ្ចប់ធំ តម្លៃ ២០០ដុល្លារ (ពីររយដុល្លារ)ពីបុរសម្នាក់មិនស្គាល់ឈ្មោះនៅចំណុច ទួលស្វាយព្រៃ រាជធានីភ្នំពេញ ដើម្បីយកមកវេចខ្ចប់លក់ក្នុង០១កញ្ចប់តូច តម្លៃ ៤ម៉ឺនរៀល ទៅ៦ម៉ឺនរៀល។ បច្ចុប្បន្នជនសង្ស័យ បានឃាត់ខ្លួននៅអធិការដ្ឋាននគរបាលស្រុកស្អាងដើម្បីបន្ដអនុវត្ដតាមនីតិវិធី៕
Source: Kampuchea Thmey Daily
0 Comments