សម្តេចប្រធានរដ្ឋសភា និងលោកជំទាវ អញ្ជើញបោះឆ្នោតជ្រើសតាំងតំណាងរាស្ត្រ នីតិ កាលទី៦ នៅការិយាល័យលេខ០៧៣២ ខេត្តត្បូងឃ្មុំ
ត្បូងឃ្មុំ ៖ ជាមួយនឹងប្រជាពលរដ្ឋនៅទូទាំងប្រទេសអញ្ជើញទៅបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ នៅតាមមូលដ្ឋានរៀងៗខ្លួន ដោយក្តីរីករាយ សម្តេចអគ្គមហាពញាចក្រី ហេង សំរិន ប្រធានរដ្ឋសភានិងលោកជំទាវ នាព្រឹកថ្ងៃទី២៩ ខែកក្កដានេះ ក៏បានអញ្ជើញទៅបោះឆ្នោតជ្រើសតាំងតំណាងរាស្ត្រនីតិកាលទី៦ នៅការិយាល័យលេខ ០៧៣២ ក្នុងបរិវេណវិទ្យាល័យសម្តេចចក្រីហេង សំរិន អន្លង់ជ្រៃ ភូមិអន្លង់ជ្រៃ ឃុំកក់ ស្រុកពញាក្រែក ខេត្តត្បូងឃ្មុំ។
សូមបញ្ជាក់ថា សម្រាប់ខេត្តត្បូងឃ្មុំមានអ្នកបោះឆ្នោតចំនួន៤សែន២ម៉ឺន៧ពាន់៤០៨នាក់ និងមានការិយាល័យបោះឆ្នោតចំនួន១ពាន់ ២៩៥ ការិយាល័យ ព្រមទាំងមានគណបក្សនយោបាយចូលរួមប្រកួត ប្រជែងចំនួន ១៣ គណបក្ស ក្នុងចំណោមគណបក្សនយោបាយចំនួន ២០ ដែលបានចូលរួមក្នុងការ បោះឆ្នោតឆ្នាំ២០១៨នេះ។ ក្នុងនោះមាន គណបក្សខ្មែររួបរួមជាតិ គណបក្សពន្លឺថ្មី គណបក្សសញ្ជាតិកម្ពុជា គណបក្សសំបុកឃ្មុំសង្គមប្រជាធិបតេយ្យ គណបក្សប្រជាធិបតេយ្យមូលដ្ឋានគណបក្សសម្ព័ន្ធដើម្បីប្រជាធិបតេយ្យ គណបក្សខ្មែរឈប់ក្រ គណបក្សហ្វ៊ុនស៊ិនប៉ិច គណបក្សខ្មែរអភិវឌ្ឍសេដ្ឋកិច្ច គណបក្សយុវជនកម្ពុជា គណបក្សឆន្ទៈខ្មែរ គណបក្សខ្មែរតែមួយ និងគណបក្សប្រជាជនកម្ពុជា។
ដោយឡែកនៅវិទ្យាល័យសម្តេចចក្រីហេងសំរិនអន្លង់ ជ្រៃមានការិយាល័យបោះឆ្នោតចំនួនពីរ គឺការិយាល័យលេខ ០៧៣២ និងការិយាល័យបោះឆ្នោតលេខ ០៧៣៣ ដែលការិយាល័យទាំងពីរនេះមានអ្នកបោះឆ្នោតចំនួន ៧៨៨នាក់។
បើតាមគណៈកម្មាធិការជាតិរៀបចំការបោះឆ្នោតឲ្យដឹងថា ការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨នេះ នៅទូទាំងប្រទេសមានអ្នកបោះឆ្នោតសរុបចំនួន ៨លាន ៣សែន ៨ម៉ឺន ២១៧នាក់៕
Source: Kampuchea Thmey Daily
0 Comments