សមាគមគ្រឹះស្ថានឧត្តមសិក្សាកម្ពុជាថា ការបោះឆ្នោត បានប្រព្រឹត្តិទៅដោយរលូន និងបរិយាកាសល្អប្រសើរ

ភ្នំពេញ ៖ ការបញ្ជាក់របស់សមាគមគ្រឹះស្ថានឧត្តមសិក្សាកម្ពុជានេះ ធ្វើឡើងនៅក្នុងសន្និសីទសារព័ត៌មានមួយកាលពីល្ងាចថ្ងៃទី២៩ ខែកក្កដា ក្រោយបញ្ចប់ការបោះឆ្នោត។

លោកបណ្ឌិត ហេង វណ្ណដា ប្រធានសមាគមគ្រឹះស្ថានឧត្តមសិក្សាកម្ពុជាបានមានប្រសាសន៍ថា នៅក្នុងការបោះឆ្នោតជ្រើសរើសតំណាងរាស្ត្រ នីតិកាលទី៦ ឆ្នាំ២០១៨ នេះ សមាគមគ្រឹះស្ថានឧត្តមសិក្សាកម្ពុជា ដែលមានគ្រឹះស្ថានសិក្សាឯកជនចំនួន១០៣ ជាសមាជិក បានចាត់តាំងសមាជិក ចំនួន ២៥៩៥នាក់ ដែលជា និស្សិត សាស្ត្រាចារ្យ បញ្ញវន្ត គណៈគ្រប់គ្រងគ្រឹះស្ថានសិក្សា គ្របដណ្តប់តាមការិយាល័យបោះឆ្នោតទាំង ២៥ខេត្ត-ក្រុង ទូទាំងប្រទេសជាលក្ខណៈចល័ត និងអចល័ត ដើម្បីធ្វើជាអ្នកសង្កេតការណ៍ជាតិសម្រាប់ការបោះឆ្នោត។

តាមការពិនិត្យយ៉ាងយកចិត្តទុកដាក់ ហ្មត់ចត់ និង ប្រកបដោយការទទួលខុសត្រូវ ទៅលើការបោះឆ្នោតនេះ សមាគមគ្រឹះស្ថានឧត្តមសិក្សាកម្ពុជា បានសង្កេតឃើញថា

១-ការចុះឈ្មោះអ្នកបោះឆ្នោត ការពិនិត្យមើលឈ្មោះអ្នកបោះឆ្នោត អញ្ជើញទៅបោះឆ្នោត ពេលតម្រង់ជួរ ពេលចូលទៅបោះឆ្នោត និងត្រឡប់ចេញវិញ គឺដោយស្ម័គ្រចិត្ត គ្មានការបង្ខិតបង្ខំ ប្រកបដោយទឹកមុខរីករាយ។

២-ការចុះឈ្មោះគណបក្ស ការបើកទីស្នាក់ការគណបក្ស ការលើកស្លាកគណបក្ស ការចុះឈ្មោះភ្នាក់ងារគណបក្ស និងអ្នកសង្កេតការជាតិ-អន្តរជាតិ និងសកម្មភាពឃោសនារកសំឡេងឆ្នោត សកម្មភាពរបស់អ្នកសង្កេតការណ៍ អ្នកសារព័ត៌មាន បានប្រព្រឹត្តិទៅដោយរលូន គ្មានហិង្សា គ្មានការជេរប្រមាថ គ្មានសម្លុតគំរាមកំហែងគ្នា និង គ្មានការលក់ដូរសន្លឹកឆ្នោត។

៣-ស្ថានភាពរស់នៅប្រចាំថ្ងៃរបស់ប្រជាពលរដ្ឋមានលក្ខណៈធម្មតា គ្មានភ័យខ្លាច មិនទិញអង្ករទុក មិនចាក់សាំងទុកក្នុងយានជំនិះ មិនបញ្ជូនគ្រួសារទៅបរទេស មិនដកប្រាក់ពីធនាគារ ក្រុមហ៊ុននៅតែទិញលក់ជំពាក់គ្នាជាធម្មតា ពន្ធនៅតែបង់ធម្មតា…។ល។

៤-អាជ្ញាធរដែនដីនៅតែគ្រប់គ្រងរដ្ឋជាធម្មតា គ្រប់គ្រងថែរក្សាសន្តិសុខសង្គមដោយមិនរើសអើងគណបក្ស ឬប្រជាពលរដ្ឋ។
៥-ស្ថាប័នជាតិគ្រប់លំដាប់ថ្នាក់ នៅតែបន្តភារកិច្ចរបស់ខ្លួនជាធម្មតា មានចិត្តនឹងន អញ្ជើញមកបោះឆ្នោតដោយស្ម័គ្រចិត្តដូចពលរដ្ឋដទៃដោយគ្មានការបង្ខិតបង្ខំ។

៦-អ្នកនយោបាយ ដែលឈរឈ្មោះបោះឆ្នោត បានចុះទៅមូលដ្ឋាននានាដើម្បីឃោសនារកសម្លេងឆ្នោតដោយគោរពទៅតាមច្បាប់បោះឆ្នោត។

សមាគមគ្រឹះស្ថានឧត្តមសិក្សាកម្ពុជាបានសន្និដ្ឋានថា
១-ការបោះឆ្នោតជ្រើសរើសតំណាងរាស្ត្រ នីតិកាលទី៦ ឆ្នាំ២០១៨ នេះ ពិតជាបានប្រព្រឹត្តិទៅដោយរលូន គោរពច្បាប់ គោរពសិទ្ធិមនុស្ស គ្មានការបង្ខិតបង្ខំ គ្មានហិង្សា គ្មានការភ័យខ្លាច គ្មានការលក់ដូរសន្លឹកឆ្នោត ស្ងប់ស្ងាត់ មានសណ្ដាប់ធ្នាប់ល្អ និងស្ថិតនៅក្នុងបរិយាកាសនយោបាយប្រជាធិបតេយ្យ សេរី និងពហុបក្ស។

២-ស្ថាប័ន គ.ជ.ប ជាស្ថាប័នតែមួយគត់របស់ជាតិ បានអនុវត្តការបោះឆ្នោតជ្រើសរើសតំណាងរាស្ត្រ នីតិកាលទី៦ ឆ្នាំ២០១៨ នេះ ស្របទៅតាមច្បាប់បោះឆ្នោត និង លិខិតបទដ្ឋានគតិយុត្តិ, និងបានប្រកាន់យកជំហរអព្យាក្រឹត្យ យុត្តិធម៌ ស្អាតស្អំ និងតម្លាភាព៕