រដ្ឋមន្ត្រីការបរទេសអាមេរិកលោក Mike Pompeo បាននិយាយថា មន្ត្រីយោធាកូរ៉េខាងជើងនិងសហរដ្ឋអាមេរិក បានជួបប្រជុំគ្នាកាលពីថ្ងៃអាទិត្យ ដើម្បីពិភាក្សាអំពីការធ្វើមាតុភូមិនិវត្តន៍អដ្ឋិធាតុរបស់កងទ័ពអាមេរិកដែលត្រូវសម្លាប់អំឡុងសង្គ្រាមកូរ៉េ។
ការបញ្ជូនត្រឡប់នៃអដ្ឋិធាតុរបស់ទាហានអាមេរិកដែលបានស្លាប់ក្នុងអំឡុងជម្លោះចន្លោះឆ្នាំ ១៩៥០-៥៣គឺជាផ្នែកនៃកិច្ចព្រមព្រៀងមួយដែលត្រូវបានចុះហត្ថលេខាដោយមេដឹកនាំកូរ៉េខាងជើងលោកគីមជុងអ៊ុននិងប្រធានាធិបតីអាមេរិកលោកដូណាល់ត្រាំនៅក្នុងជំនួបកំពូលជាប្រវត្តិសាស្ត្ររបស់អ្នកទាំងពីរកាលពីខែមុន។
យោងតាមទីភ្នាក់ងារសារព័ត៌មាន Yonhap របស់កូរ៉េខាងត្បូងបានឲ្យដឹងថា កិច្ចពិភាក្សាចុងក្រោយបំផុតនេះបានចាប់ផ្តើមនៅភូមិបទឈប់បាញ់ Panmunjom នៅព្រំដែនអន្តរកូរ៉េ។
នៅក្នុងសេចក្តីថ្លែងការណ៍មួយ លោក Pompeo បាននិយាយថា “កិច្ចប្រជុំនេះមានផលិតភាពនិងសហប្រតិបត្ដិការហើយជាលទ្ធផលមានការសន្យាយ៉ាងរឹងមាំ”។ លោកបានបន្ថែមថា កិច្ចចរចាបន្ថែមទៀតនឹងចាប់ផ្តើមដើម្បីរៀបចំព័ត៌មានលម្អិតរួមទាំងការផ្ទេរអដ្ឋិធាតុដែលត្រូវបានរក្សាទុករួចទៅហើយនៅក្នុងប្រទេសកូរ៉េខាងជើងផងដែរ។
លោកបាននិយាយថា “លើសពីនេះទៅទៀត ភាគីទាំងពីរបានព្រមព្រៀងគ្នាដើម្បីចាប់ផ្តើមប្រតិបត្តិការនៅប្រទេសកូរ៉េខាងជើងឡើងវិញដើម្បីស្វែងរកអដ្ឋិធាតុជនជាតិអាមេរិកចំនួន៥,៣០០នាក់ដែលមិនដែលត្រឡប់ទៅផ្ទះវិញ”។
មឈូសឈើជាច្រើនដើម្បីដាក់អដ្ឋិធាតុជនជាតិអាមេរិកត្រូវបានគេរាយការណ៍ថាត្រូវបាននាំយកទៅភាគខាងត្បូងនៃព្រំដែនក្នុងរយៈពេលប៉ុន្មានសប្តាហ៍ថ្មីៗនេះ។
សេតវិមានបានសាទរកិច្ចប្រជុំកំពូលរវាងលោកគីមនិងលោកត្រាំនៅប្រទេសសឹង្ហបុរីថាជាការទម្លាយភាពទាល់ច្រកដ៏សំខាន់មួយឆ្ពោះទៅរកការរំសាយអាវុធនុយក្លេអ៊ែររបស់ប្រទេសកូរ៉េខាងជើងដើម្បីដោះដូរជាមួយនឹងការបន្ធូរបន្ថយទណ្ឌកម្មនិងជំនួយផ្សេងៗទៀតដើម្បីការអភិវឌ្ឍន៍សេដ្ឋកិច្ច៕ AFP
Source: Kampuchea Thmey Daily
0 Comments