ប្រទេសថៃ ៖ អាកាសយានិកម្នាក់ និងអ្នករួមដំណើរចំនួន២នាក់ទៀត បានស្លាប់ភ្លាមៗនៅក្នុងហេតុការណ៍ នៃការធ្លាក់ឧទ្ធម្ភាគចក្រ នៅក្នុងប្រទេសថៃ ដោយមិនទាន់ដឹងថា តើការធ្លាក់នេះបណ្តាលមកកត្តាអ្វីនោះឡើយ ខណៈដែលឧទ្ធម្ភាគចក្រនេះ ត្រូវបានក្រុមការងាររបស់ស្ថានីយទូរទស្សន៍ប៉ុស្តិ៍លេខ ៧ ជួលអោយហោះហើរដើម្បីផ្តិតយករូបភាពក្នុងការធ្វើព័ត៌មាននៅក្នុងខេត្ត ខនកែន។
យោងតាមការផ្សាយរបស់បណ្តាញព័ត៌មានក្នុងប្រទេសថៃបានអោយដឹងថា កាលពីព្រឹកថ្ងៃទី១៨ ខែកក្កដា ឆ្នាំ២០១៨ នេះ មានករណីធ្លាក់ឧទ្ធម្ភាគចក្រមួយគ្រឿងនៅចំណុចកណ្តាលវាលស្រែ ក្នុងភូមិសាស្ត្រភូមិ២ ឃុំវុំាងសែង ស្រុកជនបទ ខេត្តខនកែន ប្រទេសថៃ។
នៅកន្លែងកើតហេតុគេសង្កេតឃើញថា ឧទ្ធម្ភាគចក្រទាំងមូលត្រូវអណ្ដាតភ្លើងឆាបឆេះទាំងស្រុង ដោយមានបំណែកជាច្រើនបានប៉ើង ខ្ទាត ទៅឆ្ងាយៗពីចំណុចដែលធ្លាក់ ហើយក្រុមការងារសង្គ្រោះ បានប្រើប្រាស់ឧបករណ៍ដើម្បីជួយបាញ់ពន្លត់ភ្លើង និងដើម្បីជួយដល់មនុស្សដែលជាប់នៅក្នុងនោះ ដោយឧទ្ធម្ភាគចក្រនេះជារបស់ឯកជន និងជាប្រភេទ AS 355 NP។
ជាលទ្ធផលមនុស្សចំនួន៣នាក់ ត្រូវបានស្លាប់ដោយបន្សល់នូវអត្តសញ្ញាណប័ណ្ណ ដែលមានឈ្មោះ សែកសាន់ វណ្ណា ភេទប្រុស អាយុ៥១ឆ្នាំ ជាអ្នករស់នៅស្រុកមឿងខេត្តភិតប៊ូន និងឈ្មោះ វណ្ណឆៃ ឃុនរ៉ាត់ឆៃ ជាអាកាសយានិក របស់ក្រុមហ៊ុន SFS AVIATION Co. LTD រីឯម្នាក់ទៀតគឺកំពុងស្រាវជ្រាវនៅឡើយ ដោយគេគ្រាន់តែដឹងថា ឧទ្ធម្ភាគចក្រនេះ បានហោះហើរចេញពីខេត្ត សារៈបុរី និងមានលិខិតហោះហើរ ទៅកាន់ខេត្ត ខនកែន។
ប្រភពចុងក្រោយបានបញ្ជាក់ថា ការហោះហើរនេះដោយសារតែមានការជួលពីសំណាក់ភ្នាក់ងារស្ថានីយទូរទស្សន៍ប៉ុស្តិ៍លេខ៧ ដើម្បីធ្វើព័ត៌មានដោយនៅពេលនោះក្រុមបណ្តាអ្នកសារព័ត៌មាននៅឈររង់ចាំឯព្រលានយន្តហោះ ក្នុងខេត្តខនកែន ប៉ុន្តែជាចៃដន្យឧទ្ធម្ភាគចក្រក៏បានធ្លាក់ឆេះមុនទៅដល់ព្រលានចម្ងាយប្រមាណ ៧០ គីឡូម៉ែត្រ៕
Source: Kampuchea Thmey Daily
0 Comments