ប្រធានាធិបតីសហរដ្ឋអាមេរិកលោក Donald Trump កាលពីថ្ងៃអង្គារ បានធ្វើឲ្យខូចខាតដល់កិច្ចប្រជុំកំពូលរបស់គាត់ជាមួយលោក Vladimir Putin ដោយគាត់បានទទួលយកការសន្និដ្ឋានរបស់ភ្នាក់ងារចារកម្មអាមេរិកដែលថា រុស្ស៊ីបានជ្រៀតជ្រែកក្នុងការបោះឆ្នោតឆ្នាំ២០១៦។
នៅឯកិច្ចប្រជុំរបស់ពួកគេក្នុងទីក្រុង ហេលស៊ីនគី កាលពីថ្ងៃចន្ទ, លោក Trump មិនបានប្រឈមមុខជាមួយលោក Putin អំពីបញ្ហាការបោះឆ្នោតប្រធានាធិបតីទេដែលនោះហាក់ដូចជាបានទទួលយកការបដិសេធរបស់បុរសខ្លាំងដែលថា ក្រុងមូស្គូមិនបានជ្រៀតជ្រែកក្នុងការធ្វើឲ្យប៉ះពាល់ដល់បេក្ខជនប្រជាធិបតេយ្យលោកស្រី Hillary Clinton នោះទេ។
ប៉ុន្តែខណៈពេលប្រឈមមុខនឹងកំហឹងយ៉ាងខ្លាំងនៅក្នុងប្រទេសដោយសូម្បីតែសម្ព័ន្ធមិត្តនយោបាយមួយចំនួនរបស់គាត់បានទាមទារឲ្យគាត់ផ្លាស់ប្តូរវិញផងដែរនោះ, លោក Trump បានព្យាយាមកែប្រែសុន្ទរកថារបស់គាត់។
លោក Trump បាននិយាយថា គាត់បាននិយាយខុសចំពោះសេចក្តីថ្លែងការណ៍របស់គាត់ហើយបានផ្តល់ការពន្យល់អំពីការអះអាងរបស់គាត់ដែលថាគាត់មិនអាចមើលឃើញ “ហេតុផលណាមួយ” ដែលថាហេតុអ្វីបានជារុស្ស៊ីនឹងជ្រៀតជ្រែកនោះទេ។
លោក Trump បាននិយាយនៅឯសេតវិមានមុនពេលកិច្ចប្រជុំជាមួយសមាជិកសភាគណបក្ស សាធារណរដ្ឋថា “នៅក្នុងឃ្លាដ៏សំខាន់មួយក្នុងសុន្ទរកថារបស់ខ្ញុំ ខ្ញុំបាននិយាយពាក្យថា (នឹង) ជំនួសឲ្យពាក្យ (នឹងមិន)។ ឃ្លានេះគួរថា ខ្ញុំមិនបានមើលឃើញហេតុផលណាមួយដែលថាហេតុអ្វីបានជាវានឹងមិនមែនជាប្រទេសរុស្ស៊ីទេ”។
ប៉ុន្តែខណៈពេលដែលមេដឹកនាំអាមេរិកបានសម្តែងជំនឿយ៉ាងពេញទំហឹងនិងការគាំទ្រដល់ទីភ្នាក់ងារស៊ើបការណ៍សម្ងាត់ដ៏អស្ចារ្យរបស់អាមេរិកនោះ គាត់បានលើកឡើងថា “សកម្មភាពរបស់រុស្ស៊ីមិនមានផលប៉ះពាល់អ្វីទាំងអស់ទៅលើលទ្ធផលនៃការបោះឆ្នោត”។
ការស៊ើបអង្កេតរបស់រដ្ឋអាជ្ញាពិសេសលោក Robert Mueller អំពីការចូលជ្រៀតជ្រែករបស់រុស្ស៊ីនិងការឃុបឃិតជាមួយយុទ្ធនាការរបស់លោក Trump បានបង្កើនសម្ពាធលើសេតវិមាន។
ប្រធានាធិបតីដែលចាត់ទុកការស៊ើបអង្កេតនេះថាជាការវាយប្រហារលើភាពស្របច្បាប់របស់គាត់នោះបានហៅវាថាជា “ការព្យាយាមថ្កោលទោស” ហើយបាននិយាយម្តងទៀតកាលពីថ្ងៃអង្គារថា គ្មានការឃុបឃិតទាល់តែសោះ៕ AFP
Source: Kampuchea Thmey Daily
0 Comments