ភ្នំពេញ ៖ ចៅក្រមស៊ើបសួរនៃសាលាដំបូងរាធានីភ្នំពេញ លោក រស់ ពិសិដ្ឋ កាលពីថ្មីៗនេះបានចេញដីកាមួយបង្គាប់ឲ្យទណ្ឌិត សម រង្ស៊ី មេដឹកនាំចលនាសង្គ្រោះជាតិ ចូលខ្លួនឆ្លើយបំភ្លឺនៅសាលាដំបូងភ្នំពេញ នាព្រឹកថ្ងៃទី១៣ ខែសីហា ឆ្នាំ២០១៨ ខាងមុខ ពាក់ព័ន្ធនឹងបទល្មើសប៉ុនប៉ងកាត់ទឹកដីកម្ពុជាឲ្យបរទេស ហើយដីកានេះ ក៏ត្រូវបានសមត្ថកិច្ចយកទៅបិទនៅអតីតទីស្នាក់ការរបស់អតីតគណបក្សសង្គ្រោះជាតិផងដែរ កាលពីវេលាម៉ោង៩ ព្រឹក ថ្ងៃទី១៦ ខែកក្កដា ឆ្នាំ២០១៨។
តាមដីកាបង្គាប់ឲ្យចូលខ្លួន ចុះហត្ថលេខាដោយលោក រស់ ពិសិដ្ឋ កាលពីថ្ងៃទី១៣ ខែកក្កដា ឆ្នាំ២០១៨ បានឲ្យដឹងថា ឈ្មោះ សម រង្ស៊ី ភេទប្រុស កើតនៅថ្ងៃទី១០ ខែមីនា ឆ្នាំ១៩៤៩ ត្រូវបានដាក់ក្រោមការត្រួតពិនិត្យពីបទ “ប៉ុនប៉ងប្រគល់ឲ្យរដ្ឋបរទេសនូវដែនដីជាតិមួយផ្នែក” ប្រព្រឹត្តិនៅរាជធានីភ្នំពេញ និងទីកន្លែងផ្សេងទៀត កាលពីថ្ងៃទី១៤ ខែមេសា ឆ្នាំ២០១៣ ជាបទល្មើសដែលមានចែងឲ្យផ្តន្ទាទោសតាមបញ្ញត្តិមាត្រា២៧ និងមាត្រា៤៤០ នៃក្រមព្រហ្មទណ្ឌ។ ជាមួយគ្នានោះ បានបង្គាប់ឲ្យចូលខ្លួននៅថ្ងៃទី១៣ ខែសីហា ឆ្នាំ២០១៨ វេលាម៉ោង៩ព្រឹក ដើម្បីសាកសួរពាក់ព័ន្ធករណីខាងលើនេះ ហើយត្រូវចូលខ្លួនតាមកំណត់ ក្នុងករណីមិនចូលខ្លួនតាមការកំណត់ខាងលើនេះទេ នឹងចេញដីកាបង្គាប់ឲ្យនាំខ្លួន ឬចាប់ខ្លួន។
ពាក់ព័ន្ធករណីនេះ តំណាងអយ្យការ ធ្លាប់បានចេញដីកាកោះហៅលោក សម រង្ស៊ី ឲ្យចូលបំភ្លឺម្តងរួចហើយ នៅថ្ងៃទី០៧ ខែឧសភា ឆ្នាំ២០១៨ ប៉ុន្តែលោក សម រង្ស៊ី មិនបានចូលខ្លួនតាមកំណត់នោះទេ។
សូមបញ្ជាក់ថា កាលពីអំឡុងខែកុម្ភៈ ឆ្នាំ២០១៧ កូនចៅរបស់លោក សម រង្ស៊ី បានទម្លាយនូវរឿងដ៏សំខាន់សម្រាប់ប្រជាពលរដ្ឋកម្ពុជាទាំងអស់ ដែលត្រូវដឹង គឺលោក សម រង្ស៊ី បានទៅចុះហត្ថលេខានៅនៅទីក្រុង Greensboro នៃរដ្ធ North Carolina ឆ្នាំ២០១៣ ជាមួយនិងលោក កុសល កើត ជនជាតិយួន ដើម្បីទទួលស្គាល់ជនជាតិយួនដេហ្កាទាំងអស់ ដែលរស់នៅភាគខាងជើងប្រទេសកម្ពុជា គឺជាជនជាតិខ្មែរ ព្រមទាំងកាត់ដីមួយចំនួនផងដែរ។
ប្រភពនោះបានសរសេរថា “ខ្ញុំបានទទួលនូវព័ត៌មាន និងសំណុំឯកសារជាច្រើនពីប្រជាជនខ្មែរអាមេរិកាំងរស់នៅទីក្រុង Greensboro នៃរដ្ឋ North Carolina –USA និងបានសុំឲ្យផេកហ្វេសប៊ុកជួយទម្លាយរឿងលោក សម រង្ស៊ី ប្រធានគណបក្សសង្គ្រោះជាតិបានប្រព្រឹត្តនូវទង្វើក្បត់ជាតិ ដែលប្រជាជនកម្ពុជា ទាំងមូលត្រូវតែដឹងឲ្យបានច្បាស់ទាំងអស់គ្នា ព្រោះថាអ្វីដែលលោក សម រង្ស៊ី នៅរង់ចាំនោះ គឺនៅសល់តែមួយជំហានទៀតតែប៉ុណ្ណោះគឺ គាត់នឹងបានសម្រេចនូវផែនការក្បត់ជាតិ និងក្បត់ប្រជាជនកម្ពុជាបាន១០០ភាគរយហើយ។ ដើម្បីឲ្យបានដឹងច្បាស់អំពើទង្វើក្បត់ជាតិរបស់លោក សម រង្ស៊ី ខ្ញុំសូមបង្ហាញនូវភស្តុតាងតែមួយចំនួនតូចសិន ដើម្បីទម្លាយនូវការពិតជូនបងប្អូនជនរួម ជាតិបានជ្រាបអំពី ការចុះកិច្ជព្រមព្រៀងរវាងលោក សម រង្ស៊ី ដែលមានម្តាយជាជនជាតិយួន ជាមួយប្រធានចលនាជនជាតិភាគតិចដេហ្កាយួនឈ្មោះ កុសល កើត”។
លោក កុសល កើត រឺ KOK KSOR គឺជាជនជាតិវៀតណាមកើតនៅឆ្នាំ ១៩៤៥ នៅខេត្ត យ៉ាឡាយប្រទេសវៀតណាម។ បច្ចុប្បន្នគាត់មានសញ្ជាតិ អាមេរិកាំងដើមកំណើតយួន ហើយជាប្រធានរណសិរ្យជាតិរំដោះជនជាតិភាគតិចដេហ្កាយួន បានរៀបចំផែនទីដោយកាត់យកទឹកដី នៃខេត្តមួយចំនួន របស់កម្ពុជាបច្ចុប្បន្នធ្វើជាទឹកដីនៃរដ្ឋដេហ្គា។ នៅក្នុងពិធីជាផ្លូវការដែលមានអ្នកចូលប្រមាណជិតមួយពាន់នាក់ ដែលសុទ្ធសឹងតែជាជនជាតិដេហ្កាយួន នៅទីក្រុង Greensboro នៃរដ្ឋ North Carolina លោក កុសល កើត បាននិយាយទៅកាន់លោកសម រង្ស៊ី ដោយបានរៀបរាប់អំពីគោលបំណងដ៏សំខាន់បំផុតនៃពិធីជួបជុំនេះថា គាត់ចង់បានការបញ្ជាក់ អំពីគោលជំហរ និងគោលនយោបាយរបស់លោក សម រង្ស៊ី ចំពោះជនជាតិដេហ្គាយួន និងបានលើកឡើងថា ជនជាតិដេហ្កា គឺជាប្រជាជនដែលធ្លាប់ រស់នៅភាគខាងជើង នៃប្រទេសកម្ពុជា ក្នុងខេត្តស្ទឹងត្រែង ក្រចេះ រតនគីរី មណ្ឌលគីរីកន្លងមក។ ដូចនេះ ដើម្បីឲ្យប្រជាជនដេហ្គា អាចមករស់នៅកម្ពុជាវិញបាន តើលោក សម រង្ស៊ី មានផែនការបែបណាខ្លះ ដើម្បីជួយជនជាតិភាគតិចយួនដេហ្គា ឲ្យទទួលបាននូវទឹកដីខ្លួនក្នុងប្រទេសកម្ពុជាវិញ?។ នៅក្នុងឱកាសនោះ លោក សម រង្ស៊ី បាននិយាយឆ្លើយតបយ៉ាងច្បាស់លាស់ថា ខ្លួនទទួលស្គាល់ជនជាតិយួនដេហ្កាទាំងអស់នោះ គឺជាជនជាតិខ្មែរ ដោយស្វ័យប្រវត្តិ។ តើលោក សម រង្ស៊ី មានដឹងដែរ ឬ អត់ថា កុសល កើត ជាជនជាតិយួន?។
នៅឆ្នាំ ២០១៣ សម រង្ស៊ី និង កុសល កើត បានចុះហត្ថលេខាជាផ្លូវការលើកិច្ចព្រមព្រៀងនោះនៅទីក្រុង Greensboro ~ North Carolina ~ USA ។ បន្ទាប់ពី លោក សម រង្ស៊ី បានជួបនិងចុះហត្ថលេខាលើកិច្ចព្រមព្រៀងជាមួយ កុសល កើត រួចហើយ លោកអនុប្រធាន កឹម សុខា ក៏បានទៅជួបជាសម្ងាត់ ជាមួយជនជាតិយួននេះទៀតដែរ ដើម្បីជាការបញ្ជាក់ថា បក្សសង្គ្រោះជាតិដែលបង្កើតឡើងដោយបក្សសិទ្ធិមនុស្ស និងបក្ស សម រង្ស៊ី គឺមានជំហរដូចគ្នាចំពោះកិច្ចព្រមព្រៀងនេះនៅពេលបក្សសង្គ្រោះជាតិឈ្នះក្នុងការបោះឆ្នោត និងដឹកនាំប្រទេស។ ដូច្នេះអ្វីដែលនៅសល់សម្រាប់ការអនុវត្តនូវកិច្ចព្រមព្រៀងកាត់ទឹកដីខ្មែរឲ្យទៅយួន និងការទទួលស្គាល់ជនជាតិយួនដេហ្កាជាជនជាតិខ្មែរនេះ គឺនៅរង់ចាំតែ សន្លឹកឆ្នោតរបស់ប្រជាជនកម្ពុជាតែប៉ុណ្ណោះ។ សូមបងប្អូនខ្មែរយើងវិភាគ និងប្រៀបធៀបរវាងរដ្ឋាភិបាលនាយករដ្ឋមន្ត្រី ហ៊ុន សែន ដែលចុះកិច្ចព្រមព្រៀងជាមួយវៀតណាម ដើម្បីកំណត់ព្រំខណ្ឌសីមា និងបោះបង្គោលព្រំដែនការពារដីខ្មែរ ជាមួយលោក សម រង្ស៊ី ដែលចុះកិច្ចព្រមព្រៀងជាមួយ កុសល កើត ដែលជាជនជាតិយួន ដើម្បីកាត់ទឹកដីខ្មែរឲ្យជនជាតិ ភាគតិចដេហ្កាយួន ព្រមទាំងការទទួលស្គាល់ជនជាតិយួនភាគតិចនោះជាជនជាតិខ្មែរជាស្វ័យប្រវត្តិ?។
ប្រភពនោះបានលើកឡើងដែរថា ដើម្បីជាភស្តុតាង សូមបងប្អូនប្រជាពលរដ្ឋខ្មែរទាំងក្នុង និងក្រៅប្រទេសពិនិត្យមើលនូវរូបភាពមួយចំនួនសិនដែលបញ្ជាក់ពីដំណើរ ការរៀបចំផែនការក្បត់ជាតិរបស់លោក សម រង្ស៊ី ក្នុងការចុះហត្ថលេខាជាមួយយួន កុសល កើត កាត់ទឹកដីខ្មែរ និងទទួលស្គាល់យួនជាជនជាតិខ្មែរ។ ដោយមានរូបថតលោកសម រង្ស៊ី ចុះហត្ថលេខាជាមួយ កុសល កើត កាត់ទឹកដីរបស់ខេត្តខ្មែរមួយចំនួនឲ្យយួនកានកាប់ និងរូបភាពដែលលោក កឹម សុខា ជួបជាមួយយួន កុសល កើត ក្រោយ សម រង្ស៊ី បានចុះហត្ថលេខាកាត់ទឹកដីខ្មែរ និងទទួលស្គាល់យួនជាជនជាតិខ្មែរ ហើយរូបថតរបស់យួន កុសល កើត Kok KSOR ដែលបងប្អូនអាចរកឃើញតាម Google ផងដែរ និងក៏មានរូបផែនទីដែល សម រង្ស៊ី និងយួន ដែល កុសល កើត បានរៀបចំ និងព្រមព្រៀងគ្នា ដើម្បីកាត់ខេត្តខ្មែរឲ្យយួនកាន់កាប់បើបក្សសង្គ្រោះជាតិ ដឹកនាំប្រទេសផងដែរ។
នៅក្នុងកិច្ចសម្ភាសន៍ជាមួយកាសែតភ្នំពេញប៉ុស្តិ៍ លោក សម រង្ស៊ី អះអាងថា លោកពិតជាបានចុះហត្ថលេខាជាមួយ លោក Kok Ksor នៅសហរដ្ឋអាមេរិក កាលពីឆ្នាំ២០១៣នោះ ពិតប្រាកដមែន។
លោក គឹម សន្តិភាព អ្នកនាំពាក្យក្រសួងយុត្តិធម៌ ធ្លាប់បានលើកឡើងថា បទល្មើសកាត់ទឹកដីឲ្យបរទេស គឺជាបទឧក្រិដ្ឋ ដែលកំណត់ទោសធ្ងន់ធ្ងរបំផុត នៅក្នុងក្រមព្រហ្មទណ្ឌ ដោយសារតែបទល្មើសនេះ បានធ្វើឱ្យខាតបង់ធ្ងន់ធ្ងរដល់ប្រយោជន៍ជាតិ និងប្រជាជន។ លោកបានបន្តថា បទល្មើសនេះ គឺស្ថិតនៅក្នុងជំពូកទី២ អំពីការប៉ះពាល់ដល់សន្តិសុខនៃរដ្ឋ និងផ្នែកទី១ ស្តីពីអំពើក្បត់ជាតិ ក្នុងមាត្រា៤៤០ នៃក្រមព្រហ្មទណ្ឌ នៃព្រះរាជាណាចក្រកម្ពុជា។ អ្នកនាំពាក្យរូបនេះបានបន្តថា បើសិនជាតុលាការបានរកឃើញថា ទណ្ឌិត សម រង្ស៊ី ពិតជាបានប្រព្រឹត្តទង្វើក្បត់ជាតិ ក្នុងសំណុំរឿងថ្មីនេះពិតប្រាកដមែននោះ ទណ្ឌិត សម រង្ស៊ី អាចនឹងជាប់ពន្ធនាគារមួយជីវិតផងដែរ។
តាមមាត្រា៤៤០ នៃក្រមព្រហ្មទណ្ឌ នៃព្រះរាជាណាចក្រកម្ពុជា ដែលចែងអំពីអំពើក្បត់ជាតិ និងចារកម្ម បានកំណត់យ៉ាងដូច្នេះថា “អំពើប្រគល់ឲ្យរដ្ឋបរទេស ឬភ្នាក់ងារបរទេស នូវដែនដីជាតិទាំងស្រុង ឬមួយផ្នែក ត្រូវផ្តន្ទាទោសដាក់ពន្ធនាគារមួយជីវិត”៕
Source: Kampuchea Thmey Daily
0 Comments