រតនគិរី ៖ ជនសង្ស័យជនជាតិឡាវម្នាក់ ត្រូវបានកម្លាំងប៉ុស្តិ៍នគរបាលការពារព្រំដែនគោកលេខ៤០៧(កន្ទុយនាគ) បានសហការការជាមួយកម្លាំងកងអនុសេនាតូចទី៣(យោធាកន្ទុយនាគ) និងកម្លាំងបរិស្ថាន(កន្ទុយនាគ) បានត្រួតពិនិត្យឃាត់ខ្លួនពីបទចរាចរណ៍នូវសារធាតុញៀន។
ការឃាត់ខ្លួនជនសង្ស័យចរាចរណ៍គ្រឿងញៀននោះបានធ្វើឡើងនៅវេលាម៉ោង៤នឹង០០នាទីព្រឹក ថ្ងៃសុក្រ ១កើត ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៣ ខែកក្កដា ឆ្នាំ២០១៨នៅត្រង់នៅចំណុចកងអនុសេនាតូចទី៣(យោធាកន្ទុយនាគ)។
ប្រភពពីនគរបាលវរការពារព្រំដែនគោកបានឲ្យដឹងថា ជនសង្ស័យដែលឃាត់ខ្លួនបានឈ្មោះ ថាវ ស៊ឺន ភេទប្រុស អាយុ៤៣ឆ្នាំ ជនជាតិព្រៅ (សញ្ជាតិឡាវ) ចរាចរណ៍នូវសារធាតុញៀនចេញពីប្រទេសឡាវ ចូលមកទឹកដីនៃប្រទេសកម្ពុជា ហើយក៏ត្រូវកម្លាំងសមត្ថកិច្ចសហការគ្នាបានចុះត្រួតពិនិត្យសភាពការណ៍សន្តិសុខសណ្ដាប់ធ្នាប់នៅតាមបន្ទាត់ព្រំដែនជួបប្រទះនិងជនសង្ស័យធ្វើការឃាត់ខ្លួនបានតែម្តង។
ហើយខណៈនោះ សមត្ថកិច្ចដកហូតបានវត្ថុតាងជាក់ស្ដែងរួមមាន ថ្នាំញៀនមេតំហ្វេតាមីនទម្ងន់៤៤៣.០៨ក្រាម។ នាឡិកាដៃមួយខ្សែ លុយឡាវចំនួន៧៧ ០០០គីប សៀវភៅគ្រួសារជនជាតិឡាវចំនួន០១ក្បាលផងដែរ។
ប្រភពបន្តថា នៅព្រឹកថ្ងៃទី១៤ ខែឆ្នាំដដែល លោកឧត្តមសេនីយ៍ត្រី ហេង រតនៈ ស្នងការរងទទួលផែនការងារព្រំដែនបានទំនាក់ទំនងជាមួយ លោកមេបញ្ជាការកងទ័ពការពារព្រំដែនវៀតណាមខេត្តកន្ទូម ដើម្បីនាំខ្លួនជនសង្ស័យមកស្នងការដ្ឋាននគរបាលខេត្តរតនគិរី។
លុះដល់ថ្ងៃទី១៧ ខែកក្កដា ឆ្នាំ២០១៨ទើបភាគីវៀតណាមសហការនិងបញ្ជូនជនសង្ស័យរួមទាំងវត្ថុតាងមកដល់ច្រកទ្វាអន្តរអូរយ៉ាដាវ។
កិច្ចប្រតិបត្តិការសហការរួមដំណើរដោយលោក ឧត្តមសេនីយ៍ត្រី មុត ទីលី ស្នងការរងនៃស្នងការដ្ឋាននគរបាលខេត្តរតនគីរី។
លោកវរសេនីយ៍ឯក ថេង ចន្ទ័ធី មេបញ្ជាការវរសេនាតូចលេខ២០៣ បានធ្វើកំណត់ហេតុប្រគល់ជនសង្ស័យនិងវត្ថុតាងជូនលោកវរសេនីយ៍ទោ លាង អ៊ីម នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តរតនគីរីដើម្បីចាត់ការតាមនីតិវិធីបន្ត៕
Source: Kampuchea Thmey Daily
0 Comments