ការប្រកួតប្រដាល់ដណ្តើមពានរង្វាន់ជើងឯកTV5 Knock Out Series by K.Cement ទម្ងន់ ៦០គីឡូក្រាមលើសង្វៀន TV5 ព្រែកកំពឹស នៅថ្ងៃសៅរ៍ទី០៤ ខែសីហា ឆ្នាំ២០១៨នេះ ជាការប្រកួតលើកចុងក្រោយក្នុងជម្រុះដំណាក់កាលទី១ ដែលមានអ្នកប្រដាល់៤រូប ដើម្បីប្រជែងយកកៅអី សម្រាប់ដំណាក់កាលទី២ បន្តទៀត។
សម្រាប់ការប្រកួតជម្រុះលើកចុងក្រោយនេះ ឡុង ស៊ីថេត អ្នកប្រដាល់ក្លិបខ្លារខិនមានរិទ្ធ នឹងជួបប្រកួតជាមួយនួន រ៉ាថេប អ្នកប្រដាល់ក្លិបតាឯកដំបងដែកមានរិទ្ធ មកពីខេត្តព្រៃវែង។ រវាងឡុងស៊ីថេត និង នួន រ៉ាថេប នេះ ពួកគេជាអ្នកប្រដាល់ស្រករក្រោយ មិនធ្លាប់ជួបគ្នាទេកន្លងមក។ដូច្នេះ ជាការជួបគ្នាលើកទី១ សម្រាប់អ្នកប្រដាល់ទាំងពីរនាក់នេះ ។ប៉ុន្តែ នួន រ៉ាថេប គេស្គាល់សង្វៀនមុនឡុង ស៊ីថេត។
ទោះជាយ៉ាងណា សម្រាប់ការជួបគ្នារវាងឡុង ស៊ីថេត និង នួន រ៉ាថេប នេះ សូម្បីតែក្រុមអ្នកវិភាគប្រដាល់ ក៏មិនហ៊ានអះអាងថា អ្នកណាឈ្នះ អ្នកណាចាញ់ដែរ ព្រោះឡុង ស៊ីថេត គេវាយល្អនិងខ្លាំងដែរ។ តែយ៉ាងណា នួន រ៉ាថេប មានកណ្តាប់ដៃធ្ងន់ និងស្នៀតទាត់ល្អ ហើយថែមទាំងមានចិត្តប្រដាល់ធំថែមទៀត។ ចាំមើល តើនួន រ៉ាថេប អាចឈ្នះឡុង ស៊ីថេត បានឬអត់ ?។
ចំពោះការប្រកួតមួយគូទៀតនោះ ជាការជួបគ្នារវាងតាំង សីហា អ្នកប្រដាល់ក្លិបកងពលតូចលេខ៧០ និង សេន កុសល អ្នកប្រដាល់ក្លិបមោងឫស្សីមរតកគុនខ្មែរ មកពីខេត្តបាត់ដំបង ។ សេន កុសល ជាអ្នកប្រដាល់ជើងខ្លាំង ឯ តាំង សីហា ជាអ្នកប្រដាល់ចាស់វស្សាដែរ ។ពីរនាក់នេះ មិនធ្លាប់ប៉ះគ្នាទេកន្លងមក។
សម្រាប់ការជួបគ្នាលើកនេះ មិនដឹងថានរណា ជាអ្នកមានសំណាង បានឡើងទៅប្រកួតបន្តទៀតនោះទេ? តែយ៉ាងណា តាំង សីហាប្រហែលជាមិនអាចទៅរួចជាមួយសេន កុសល នោះឡើយព្រោះកុសល គេល្អទាំងស្នៀតដៃ ជើង ជង្គង់ កែង កំប្លេតែម្តង ហើយអ្នកប្រដាល់ជើងចាស់រូបនេះ ធ្លាប់ឈ្នះជើងខ្លាំងៗប៉ុន្មាននាក់ហើយកាលពីថ្មីៗកន្លងមកនេះ។
បើពិនិត្យទៅលើ តាំង សីហា វិញ ឃើញថាគេក៏មិនជាឃ្លាតឆ្ងាយប៉ុន្មានពីសេន កុសលនោះដែរ ។ តាំង សីហា មិនមានប្រវត្តិវាយ ជាមួយថៃ មិនធ្លាប់ជួបជើងខ្លាំងៗដូចសេន កុសលមែន តែគេមានស្នៀតប្រដាល់ល្អ ខ្លាំង និងមានចិត្តធំផងដែរ ។ យ៉ាងណា ការប្រកួតរវាងអ្នកប្រដាល់ទាំងពីរ អាចថាមានលក្ខណះតឹងតែងដែរ។
យ៉ាងណា រវាងអ្នកប្រដាល់ទាំងពីរនាក់នេះ គឺមិនអាចមើលស្រាលគ្នាទៅវិញទៅមកនោះឡើយ ត្បិតការប្រកួតជម្រុះនេះ ប្រកួតតែបីទឹកប៉ុណ្ណោះ ដូច្នេះនរណាវាយបុកខ្លាំងជាង គឺអ្នកនោះជាអ្នកមានប្រៀបឈ្នះហើយ មិនអាចវាយប្រោះទុកយូរបានឡើយ ។ចាំមើល រវាង តាំង សីហា និង សេន កុសល តើនរណានៅ នរណាដើរចេញពីការប្រកួតនេះ ?។
គួរបញ្ជាក់ថា ការប្រកួតក្នុងដំណាក់ទី១នេះ ប្រកួតតែបីទឹកទេ ហើយអ្នកដែលឈ្នះបានឡើងនិងអ្នកដែលចាញ់ត្រូវជ្រុះធ្លាក់ត្រឹមនេះ។
ព្រឹត្តិការណ៍ប្រកួតដណ្តើមពានរង្វាន់ជើងឯកTV5 Knock Out Series by K.Cement ទម្ងន់ ៦០ គីឡូនេះ មានអ្នកប្រដាល់ចំនួន ៣២ នាក់ចូលរួម ហើយចែកចេញជា ៤ ដំណាក់កាល និងមានរូបមន្តប្រកួត គឺដំណាក់ទី១ជាការប្រកួតជម្រុះក្នុងចំណោម៣២នាក់ ទុកតែ១៦នាក់ ។ ដំណាក់ទី២ ជាការជម្រុះក្នុងចំណោម១៦នាក់ ទុក៨នាក់ ហើយដំណាក់កាលទី៣ គឺជម្រុះក្នុង៨នាក់ទុក៤នាក់ និងដំណាក់កាលទី៤និងទី៥ ជាការប្រកួតដំណាក់កាលផ្តាច់ព្រ័ត្រ គឺពាក់កណ្តាលផ្តាច់ព្រ័ត្រ និង ផ្តាច់ព្រ័ត្រ៕
Source: Kampuchea Thmey Daily
0 Comments