ក្រុមព្រះ​ខ័ន​រាជ​ស្វាយរៀង ប្រកាស​ធ្វើ​គ្រូបង្វឹក​ដើម្បី​ដឹកនាំ​ក្រុមយុវជន​ថ្នាល​របស់​ក្លិប​ខ្លួន​

​ក្រុមបាល់ទាត់​ព្រះខ័ន​រាជ​ស្វាយរៀង សមាជិក​ក្នុង​ពានរង្វាន់​លី​គ​កំពូល​កម្ពុជា (Metfone Cambodian League 2018) បានប្រកាស​ធ្វើតេស្ត​ស្វែង​គ្រូបង្វឹក​ដែលមាន​បទពិសោធន៍​ខ្ពស់​ក្នុង​រាជធានី​ភ្នំពេញ ដើម្បី​បង្ហា​ត់ដល់​ក្រុមយុវជន​ថ្នាល​របស់ខ្លួន រាល់ថ្ងៃ​ចុង​សប្ដាហ៍​។

យោង​តាម​សេចក្តីជូ​នដំណឹង​របស់​ក្លិប​ ដែលមាន​មូលដ្ឋាន​នៅ​ខេត្តស្វាយរៀង មួយ​នេះ​បានបញ្ជាក់​សាលា​បាល់ទាត់​ក្លិប​ព្រះខ័ន​រាជ​ស្វាយរៀង ត្រូវការ​ជ្រើសរើស​គ្រូបង្វឹក​មានបទពិសោធន៍ និង​ឆន្ទៈ​ដើម្បី​បង្ហាត់​ដល់​ក្រុមយុវជន​អាយុ​ក្រោម ៩​ឆ្នាំ​, ១២​ឆ្នាំ និង​១៥​ឆ្នាំ​។​ រាល់​ការបង្ហាត់​នឹងត្រូវ​ធ្វើឡើង​នៅ​រាជធានី​ភ្នំពេញ ថ្ងៃ​សៅរ៍ និង​អាទិត្យ វេលា​ម៉ោង ៧ ដល់ ៩ ព្រឹក​។



បើសិន​បេក្ខជន​មាន​ចំណាប់អារម្មណ៍​សូម​ទំនាក់ទំនង​តាមរយៈ​លេខ​ទូរស័ព្ទ ០៧០ ៦៦៦ ៩១៩ (​ជា​)​។ ថ្មី​នេះ​ក្រុមព្រះ​ខ័ន​រាជ​ស្វាយរៀង បានប្រកាស​ចុះឈ្មោះ​កីឡាករ​យុវជន​ថ្នាល​២​នាក់​ដាក់ចូល​ក្នុង​បញ្ជី​ក្រុម​ធំ ដោយ​ក្នុង​នោះ​មាន​កីឡាករ យី ប៊ុនហេង ជា​អ្នកចាំទី និង​កីឡាករ គឹម សុខ​យុទ្ធ ជា​ខ្សែបម្រើ​។ កីឡាករ​ទាំង​២​នាក់ ត្រូវ​បាន​លោក Conor Nestor ដែលជា​គ្រូបង្វឹក បានដាក់​ក្នុង​បញ្ជី​ប្រកួត​ព្រមទាំង​បង្ហាញខ្លួន​ជាមួយ​ក្រុម​បណ្តើរៗ​ហើយ​។

ក្រុមព្រះ​ខ័ន​រាជ​ស្វាយរៀង ជា​ក្រុម​ដែល​សំបូរ​កីឡាករ​ចេញពី​យុវជន​ថ្នាល​របស់​ខ្លួន​ច្រើន ហើយ​មាន​កីឡាករ​ល្បីៗ​ឈ្មោះ​ជាច្រើន​ដូចជា សុក ចាន់​រស្មី នៅ​អគ្គីសនី​កម្ពុជា ចាន់ វឌ្ឍនាកា របស់​បឹងកេត ឃួន ឡា​បូ​រ៉ាវី នៅ​ក្លិប​Surat Thani លី​គ​លំដាប់​ទី​៤​ប្រទេស​ថៃ កីឡាករ ប្រាក់ មុន្នី​ឧ​ត្ត​ម ជាដើម​។



លោក Conor Nestor កំពុងតែ​ឈឺក្បាល​រឿង​ដឹកនាំ​ក្រុម​ទទួល​បាន​ចំណាត់ថ្នាក់​មិនសូវ​បានល្អ​ប្រចាំ​រដូវ​កាល​នេះ ​ក្រោយ​ប្រកួត​បាន​១៧​លើក ឈ្នះ​បាន​៦​លើក ហើយ​ស្មើគ្នា​បាន​៣​លើក និង​បរាជ័យ​រហូតដល់​៨​លើក​មាន​២១​ពិន្ទុ ឈរ​ចំណាត់ថ្នាក់​លេខ​៧​បណ្តោះអាសន្ន​ក្នុងចំណោម​ក្លិប​ជា​សមាជិក​ទាំង​១២​។ ថ្មីៗ​នេះ​ក្លិប​បាន​ដោះដូរ​កីឡាករ​គួរ​ឲ្យ​ភ្ញាក់ផ្អើល​មួយ ដើម្បី​ត្រៀម​ជើង​ទី​២​លី​គ​កំពូល​កម្ពុជា​រដូវ​កាល​ឆ្នាំ​២០១៨ ហើយ​តាមរយៈ​ការដោះដូរ​កីឡាករ​នេះ​គ្រូបង្វឹក​កាន់​អាជ្ញា​ប័ណ្ណ UEFA A License រូបនេះ រំពឹងថា ​ក្រុម​នឹងមាន​គុណភាព​មួយ​កម្រិត​ថែម​ទៀត​៕

  

Source: Kampuchea Thmey Daily