អ៊ីតាលី​ បញ្ចុះសព​អ្នក​ស្លាប់​ដោយសារ​បាក់​ស្ពាន​ស្រប​ពេល​មាន​កំហឹង

ប្រទេស​អ៊ីតាលី​បាន​ប្រារព្ធ​ពិធី​អធិស្ឋាន​ជា​ផ្លូវការ​នៅ​ថ្ងៃ​សៅរ៍​ដើម្បី​ឧទ្ទិស​ដល់​មនុស្ស​ជាច្រើន​នាក់​ដែល​ត្រូវ​បាន​សម្លាប់​ក្នុង​គ្រោះមហន្តរាយ​បាក់​ស្ពាន​នៅ​ទីក្រុង Genoa ខណៈ​ដែល​សាច់ញាតិ​របស់​ជនរងគ្រោះ​បាន​គេច​វេះ​មិន​ព្រម​ចូលរួម​ពិធី​ផ្លូវការ​ទាំង​ខឹងសម្បា។

រដ្ឋាភិបាល​ប្រជា​និយម​បាន​ស្តីបន្ទោស​ដល់​ប្រតិបត្តិ​ករ​ស្ពាន​នេះ​ចំពោះ​ការបាក់​កាលពី​ថ្ងៃ​អង្គារ​ដែល​បានសម្លាប់​មនុស្ស​យ៉ាងតិច​៣៨​នាក់​នៅ​ទីក្រុង​ភាគ​ខាងជើង​ប្រទេស​អ៊ីតាលី​ហើយ​បាន​គំរាម​ដក​ក្រុមហ៊ុន​ចេញពី​កិច្ចសន្យា​របស់ខ្លួន​។​

អាជ្ញាធរ​បានរៀបចំ​ពិធី​បុណ្យសព​ថ្នាក់​រដ្ឋ​នៅ​ថ្ងៃ​សៅរ៍​នៅឯ​សាល​មួយ​ក្នុង​ទីក្រុង Genoa ដោយ​ស្របពេល​ជាមួយ​ថ្ងៃ​នៃ​ការ​កាន់ទុក្ខ​។​

សាច់ញាតិ​ដែល​បាន​ប្រមូល​ផ្តុំគ្នា​នៅឯ​សាល​កាលពី​ថ្ងៃ​សុក្រ​បាន​ឱប​គ្នា​និង​អធិស្ឋាន​នៅលើ​មឈូស​ដែលមាន​តុបតែង​ជាមួយ​ផ្កា​និង​រូបថត​របស់​អ្នកស្លាប់​។​

ប៉ុន្តែ​យោងតាម​កាសែត La Stampa បាន​ចុះផ្សាយ​ថា គ្រួសារ​ជនរងគ្រោះ​ចំនួន​១៧​នាក់​បាន​បដិសេធ​ចូលរួម​ខណៈ​ប្រាំពីរ​នាក់​ទៀត​មិនទាន់​សម្រេចចិត្តថា​តើ​ពួកគេ​នឹងចូលរួម​ដែរឬទេ​។​

សារព័ត៌មាន​នេះ​បានលើកឡើង​សំដី​របស់​ម្តាយ​ជនរងគ្រោះ​មួយរូប​ដែល​បាន​និយាយថា “​វា​គឺជា​រដ្ឋ​ដែល​បាន​បង្ក​រឿងនេះ​ឡើង​ហើយ​កុំ​ឲ្យ​ពួកគេ​ចេញមុខ​មាត់​ឲ្យ​សោះ​”​។​

ប្រធានាធិបតី​អ៊ីតាលី​លោក Sergio Mattarella និង​នាយករដ្ឋមន្ត្រី​លោក Giuseppe Conte នឹង​ដឹកនាំ​ពិធី​បុណ្យសព​ថ្នាក់​រដ្ឋ​។​

រដ្ឋាភិបាល​បាន​ចោទប្រកាន់​ក្រុមហ៊ុន​ហេដ្ឋារចនាសម្ព័ន្ធ Autostrade per L Italia ថា បាន​ខកខាន​មិន​វិនិយោគ​ក្នុងការ​ថែទាំ​ឲ្យ​បាន​គ្រប់គ្រាន់​ហើយ​បាន​និយាយថា ខ្លួន​នឹង​ព្យាយាម​លុបចោល​កិច្ចសន្យា​ដ៏​ថ្លៃ​របស់ខ្លួន។

លោក Matteo Salvini រដ្ឋមន្ត្រី​ក្រសួងមហាផ្ទៃ​បានទាមទារ​ឲ្យ​ក្រុមហ៊ុន​នេះ​ផ្តល់ប្រាក់​ចំនួន​៥០០​លាន​អឺរ៉ូ (៥៧០​លាន​ដុល្លារ​អាមេរិក​) ដើម្បី​ជួយ​គ្រួសារ​និង​រដ្ឋាភិបាល​ក្នុង​តំបន់​ដោះស្រាយ​បន្ទាប់ពី​គ្រោះមហន្តរាយ​នេះ​៕ AFP

​

Source: Kampuchea Thmey Daily