មន្ទីរ​ទេសចរណ៍​ខេត្តរតនគិរី​ អំពាវនាវ​ឲ្យ​ម្ចាស់​អាជីវកម្ម​ទេសចរណ៍ កុំ​ដំឡើងថ្លៃ​សេវា​ទំនិញ ក្នុង​ពេល​ប្រឡង​បាក់​ឌុប

រតនគិរី ​៖ មន្ទីរ​ទេសចរណ៍​ខេត្តរតនគិរី បាន​អំពាវនាវ​ដល់​ម្ចាស់​អាជីវកម្ម​ទេសចរណ៍​ទាំងអស់​នៅ​ទូទាំង​ខេត្តរតនគិរី មេត្តា​កុំ​ដំឡើងថ្លៃ​សេវា​ទំនិញ ផលិតផល​របស់​ខ្លួន​ក្នុង​ពេល​ក្នុង​ពេល​ប្រឡង​បាក់​ឌុប​ដ៏​ចាំបាច់​នេះ។

ការ​អំពាវនាវ​បែបនេះ​គឺ​តាម​សេចក្ដីណែនាំ​ស្ដីពី​ការរក្សា​តម្លៃ​សេវាកម្ម​ទេសចរណ៍ ក្នុង​រយៈពេល​ប្រឡង​មធ្យម​សិក្សា​ទុតិយភូមិ ឆ្នាំ​២០១៨ នា​ថ្ងៃទី​១៦ ខែសីហា ឆ្នាំ​២០១៨​ម្សិលមិញ​នេះ​។

ក្នុង​សេចក្ដីណែនាំ​របស់​មន្ទីរ​ទេសចរណ៍​ខេត្តរតនគិរី បាន​បញ្ជាក់ថា នៅ​ថ្ងៃទី​២០ និង​២១ ខែសីហា​ខាងមុខនេះ ក្រសួង​អប់រំ​យុវជន​និង​កីឡា បានរៀបចំ​ការប្រឡង​មធ្យម​សិក្សា​ទុតិយភូមិ នៅ​ទូទាំងប្រទេស ដែល​សិស្សានុសិស្ស និង​ក្រុមការងារ​រៀបចំ​ការ​ប្រឡង​ចាំបាច់​ត្រូវធ្វើ​បម្លាស់​ទី​នៅតាម​ទីតាំង​មណ្ឌល​ប្រឡង ដោយ​ស្នាក់នៅ​ទី​រួម​ខេត្ត​ដើម្បី​ចូលរួម​ការប្រឡង​នេះ។

ដូច្នេះ​មន្ទីរ​សូម​ណែនាំ ដល់​ម្ចាស់​អាជីវកម្ម​ទាំងអស់ ត្រូវ​រក្សា​តម្លៃ​សេវាកម្ម​និង​គុណភាព​សេវាកម្ម​របស់ខ្លួន ដោយ​មិនត្រូវ​ដំឡើងថ្លៃ​នោះទេ ឬ​ពិនិត្យ​លទ្ធភាព​បញ្ចុះតម្លៃ​សេវាកម្ម​ដែល​អាចធ្វើ​ទៅបាន។​

លោក ខាត់ សា​ម៉ា​ល់ ប្រធាន​មន្ទីរអប់រំ​យុវជន និង កីឡា​ខេត្តរតនគិរី បាន​ឲ្យ​ដឹងថា សិស្សានុសិស្ស​ដែល​ត្រៀម​ប្រឡង​មធ្យមសិក្សា​ទុតិយភូមិ​ក្នុង​ឆ្នាំ​២០១៨​នេះ មាន​ចំនួន៩៤១​នាក់ ក្នុងនោះ​ស្រី​មាន​ចំនួន​៤៥៨​នាក់ មាន​បន្ទប់​ប្រLង​ចំនួន​៣៨​បន្ទប់ និង​មណ្ឌល​ប្រឡង​ចំនួន​២​គឺ​វិទ្យាល័យ​សម្ដេចឪ សម្ដេចម៉ែ និង វិទ្យាល័យ ហ៊ុន សែន​ភូមិ​ថ្មី ។​

លោក ប្រធាន​មន្ទីរអប់រំ​យុវជន និង កីឡា បាន​បន្ថែមទៀតថា នៅ​រយៈពេល​មិន​ដល់​១​ស​ប្ដា​ហ៍​ទៀត​ទេ ការប្រឡង​ នឹង​មកដល់ ហើយ​ក្មួយៗ និង​បញ្ចប់ ការសិក្សា នៅ​មធ្យមសិក្សា​ទុតិយភូមិ ក្មួយៗ​ជា​មនុស្សពេញវ័យ​ហើយ ជីវិត​រស់ នៅ​ការសិក្សា ការងារ វា​នឹង​ខុសគ្នា ដូចនេះ​ក្មួយៗ​ត្រូវខិតខំ​រៀន សូត្រ នូវ​ថ្នាក់​ឧ​ត្ត​ម បន្ត​ដើម្បី​មានចំណេះដឹង និង​ជំនាញ ឆ្លើយតប​ទៅ​នឹង​ទីផ្សារ​ការងារ នា​សម័យ​សកលភា​វូ​នីយ៍កម្ម ទីផ្សារ​ការងារ​នៅ​កម្ពុជា តំបន់ និង​សកល​លោក ដែល​កំពុងមាន ការរីកចម្រើន​យ៉ាង​លឿន ហើយ​ក្មួយៗ​ត្រូវខិតខំ​កសាង​ខ្លួនឯង​អោយ​បាន​ល្អ អោយ​សមជា​ពលរដ្ឋ​ល្អ សិស្ស​ល្អ មិត្ត​ល្អ បន្តទៀត នាពេល​អនាគត​។​

ទន្ទឹមនឹងនោះ​លោក​ប្រធាន​មន្ទីរអប់រំ​យុវជន និង កីឡា​សង្កត់ធ្ងន់ថា ការប្រឡង សញ្ញាបត្រ មធ្យមសិក្សា​ទុតិយភូមិ សម័យ​ប្រឡង​ឆ្នាំនេះ ក្រសួង​អប់រំ យុវជន និង​កីឡា នឹង​បន្ត​រឹតបន្តឹង ដដែល មិន​បន្ធូរ​បន្ថយ​ទេ ដោយ​ផ្អែកលើ​គោល​ការ បួន​គឺ ៖ ច្បាប់ យុត្តិធម៌ តម្លាភាព និង​លទ្ធផល​ទទួល​យកបាន។ ​ក្រសួង​អប់រំ​យុវជន និង​កីឡា នឹង​ផ្តល់រ​ង្វាន់​លើកទឹកចិត្ត សម្រាប់​សិស្ស​ប្រឡង​ជាប់ និទេស A ដោយឡែក​លោក ថង សាវុន អភិបាលខេត្ត​រតនគិរី​ក៏​នឹង​ផ្តល​ម៉ូតូ​១​គ្រឿង​ជូន​សិស្ស​និទ្ទេស​A​ផងដែរ​។​

​យោងតាម​របាយការណ៍​របស់​មន្ទីរអប់រំ​យុវជន និង កីឡា​ខេត្តរតនគិរី បាន​បញ្ជាក់ថា សម័យ​ប្រឡង​មធ្យមសិក្សា​ទុតិយភូមិ​ក្នុង​ឆ្នាំ​២០១៧​កន្លងទៅ​មាន​សិស្ស​ចូល​ប្រឡង​ចំនួន​៨៨៥​នាក់ ស្រី​៣២៨​នាក់ ប្រឡង​ជាប់​ចំនួន​៧៣៦​នាក់ ស្មើ​​នឹង​៨៣,២០​ភាគរយ។ ប៉ុន្ដែ​នៅក្នុង​ខេត្តរតនគិរី​ទាំងមូល​មិនមាន​សិស្ស​ប្រឡង​ជាប់ និទ្ទេស A​នោះ​ទេ៕



Source: Kampuchea Thmey Daily